II Phung Hađăch 15 - Nau Brah Ndu Ngơi 2023

Y-Asaria chiă uănh

¹ Tâm năm rơh bar jât ma pơh rnôk rô̆ Y-Jêrôbôam, hađăch Israel chiă uănh, geh Y-Asaria, kon Y-Amasia, hađăch Yuđa ntơm chiă uănh.

² Tơlah ntơm gŭ ta sưng hađăch, păng geh jât ma prao năm jêh ri chiă uănh prăm jât ma bar năm tâm Yêrusalem. Amoh mê̆ păng jêng H'Jêkôlia, ƀon tơm ta Yêrusalem.

³ Păng ƀư nau di tanăp măt Brah Yêhôva, di nâm lĕ nau mbơ̆ păng jêng Y-Amasia hŏ ƀư jêh.

⁴ Bu mâu ƀư rai ôh lĕ ntŭk prêh klơ, pôri phung ƀon lan ăt hôm nhhơr mpa ƀư brah jêh ri su n'hôl ƀâu kah ta lĕ ntŭk prêh klơ.

⁵ Brah Yêhôva rmal ma hađăch, ƀư ăn păng geh nau ji phŭng kŏ tât nar păng khĭt; păng gŭ rêh du huê păng tâm du ngih êng. Y-Jôtham, kon hađăch, pah kan tâm ngih hađăch jêh ri chiă uănh phung ƀon lan tâm bri.

⁶ Mâu di hĕ lĕ nau kan ƀaƀă Y-Asaria, lĕ kan păng ƀư jêh, bu hŏ nchih tâm ndrom samƀŭt nau rêh jêng ma phung hađăch Yuđa?

⁷ Y-Asaria khĭt hăn gŭ ndrel ma phung chô yau păng jêh ri bu tâp păng ndrel ma khân păng tâm ƀon Đavit. Jêh nây kon păng jêng Y-Jôtham chiă uănh thoi păng.

Y-Sakari ƀư hađăch Israel

⁸ Tâm năm rơh pe jât ma pham rnôk rô̆ Y-Asaria, hađăch Yuđa chiă uănh, geh Y-Sakari, kon bu klâu Y-Jêrôbôam, ntơm ƀư hađăch Israel jêh ri chiă uănh prao khay ta ƀon Samari.

⁹ Păng ƀư nau mhĭk tanăp măt Brah Yêhôva nâm bu phung chô yau păng hŏ ƀư jêh. Păng mâu chalơi ôh nau tih bơh Y-Jêrôbôam, kon bu klâu Y-Nêbat, jêng nau nsŭk phung Israel ƀư tih.

¹⁰ Y-Salum, kon bu klâu Y-Jabes, nchră nau tâm rdâng đah hađăch. Păng rduh lơh hađăch tanăp măt phung ƀon lan, jêh nây nkhĭt hađăch jêh ri pit sŏk sưng hađăch.

¹¹ Lĕ kan êng Y-Sakari bu hŏ nchih da dê tâm ndrom samƀŭt nau rêh jêng ma phung hađăch Israel.

¹² Pônây, nau Brah Yêhôva ton jêh ma Y-Jêhu: “Phung kon sau may mra gŭ ta sưng hađăch Israel tât ta rnôk rơh puăn,” nau nây tât di ngăn.

Y-Salum ƀư hađăch Israel

¹³ Tâm năm rơh pe jât ma sĭn rnôk rô̆ Y-Usia, hađăch Yuđa chiă uănh, geh Y-Salum, kon Y-Jabes, hao jêng hađăch jêh ri chiă uănh dôl du khay tâm ƀon Samari.

¹⁴ Y-Mênahem, kon bu klâu Y-Gađi, tă bơh Tirsa hao tât ta Samari lơh Y-Salum, kon bu klâu Y-Jabes, tâm ƀon Samari jêh ri nkhĭt hađăch, jêh nây Y-Mênahem hao ƀư hađăch ntrok Y-Salum.

¹⁵ Lĕ kan êng Y-Salum, lĕ nau tâm nchră bơh hađăch ŭch ƀư, bu hŏ nchih da dê tâm ndrom samƀŭt nau rêh jêng ma phung hađăch Israel.

¹⁶ Nôk nây, Y-Mênahem hăn tă bơh Tirsa tâm lơh Tipsa, nkhĭt lĕ rngôch phung gŭ tâm ƀon jêh ri lam nkual văr jŭm. Yorlah phung tâm ƀon nây mâu ŭch pơk mpông ƀon ma păng ôh, yor nây păng lơh ƀư rai lơi ƀon, jêh ri roch ndŭl proch lĕ rngôch bu ur ntreo tâm ƀon nây.

Y-Mênahem ƀư hađăch Israel

¹⁷ Tâm năm rơh pe jât ma sĭn rnôk rô̆ Y-Asaria, hađăch Yuđa chiă uănh. Y-Mênahem, kon bu klâu Y-Gađi, hao ƀư hađăch Israel, jêh ri chiă uănh jât năm tâm ƀon Samari.

¹⁸ Păng ƀư nau mhĭk tanăp măt Brah Yêhôva; du njăr rêh păng mâu chalơi ôh nau tih bơh Y-Jêrôbôam, kon bu klâu Y-Nêbat, nau nsŭk phung Israel ƀư tih.

¹⁹ Hađăch Asiri jêng Y-Pul hăn văch rvan n'gor. Y-Mênahem ăn ma Y-Pul pe rmưn kilô prăk, gay ma păng kơl ăn nâp ƀon bri hađăch tâm ti păng.

²⁰ Y-Mênahem riu rnoh prăk nây tă bơh phung ndrŏng tâm phung ƀon lan Israel, ăp nơm chê̆ n'gul kilô prăk, gay chê̆ ma hađăch Asiri. Pôri hađăch Asiri du sĭt, mâu gŭ tâm n'gor ôh.

²¹ Mâu di hĕ lĕ kan êng Y-Mênahem, jêh ri lĕ rngôch nau kan păng ƀư jêh bu hŏ nchih da dê jêh tâm ndrom samƀŭt nau rêh jêng ma phung hađăch Israel?

²² Y-Mênahem khĭt, hăn gŭ ndrel ma phung chô yau păng. Y-Pekahia, kon păng, chiă uănh thoi ntrok păng.

Y-Pekahia ƀư hađăch Israel

²³ Tâm năm rơh prăm jât rnôk rô̆ Y-Asaria, hađăch Yuđa chiă uănh, geh Y-Pekahia, kon Y-Mênahem, hao ƀư hađăch Israel tâm ƀon Samari, jêh ri chiă uănh bar năm.

²⁴ Păng ƀư nau mhĭk tanăp măt Brah Yêhôva, mâu chalơi ôh bơh nau tih Y-Jêrôbôam, kon bu klâu Y-Nêbat, jêng nau nsŭk jêh phung Israel ƀư tih.

²⁵ Du huê kôranh chiă uănh ma phung tahan Y-Peka, kon Y-Rêmalia, nchră nau tâm rdâng đah păng jêh ri lơh nkhĭt păng tâm ƀon Samari, tâm pôih nâp ngih hađăch, nkhĭt lĕ Y-Argôp jêh ri Y-Ariêh. Y-Pêka djôt leo ndrel prăm jât bunuyh Gilêat, păng nkhĭt Y-Pekahia jêh ri pit sŏk sưng hađăch.

²⁶ Lĕ kan êng Y-Pekahia, jêh ri lĕ kan păng ƀư jêh bu hŏ nchih da dê tâm ndrom samƀŭt nau rêh jêng ma phung hađăch Israel.

Y-Pêka ƀư hađăch Israel

²⁷ Tâm năm prăm jât ma bar rnôk rô̆ Y-Asaria, hađăch Yuđa chiă uănh, geh Y-Pêka, kon Y-Rêmalia, hao ƀư hađăch Israel ta ƀon Samari, jêh ri chiă uănh bar jât năm.

²⁸ Păng ƀư nau mhĭk tanăp măt Brah Yêhôva, mâu chalơi nau tih Y-Jêrôbôam, kon bu klâu Y-Nêbat, jêng nau nsŭk phung Israel ƀư tih.

²⁹ Tâm rnôk rô̆ Y-Pêka, hađăch Israel chiă uănh, geh Y-Tiglat-Pilêser, hađăch Asiri, văch tât pit sŏk Ijôn, Abel-Bet-Maka, Janôa, Kêdês, Hasôr, n'gor Gilêat, n'gor Galilê, jêh ri lĕ n'gor neh Naptali. Jêh nây păng nhŭp phung ƀon lan tâm lĕ n'gor nây njŭn leo tât ta n'gor Asiri.

³⁰ Nôk nây, kon Y-Êla jêng Y-Hôsêa nchră nau tâm rdâng đah hađăch Pêka, kon Y-Rêmalia, jêh ri dong nkhĭt hađăch, jêh nây pit sŏk sưng hađăch, di tâm năm rơh bar jât rnôk rô̆ hađăch Jôtham, kon Y-Usia chiă uănh.

³¹ Lĕ kan êng Y-Pêka, jêh ri lĕ kan păng ƀư jêh, bu nchih da dê tâm ndrom samƀŭt nau rêh jêng ma phung hađăch Israel.

Y-Jôtham hađăch Yuđa

³² Tâm năm rơh bar rnôk rô̆ Y-Pêka, kon Y-Rêmalia, hađăch Israel chiă uănh, geh Y-Jôtham, kon Y-Usia, hađăch Yuđa hao gŭ ta sưng hađăch.

³³ Tơlah ntơm chiă uănh, Y-Jôtham geh bar jât ma prăm năm, jêh ri chiă uănh jât ma prao năm ta ƀon Yêrusalem. Amoh mê̆ păng jêng H'Jêrusa, kon bu ur Y-Sadôk.

³⁴ Hađăch ƀư nau di tanăp măt Brah Yêhôva, ƀư tĭng lĕ nau mbơ̆ păng jêng Y-Usia hŏ ƀư jêh.

³⁵ Ƀiălah bu mâu ƀư rai ôh lĕ ntŭk prêh klơ; phung ƀon lan ăt hôm nhhơr mpa ƀư brah jêh ri su n'hôl ƀâu kah ta lĕ ntŭk prêh klơ. Y-Jôtham ndâk mpông pêr ta klơ ngih Brah Yêhôva.

³⁶ Mâu di hĕ lĕ kan êng Y-Jôtham, jêh ri lĕ kan păng ƀư jêh, bu hŏ nchih da dê tâm ndrom samƀŭt nau rêh jêng ma phung hađăch Yuđa?

³⁷ Tâm rnôk nây, Brah Yêhôva ntơm ƀư ăn ma Y-Rêsin hađăch Aram, jêh ri Y-Pêka, kon Y-Rêmalia, văch tât lơh phung Yuđa.

³⁸ Y-Jôtham khĭt hăn gŭ n'hanh ma phung chô yau păng jêh ri bu tâp păng tâm ƀon Đavit. Kon hađăch jêng Y-Ahas gŭ ta sưng hađăch chiă uănh thoi ntrok păng.