II Phung Hađăch 17 - Nau Brah Ndu Ngơi 2023

Y-Hôsêa, hađăch nglĕ dŭt ma phung Israel

¹ Tâm năm rơh jât ma bar rnôk rô̆ Y-Ahas, hađăch Yuđa chiă uănh, geh Y-Hôsêa, kon bu klâu Y-Êla, hao ƀư hađăch Israel jêh ri chiă uănh sĭn năm tâm ƀon Samari.

² Hađăch ƀư nau mhĭk tanăp măt Brah Yêhôva, ƀiălah păng mâu ban ôh ma phung hađăch Israel alor ri.

³ Hađăch Asiri jêng Y-Salmanêser hăn hao tâm lơh đah Y-Hôsêa, ƀư ăn păng tông bâr jêh ri chê̆ pi ma Y-Salmanêser.

⁴ Ƀiălah hađăch Asiri saơ Y-Hôsêa nchră nau tâm rdâng; yorlah păng hŏ prơh phung mbơh hăn tât ma Y-Sô, hađăch Êjipt, jêh ri mâu chê̆ pi ôh ma hađăch Asiri tâm ăp năm nâm bu saơm; yor nây hađăch Asiri nhŭp Y-Hôsêa nkông jêh ri krŭng păng tâm ndrung bu nă.

Bu njŭn leo phung ƀon lan Israel tât ta Asiri

⁵ Jêh nây hađăch Asiri hăn lơh lĕ n'gor jêh ri nchueng jŭm ƀon Samari tâm pe năm.

⁶ Tâm năm rơh sĭn rnôk rô̆ Y-Hôsêa chiă uănh, hađăch Asiri sŏk ƀon Samari jêh ri veng leo phung ƀon lan Israel rlet ma Asiri. Hađăch ăn ma khân păng gŭ tâm ƀon Hala, ta kơh dak krong Habôr n'gor Gôsan jêh ri tâm lĕ ƀon bri dak phung Mêdơ.

⁷ Nau aơ tât geh yorlah phung ƀon lan Israel ƀư tih jêh ma Yêhôva Brah Ndu khân păng, jêng Nơm hŏ ngluh jêh khân păng luh bơh Êjipt jêh ri luh bơh tâm ti Pharaôn, hađăch Êjipt. Khân păng hŏ yơk mbah jêh ma lĕ brah êng,

⁸ gŭ rêh tĭng nâm nau vay phung ƀon lan Brah Yêhôva hŏ mprơh jêh luh bơh phung ƀon lan Israel, jêh ri chuat tĭng nâm nau vay phung hađăch Israel hŏ nkra jêh.

⁹ Phung ƀon lan Israel ƀư lĕ nau mâu di tâm nau ndâp, ŭch tâm rdâng đah Yêhôva Brah Ndu khân păng. Khân păng ndâk lĕ ntŭk prêh klơ tâm lĕ rngôch ƀon, ntơm bơh ngih tŭm gak tât ma ƀon geh pôih nâp.

¹⁰ Khân păng ndâk ma khân păng nơm lĕ n'gâng mbah ƀư ma lŭ jêh ri rup brah bu ur Asêrim ta lĕ rngôch ntŭk klơ jêh ri tâm dâng lĕ rngôch tơm si ndrêh.

¹¹ Ta lĕ ntŭk prêh klơ nây, khân păng su n'hôl ƀâu kah nâm bu phung ƀon lan Brah Yêhôva mprơh du jêh bơh khân păng, ƀư jêh lĕ nau djơh mhĭk gay nsônh nau ji nuih Brah Yêhôva.

¹² Khân păng yơk mbah ma phung rup brah, ma nau nây Brah Yêhôva hŏ ntăm jêh ma khân păng: “Khân may mâu dơi yơk mbah nau aơ.”

¹³ Ƀiălah, Brah Yêhôva hŏ dŏng nơm mbơh lor, nơm geh nau tâm saơ gay mbơh ma phung ma phung Israel jêh ri phung Yuđa pô aơ: “Chalơi hom bơh trong djơh mhĭk khân may! Djôt prăp hom nau vay ntăm jêh ri nau vay bơh Gâp, tĭng nâm lĕ nau vay Gâp ntrŭnh ma phung chô yau khân may, jêh ri lĕ nau Gâp hŏ dŏng oh mon Gâp jêng phung nơm mbơh lor ngơi ma khân may.”

¹⁴ Ƀiălah, khân păng mâu iăt nau jêh ri dăng ko nâm bu phung chô yau khân păng, jêng phung mâu chroh ôh ma Yêhôva Brah Ndu khân păng.

¹⁵ Khân păng mưch rmot ma lĕ nau vay dăp bơh Păng tâm ban đŏng nau tâm rnglăp Păng hŏ ƀư jêh ma chô yau khân păng, jêh ri khân păng mưch rmot đŏng lĕ nau tâm rmal Păng hŏ ntăm jêh ma khân păng. Khân păng hăn tĭng ndô̆ phung brah dơm dam jêh ri khân păng nơm ăt rlơ̆ jêng dơm dam. Khân păng kơt phung ntil mpôl bunuyh gŭ văr jŭm, jêng phung ntil mpôl bunuyh Brah Yêhôva ntrŭnh jêh ma khân păng mâu tĭng kơt phung nây.

¹⁶ Khân păng mƀăr lơi lĕ rngôch nau vay ntăm tă bơh Yêhôva Brah Ndu khân păng, jêh ri tŏ êng ma khân păng nơm bar mlâm rup ndrôk kon, ƀư rup brah bu ur Asêra, yơk mbah ma lĕ rngôch mănh mbing, jêh ri yơk mbah ma brah Baal.

¹⁷ Khân păng gŭch phung kon bu klâu jêh ri kon bu ur khân păng tâm ŭnh gay ƀư ndơ nhhơr ma brah. Khân păng dŏng nau ƀŭk rƀên, n'hŭm pol, jêh ri tăch êng khân păng nơm gay ƀư nau mhĭk tanăp măt Brah Yêhôva, gay nsônh Păng ji nuih.

¹⁸ Yor ri, Brah Yêhôva ji nuih ngăn ma phung Israel jêh ri mprơh du khân păng bơh tanăp măt Păng, knŏng hôm ndŭl mpôl Yuđa dơm.

¹⁹ Phung Yuđa mâu đŏng djôt prăp lĕ nau vay Yêhôva Brah Ndu ntăm khân păng. Khân păng hăn tĭng lĕ nau vay phung Israel hŏ nkra jêh.

²⁰ Yor nây, Brah Yêhôva chalơi lĕ rngôch noi deh phung Israel. Păng ƀư ma khân păng geh nau bêk prêng jêh ri jao khân păng tâm ti phung pit in, kŏ tât Păng klŭp mƀăr khân păng ngai đah măt Păng.

²¹ Tơlah Păng nkhêk phung Israel luh bơh ngih Y-Đavit, khân păng njêng Y-Jêrôbôam, kon bu klâu Y-Nêbat, ƀư hađăch. Y-Jêrôbôam ndơm phung Israel chalơi Brah Yêhôva, jêh ri nsŭk ma khân păng ƀư tih toyh ngăn.

²² Phung ƀon lan Israel chuat tâm lĕ rngôch nau tih Y-Jêrôbôam ƀư jêh, mâu chalơi djê̆ ro. Khân păng mâu der ôh tă bơh nau nây

²³ kŏ tât Brah Yêhôva mprơh du khân păng bơh Păng, di nâm nau Păng hŏ ngơi ma trôm mbung phung nơm mbơh lor, jêng oh mon Păng. Pônây, bu mprơh du lơi phung Israel tă bơh n'gor bri khân păng nơm rlet ma bri Asiri tât ma nar aơ.

Asiri njŭn leo phung bu nă tă bơh lĕ n'gor êng hăn tât gŭ ta n'gor Samari

²⁴ Hađăch Asiri njŭn leo phung bunuyh tă bơh Babilôn, Kuta, Ava, Hamat jêh ri Sêpharvaim, văch tât gŭ tâm lĕ ƀon n'gor Samari, ntrok ntŭk phung ƀon lan Israel. Khân păng pit in n'gor Samari jêh ri gŭ tâm lĕ ƀon păng.

²⁵ Tơlah khân păng ntơm gŭ ta nây, khân păng mâu klach yơk ôh ma Brah Yêhôva, yor nây Brah Yêhôva prơh yau mŭr hăn tât kăp nkhĭt âk bunuyh tâm khân păng.

²⁶ Bu mbơh ma hađăch Asiri pô aơ: “Phung mpôl băl bunuyh may njŭn leo gay gŭ tâm lĕ n'gor Samari mâu gĭt ôh nau yơk mbah brah tâm n'gor tơm. Yor ri, brah nây prơh jêh yau mŭr hăn tât gay kăp nkhĭt khân păng, yorlah khân păng mâu gĭt ôh nau yơk mbah brah tâm n'gor tơm.”

²⁷ Hađăch Asiri ntĭnh: “Du huê kôranh tâm phung kôranh ƀư brah khân may hŏ nhŭp jêh bơh ta nây gay djôt leo ta nây, leo hom du huê tâm kôranh plơ̆ sĭt ta n'gor nây gay ntĭm nti ma khân păng nau vay mbah brah tâm n'gor tơm.”

²⁸ Pônây, du huê tâm phung kôranh ƀư brah khân păng hŏ leo jêh tă bơh n'gor Samari, leo mplơ̆ sĭt ta Bêthel gay ntăm nti ma khân păng nau yơk klach ma Brah Yêhôva.

²⁹ Ƀiălah ăp ntil mpôl bunuyh njêng phung brah êng ma khân păng nơm, jêh ri dơm brah nây tâm ntŭk yơk mbah ta lĕ ntŭk prêh klơ phung Samari ƀư jêh. Ăp ntil mpôl bunuyh ƀư đŏng ma khân păng nơm pônây tâm lĕ ƀon khân păng gŭ.

³⁰ Phung Babilôn ƀư rup brah Sukôt-Bênôt, phung Kus ƀư rup brah Nergal, phung Hamat ƀư rup brah Asima,

³¹ phung Ava ƀư rup brah Niphas jêh ri Tartuk, bi phung Sêpharvaim gŭch phung kon khân păng tâm ŭnh gay ƀư ndơ nhhơr ma brah Adramêlek jêh ri Anamêlek, jêng phung brah ma phung Sêpharvaim.

³² Khân păng klach yơk ma Brah Yêhôva, ƀiălah săch phung bơh khân păng jêng kôranh ƀư brah ta lĕ ntŭk prêh klơ; yor khân păng phung kôranh ƀư brah nây nhhơr ndơ ƀư brah tâm lĕ ntŭk yơk mbah ta ntŭk prêh klơ.

³³ Phung mpôl băl bunuyh nây klach yơk ma Brah Yêhôva, ƀiălah pah kan ma brah êng khân păng nơm tâm ban lĕ, tĭng nâm nau vay ơm phung mpôl băl bunuyh êlor khân păng ƀư dĭk bu.

³⁴ Ma tât nar aơ, khân păng ăt hôm ƀư tĭng nâm nau vay saơm khân păng. Khân păng mâu klach yơk ôh ma Brah Yêhôva, mâu đŏng ƀư tĭng ndô̆ nau vay dăp, nau vay ƀư, nau vay, mâu lah nau vay Brah Yêhôva ntăm, hŏ ntăm jêh ma phung kon sau Y-Yakôb, nơm Păng ntơ amoh jêng Israel.

³⁵ Brah Yêhôva hŏ njêng jêh nau tâm rnglăp đah Israel jêh ri ntĭm nti pô aơ: “Khân may lơi klach ma lĕ brah êng ôh, mâu dơi đŏng yơk mbah, rhŏ pah kan jêh ri nhhơr mpa ƀư brah ma khân păng.

³⁶ Ƀiălah Brah Yêhôva, Nơm hŏ sŏk nau brah toyh jêh ri nting tur yơr sŏng, djôt khân may luh bơh Êjipt, Păng jêng Nơm ăn khân may klach yơk, chon mbah, jêh ri nhhơr mpa ƀư brah.

³⁷ Lĕ nau vay dăp, lĕ nau vay ƀư jêh ri nau vay jêh ri nau vay ntăm, Păng hŏ nchih jêh ma khân may, ăn khân may djôt prăp ƀaƀơ. Khân may lơi klach ma lĕ brah êng ôh.

³⁸ Khân may mâu dơi chuêl ôh nau tâm rnglăp Gâp ƀư jêh đah khân may, jêh ri lơi klach ôh ma lĕ brah êng.

³⁹ Ƀiălah ăn khân may klach yơk ma Yêhôva Brah Ndu khân may, Păng nơm mra tâm rklaih khân may bơh ti lĕ rngôch phung rlăng khân may.”

⁴⁰ Ƀiălah, phung mpôl băl bunuyh mâu ŭch iăt ôh, ăt ƀư tĭng nâm nau vay saơm khân păng nơm.

⁴¹ Pônây, phung ntil mpôl bunuyh aơ klach yơk ma Brah Yêhôva, jêh ri tâm ban lĕ khân păng yơk mbah ma lĕ rup brah khân păng trah jêh. Mâm nau phung chô yau khân păng ƀư, pôri phung kon sau khân păng ăt ƀư tâm ban pônây lĕ tât ma nar aơ.