II Phung Hađăch 16 - Nau Brah Ndu Ngơi 2023

Y-Ahas hađăch Yuđa

¹ Năm rơh jât ma pơh rnôk rô̆ Y-Pêka, kon Y-Rêmalia chiă uănh, geh Y-Ahas, kon Y-Jôtham hađăch Yuđa, hao jêng hađăch.

² Tơlah ntơm chiă uănh Y-Ahas geh bar jât năm, jêh ri păng chiă uănh jât ma prao năm tâm ƀon Yêrusalem. Hađăch mâu ƀư nau di tanăp măt Yêhôva Brah Ndu păng nơm, nâm bu chô yau păng jêng Y-Đavit hŏ ƀư jêh.

³ Ƀiălah hađăch hăn tĭng trong phung hađăch Israel, kŏ tât su kon bu klâu păng tâm ŭnh jêng ndơ ƀư brah, tĭng nâm nau vay ƀơ̆ ƀơch phung ƀon lan Brah Yêhôva hŏ mprơh du jêh tă bơh phung ƀon lan Israel.

⁴ Hađăch nhhơr đŏng mpa ƀư brah jêh ri su n'hôl ƀâu kah ta lĕ ntŭk prêh klơ, ta lĕ gôl jêh ri tâm dâng lĕ rngôch tơm si ndrêh.

⁵ Nôk nây, Y-Rêsin hađăch Aram, jêh ri Y-Pêka, kon Y-Rêmalia, hađăch Israel, leo phung tahan păng tât ta Yêrusalem gay tâm lơh. Khân păng nchueng jŭm Y-Ahas, ƀiălah khân păng mâu dơi đah hađăch ôh.

⁶ Rnôk nây, hađăch Aram jêng Y-Rêsin sŏk sĭt tay Êlat ma bri dak Aram. Hađăch mprơh phung Yuđa du luh bơh Êlat, jêh ri phung Êđôm văch tât ma Êlat, gŭ ta nây tât ma nar aơ.

⁷ Y-Ahas đă phung mbơh hăn tât gay lah đah hađăch Asiri jêng Y-Tiglat-Pilêser: “Gâp jêng oh mon may jêh ri kon may. Dăn ma may văch tâm rklaih gâp bơh ti hađăch Aram jêh ri hađăch Israel yorlah khân păng rduh lơh đah gâp.”

⁸ Y-Ahas sŏk mah jêh ri prăk tâm ngih Brah Yêhôva jêh ri tâm lĕ jay prăp drăp khlay ngih hađăch njuăl jêng ndơ nhhơr ma hađăch Asiri.

⁹ Hađăch Asiri dơn nau Y-Ahas dăn, leo phung tahan păng hao lơh pit sŏk ƀon Damas, nhŭp phung ƀon lan tâm ƀon njŭn leo tât ma Kir jêh ri nkhĭt lơi Y-Rêsin.

¹⁰ Tơlah hađăch Ahas hăn ma Damas gay tâm mâp đah hađăch Asiri jêng Y-Tiglat-Pilêser, păng saơ du nơng ƀư brah ta ƀon Damas. Hađăch Y-Ahas njuăl ro ma kôranh ƀư brah Y-Urija rup nơng ƀư brah nây, jêh ri lĕ rngôch nau ntĭm bu ƀư nơng ƀư brah.

¹¹ Kôranh ƀư brah Y-Urija ndâk du mlâm nơng ƀư brah di tĭng nâm rup nơng bơh hađăch Ahas hŏ njuăl tă bơh Damas. Kôranh ƀư brah Y-Urija ƀư lôch jêh nơng ƀư brah nây êlor ma hađăch Ahas sĭt.

¹² Tơlah hađăch sĭt tă bơh Damas, păng văch tât uănh nơng ƀư brah jêh nây hăn dăch jêh ri nhhơr ndơ ƀư brah ta klơ nây.

¹³ Hađăch nhhơr ndơ ƀư brah gŭch, ndơ ƀư brah rnih môi, ƀư ndơ nhhơr nhêt jêh ri mham ndơ ƀư brah ma nau đăp mpăn klơ nơng ƀư brah.

¹⁴ Hađăch trơn ma nơng ƀư brah ma kông gŭ panăp Brah Yêhôva, ơm ta lor panăp ngih brah, vah vang nơng ƀư brah mhe jêh ri ngih Brah Yêhôva, jêh nây n'gân păng ta mpeh pa lơ nơng ƀư brah mhe.

¹⁵ Jêh nây hađăch Ahas ntĭnh ma kôranh ƀư brah Y-Urija pô aơ: “Ta klơ nơng ƀư brah toyh, nhhơr hom ndơ ƀư brah gŭch ăp ôi jêh ri ndơ ƀư brah rnih môi ăp mhaơ, jêh ri ndơ ƀư brah gŭch jêh ri ndơ ƀư brah rnih môi hađăch, ndơ ƀư brah gŭch jêh ri ndơ ƀư brah rnih môi lĕ rngôch phung ƀon lan tâm n'gor ndrel ma ndơ nhhơr nhêt, jêh ri mbrih mham mpa ƀư brah bơh ndơ ƀư brah gŭch, nđâp lĕ mham bơh lĕ mpa ƀư brah êng ta klơ nơng ƀư brah nây. Bi nơng ƀư brah ma kông gâp mra dŏng prăp ma gâp gay ôp nau mĭn Kôranh Brah.”

¹⁶ Kôranh ƀư brah Y-Urija ƀư di tĭng nâm lĕ nau hađăch Ahas hŏ ntĭnh jêh.

¹⁷ Jêh ta nây, hađăch Ahas koh lơi ndor năp hip ndơ n'gâng dak jêh ri sŏk lơi ndơ n'gâng dak tă ta nây; jêh ri păng ntrŭnh lơi drŏng dak bu ƀư ma kông tă klơ rup ndrôk kông ndăl păng, jêh nây leo n'gân păng ta klơ mbon nơng lŭ.

¹⁸ Gay ƀư di nuih n'hâm ma hađăch Asiri, păng rgâl ntŭk tâm trôm ngih Brah Yêhôva, păng rơih lơi ndring nkŭm duh tâm nar saƀat bu ƀư jêh tâm ngih hađăch, jêh ri mƀăr lơi trong lăp prăp ma hađăch gŭ padih.

¹⁹ Mâu di hĕ lĕ kan êng Y-Ahas jêh ri lĕ kan hađăch ƀư jêh bu hŏ nchih da dê tâm ndrom samƀŭt nau rêh jêng ma phung hađăch Yuđa?

²⁰ Y-Ahas khĭt hăn gŭ ndrel ma phung chô yau păng jêh ri bu tâp ndrel khân păng tâm ƀon Đavit. Y-Hêsêkia, kon hađăch, chiă uănh thoi ntrok păng.