II Phung Hađăch 18 - Nau Brah Ndu Ngơi 2023

Phung hađăch nglĕ dŭt tâm phung Yuđa ( 18:1 – 25:30 ) Y-Hêsêkia ƀư hađăch Yuđa

¹ Tâm năm rơh pe rnôk rô̆ Y-Hôsêa, kon Y-Êla, hađăch Israel chiă uănh, pôri Y-Hêsêkia, kon Y-Ahas, hađăch Yuđa, hao jêng hađăch.

² Tơlah ntơm gŭ ta sưng hađăch, păng geh bar jât ma prăm năm, jêh ri chiă uănh bar jât ma sĭn năm tâm ƀon Yêrusalem. Amoh mê̆ păng jêng H'Abi, kon bu ur Y-Sakari.

³ Păng ƀư nau di tanăp măt Brah Yêhôva tâm ban Y-Đavit, chô yau păng, ƀư jêh.

⁴ Păng ƀư rai lĕ ntŭk prêh klơ, mbang nchah lơi lĕ n'gâng mbah, kăl lơi lĕ rup brah Asêra, jêh ri nchah hăch rhên bêh ma kông Y-Môis ƀư jêh. Yorlah ma tât nôk nây, phung ƀon lan Israel ăt gŭch ndơ ƀâu kah ma ndơ nây; bu ntơ păng jêng Nêhustan.

⁵ Y-Hêsêkia nsing ma Yêhôva Brah Ndu Israel, tât mâu geh nơm nâm bu păng tâm lĕ rngôch phung hađăch Yuđa pakơi ma păng, mâu geh lĕ tâm phung hađăch lor panăp păng.

⁶ Păng kuăn nâp ngăn Brah Yêhôva, mâu du tă bơh Păng ôh, ƀiălah djôt prăp lĕ nau vay Brah Yêhôva ntăm, hŏ ntăm jêh ma Y-Môis.

⁷ Yor ri, Brah Yêhôva gŭ ndrel păng, ăp nau păng ƀư, păng geh nau dơi. Păng dâk tâm rdâng dah hađăch Asiri, mâu tông bâr ma păng ôh.

⁸ Păng tâm lơh đah phung Philistin tât ta ƀon Gaxa jêh ri nkual neh jŭm ƀon păng, ntơm bơh ngih tŭm gak tât ma ƀon geh pôih nâp.

⁹ Tâm năm rơh puăn rnôk rô̆ hađăch Hêsêkia chiă uănh, di tâm năm rơh pơh rnôk rô̆ Y-Hôsêa, kon Y-Êla, hađăch Israel chiă uănh, pôri Y-Salmanêser, hađăch Asiri hăn lơh ma Samari jêh ri nchueng jŭm ƀon nây.

¹⁰ Lôch pe năm, păng sŏk ƀon nây. Pônây, bu sŏk ƀon Samari tâm năm rơh prao rnôk rô̆ Y-Hêsêkia chiă uănh, jêng năm rơh sĭn rnôk rô̆ Y-Hôsêa, hađăch Israel chiă uănh.

¹¹ Hađăch Asiri njŭn leo phung Israel ma n'gor bri Asiri, dơm khân păng tâm ƀon Hala, ta kơh dak krong Habôr, tâm n'gor Gôsan, jêh ri tâm lĕ ƀon n'gor Mêdơ.

¹² Nau aơ tât geh yorlah khân păng mâu tông tĭng ôh nau ngơi Yêhôva Brah Ndu khân păng, ƀiălah ƀư tih ma nau tâm rnglăp Păng. Khân păng mâu ŭch iăt jêh ri mâu đŏng ƀư tĭng lĕ rngôch nau Y-Môis, oh mon Brah Yêhôva, hŏ ntăm jêh.

Phung Asiri nkrit nhhu pit in Yêrusalem

¹³ Tâm năm jât ma puăn rnôk rô̆ hađăch Hêsêkia chiă uănh, geh Y-Sênakêrip, hađăch Asiri, hăn lơh jêh ri pit sŏk ma lĕ rngôch ƀon dŭt nâp ngăn tâm n'gor Yuđa.

¹⁴ Y-Hêsêkia, hađăch Yuđa, njuăl nơm mbơh hăn tât ta ƀon Lakis gay lah ma hađăch Asiri pô aơ: “Gâp ƀư tih jêh. Dăn ma may rŭch plơ̆ phung tahan may tă bơh gâp; moh ndơ may kêh ta gâp, gâp mra anh.” Hađăch Asiri nchâp ma Y-Hêsêkia, ăn hađăch Yuđa chê̆ sĭn rbăn kilô prăk, jêh ri sĭn rhiăng kilô mah.

¹⁵ Y-Hêsêkia ăn ma păng lĕ rngôch rnoh prăk geh tâm ngih Brah Yêhôva, jêh ri tâm jay prăp drăp khlay tâm ngih hađăch.

¹⁶ Nôk nây, ăn Y-Hêsêkia plơk mah ta lĕ mpông jêh ri meh mbong mpông ngih brah Brah Yêhôva jêng ndơ Y-Hêsêkia hađăch Yuđa nơm hŏ mblum jêh, jêh nây djôt leo ndơ nây chê̆ ma hađăch Asiri.

¹⁷ Ƀiălah hađăch Asiri prơh Y-Tartan, Y-Rabsaris, jêh ri Y-Rapsaka hăn, djôt leo ndrel ma du phung tahan ktang tă bơh Lakis tât ta ƀon Yêrusalem tâm mâp đah hađăch Hêsêkia. Khân păng hao tât ta ƀon Yêrusalem. Tơlah tât ta nây, khân păng gŭ nsrâng ta rmlông dak nglao pa lơ, ta trong toyh tât ta mir phung ƀư kloh bok.

¹⁸ Khân păng dăn tâm mâp ma hađăch. Ƀiălah kôranh mât uănh ngih hađăch jêng Y-Êliakim, kon Y-Hilkia, kôranh nchih samƀŭt Y-Sêpna, jêh ri nơm kâp nchih nau tât jêng Y-Jôa, kon Y-Asap, luh ran vơt ma khân păng.

¹⁹ Y-Rabshakeh lah ma khân păng: “Plơ̆ sĭt hom lah tay ma Y-Hêsêkia pô aơ: Hađăch toyh Asiri lah kơt aơ: ‘Ma mbu moh khân may nsing aơ?

²⁰ May mĭn knŏng ma rplay ngơi dơm dam dơi rgâl nau blau nchră jêh ri nau dăng ktang gay tâm lơh hĕ? Pôri aƀaơ, ma mbu may rnơm nsing kŏ tât may janh tâm rdâng đah gâp?

²¹ Aơ, may rnơm nsing ma n'gor Êjipt hĕ? Ƀiălah Êjipt knŏng tâm ban du mâng ma tơm rpho lĕ deh jêh; tơlah mbu nơm rnơm nsing ma păng, păng mra ntâp bluh lăp tâm ti. Tơlah mbu nơm rnơm nsing ma Pharaôn, hađăch Êjipt, tâm ban pônây.’

²² Klăp lah khân may mra lah ma gâp pô aơ: ‘Hên rnơm nsing ma Yêhôva Brah Ndu hên. Mâu hĕ di Y-Hêsêkia nơm ƀư rai jêh lĕ ntŭk prêh jêh ri nơng ƀư brah klơ ta nây, jêh nây ntăm ma phung Yuđa jêh ri ma ƀon Yêrusalem yơk mbah panăp nơng ƀư brah ta Yêrusalem hĕ?’

²³ Pôri, ăn may ƀư nau tâm nkol đah kôranh gâp jêng hađăch Asiri. Gâp mra ăn ma may bar rbăn mlâm seh tơlah may joi tŏng rnoh phung tahan ncho seh gay ncho.

²⁴ Nđâp tơlah may rnơm nsing ma n'gor Êjipt gay geh ndeh seh jêh ri phung tahan ncho seh, pônây mâm may dơi mprơh du huê kôranh tahan jê̆ lơn tâm phung kôranh tahan kôranh gâp?

²⁵ Rlau lơn ma nĕ, mâu di hĕ tĭng nâm nau mĭn ŭch Brah Yêhôva gâp hăn hao lơh gay ƀư rai lơi ntŭk nây? N'hêl nanê̆ Brah Yêhôva hŏ lah jêh ma gâp: ‘Hăn hao hom lơh jêh ri ƀư rai lơi n'gor.’”

²⁶ Y-Êliakim, kon Y-Hilkia, ndrel ma Y-Sêpna jêh ri Y-Jôa lah ma Y-Rabshakeh: “Dăn lah đah phung oh mon may tâm nau ngơi Aram, yorlah hên gĭt rbăng nau nây. Dăn lơi ngơi ôh ma hên nau ngơi phung Yuđa, klach lah phung ƀon lan gŭ ta klơ mpêr ƀon dơi tăng.”

²⁷ Ƀiălah Y-Rabshakeh plơ̆ lah ma khân păng: “Di lĕ kôranh gâp prơh gâp hăn gay knŏng ngơi lĕ nau aơ ma kôranh khân may jêh ri ma khân may? Mâu di hĕ gay lah đah phung dôl gŭ ta klơ mpêr ƀon ri, jêng phung ndrel ma khân may, mra sa ek jêh ri nhêt dak chrach khân păng nơm?”

²⁸ Jêh nây Y-Rabshakeh dâk, ngơi nter huy ma nau ngơi phung Yuđa pô aơ: “Gŭ iăt hom nau hađăch toyh Asiri!

²⁹ Hađăch lah tâm ban pônây: ‘Lơi ăn Y-Hêsêkia ndơm ôh khân may, yorlah păng mâu dơi tâm rklaih khân may bơh ti gâp ôh.

³⁰ Lơi ăn Y-Hêsêkia ndơm khân may rnơm nsing ma Brah Yêhôva tơlah pô aơ n'hêl nanê̆ Brah Yêhôva mra tâm rklaih he; jêh ri bu mâu mra jao ƀon aơ tâm ti hađăch Asiri ôh.

³¹ Lơi ta iăt Y-Hêsêkia, yorlah hađăch Asiri lah pô aơ: Ƀư hom nau đăp mpăn đah gâp jêh ri luh ran lăp ma gâp; pôri ăp nơm tâm khân may mra dơi sa kao play tâm đang krăk ƀâu, n'gar rvi păng nơm, jêh ri nhêt dak tă bơh ndrâm ntu păng nơm,

³² kŏ tât tơlah gâp văch njŭn leo khân may lăp tâm du n'gor nâm bu n'gor khân may nơm, jêng n'gor geh prăp ba jêh ri ndrănh, piăng let jêh ri đang krăk ƀâu, du n'gor geh dak ngi ôlive jêh ri dak sŭt. Pônây, khân may mra dơi gŭ rêh jêh ri mâu khĭt ôh. Pônây khân may lơi iăt ôh nau Y-Hêsêkia, yorlah păng ndơm mƀruh khân may nôk pô aơ Brah Yêhôva mra tâm rklaih he.

³³ Geh lĕ du huê brah tâm lĕ bri dak mâp dơi tâm rklaih bri khân păng bơh ti hađăch Asiri mâm dơi lĕ?

³⁴ Mbah ntŭk brah ƀon Hamat jêh ri brah ƀon Arpat? Mbah ntŭk brah ƀon Sêpharvaim, brah ƀon Hêna jêh ri brah n'gor Iva? Phung brah nây dơi tâm rklaih n'gor Samari bơh ti gâp lĕ?

³⁵ Geh brah moh tâm lĕ rngôch brah lĕ bri dak hŏ rklaih n'gor khân păng tă bơh ti gâp lĕ? Pônây, Brah Yêhôva dơi rklaih Yêrusalem tă bơh ti gâp lĕ?’”

³⁶ Ƀiălah phung ƀon lan gŭ rklăk, mâu plơ̆ sĭt lah du play ngơi ôh, yorlah hađăch ntăm jêh: “Khân may lơi plơ̆ lah ma păng ôh.”

³⁷ Y-Êliakim, kon Y-Hilkia jêng kôranh mât uănh ngih hađăch, Y-Sêpna jêng kôranh nchih samƀŭt jêh ri Y-Jôa jêng kôranh kâp nchih samƀŭt nau tât, kon Y-Asap, nkhêk ao khân păng nơm, jêh nây plơ̆ sĭt nkoch tay ma hađăch Hêsêkia lĕ nau Y-Rabshakeh ngơi.