II Phung Hađăch 14 - Nau Brah Ndu Ngơi 2023

Y-Amasia ƀư hađăch Yuđa

¹ Tâm năm rơh bar rnôk rô̆ Y-Jôas chiă uănh kon bu klâu Y-Jôahas, hađăch Israel, geh Y-Amasia, kon bu klâu Y-Jôas, hađăch Yuđa, ntơm gŭ ta sưng hađăch.

² Tơlah ntơm chiă uănh, hađăch geh bar jât ma prăm năm, jêh ri chiă uănh bar jât ma sĭn năm tâm ƀon Yêrusalem. Amoh mê̆ păng jêng H'Jêhôađin, ƀon tơm ta Yêrusalem.

³ Păng ƀư nau di tanăp măt Brah Yêhôva, ƀiălah mâu di nâm bu chô yau păng jêng Y-Đavit; păng ƀư tĭng lĕ nau bơh Y-Jôas, mbơ̆ păng hŏ ƀư jêh.

⁴ Bu mâu ƀư rai ôh lĕ ntŭk prêh klơ, pôri phung ƀon lan ăt hôm nhhơr mpa ƀư brah jêh ri su n'hôl ƀâu kah ta lĕ ntŭk prêh klơ nây.

⁵ Tơlah hađăch kuăn nâp jêh ƀon bri hađăch tâm ti, păng nkhĭt lơi phung oh mon păng jêng phung hŏ nkhĭt jêh mbơ̆ păng.

⁶ Ƀiălah păng mâu nkhĭt ôh phung kon khân păng; tĭng nâm nau nchih jêh tâm ndrom samƀŭt nau vay Y-Môis; tâm nây, Brah Yêhôva ntăm jêh pô aơ: “Bu mâu mra nkhĭt ôh mbơ̆ yor ma nau tih kon, mâu mra nkhĭt đŏng kon yor ma nau tih mbơ̆, yorlah ăp nơm mra khĭt yor nau tih păng nơm.”

⁷ Y-Amasia hŏ nkhĭt jêh du rmưn tahan phung Êđôm tâm rlŭng Boh, jêh ri pit sŏk ƀon Sêla tâm nau rduh lơh nây, jêh nây bu ntơ amoh Joktêel, ăt hôm ma tât nar aơ.

⁸ Jêh nau nây, Y-Amasia prơh phung mbơh hăn mâp đah Y-Jôas, kon Y-Jôacha, sau Y-Jêhu, hađăch Israel, nđâp ma nau ngơi nsônh nuih: “Văch hom, lŏng nâl ăn he tâm lơh.”

⁹ Y-Jôas, hađăch Israel, prơh bunuyh hăn plơ̆ lah ma Y-Amasia, hađăch Yuđa: “Tơm lok ta bri Liban njuăl bunuyh lah ma tơm si sêdar ta bri Liban pô aơ: ‘Ăn hom kon bu ur may ƀư ur ma kon bu klâu gâp.’ Ƀiălah geh mpô mpa bri ta Liban hăn rgăn, jot nchah lok nây.

¹⁰ May hŏ lơh jêh phung Êđôm jêh ri nuih n'hâm may bêng nau hưn. Gŭ hom tâm ngih gay mƀrơn ma nau chrêk rmah may. Mâm ƀư ŭch ƀư tay nau mhĭk ma may nơm, ƀư ăn ma may jêh ri lĕ phung Yuđa cha lôt?”

¹¹ Ƀiălah Y-Amasia mâu ŭch iăt ôh. Pôri, Y-Jôas hađăch Israel, dâk hao, jêh nây păng jêh ri Y-Amasia hađăch Yuđa tâm lơh ta ƀon Bet-Sêmes, tâm n'gor phung Yuđa.

¹² Phung Israel lơh rai jêh phung Yuđa, phung Yuđa nchuăt du, ăp nơm plơ̆ sĭt ma ngih khân păng.

¹³ Y-Jôas, hađăch Israel, nhŭp Y-Amasia, hađăch Yuđa, kon Y-Jôas, sau Y-Ahasia ta Bet-Sêmes. Jêh nây Y-Jôas hăn tât ta Yêrusalem, ƀư rlâm lĕ mpêr ƀon ntơm bơh mpông pêr Êphraim tât ta mpông pêr Njônh, tâm du bông jong bar rhiăng met.

¹⁴ Hađăch sŏk lĕ rngôch mah, prăk, jêh ri lĕ rngôch ndơ dŏng joi saơ jêh tâm ngih Brah Yêhôva, jêh ri tâm lĕ jay prăp drăp khlay tâm ngih hađăch. Hađăch tâm ban lĕ nhŭp đŏng âk bu nă, jêh nây plơ̆ sĭt ma ƀon Samari.

¹⁵ Mâu di hĕ lĕ kan êng Y-Jôas, lĕ nau hađăch ƀư jêh, nau ktang păng, nau tâm lơh păng đah Y-Amasia, hađăch Yuđa, bu hŏ nchih da dê tâm ndrom samƀŭt nau rêh jêng ma lĕ phung hađăch Israel?

¹⁶ Y-Jôas khĭt hăn gŭ ndrel ma phung chô yau păng, jêh ri bu tâp păng ta ƀon Samari ndrel ma phung hađăch Israel. Jêh ri Y-Jêrôbôam, kon păng, gŭ ta sưng hađăch chiă uănh thoi ntrok păng.

¹⁷ Y-Amasia, kon Y-Jôas, hađăch Yuđa, hôm e rêh jât ma prăm năm, jêh Jôas, kon Y-Jôacha, hađăch Israel khĭt.

¹⁸ Mâu di hĕ lĕ kan êng Y-Amasia ƀư, bu hŏ nchih da dê tâm ndrom samƀŭt nau rêh jêng ma phung hađăch Yuđa?

¹⁹ Ta ƀon Yêrusalem, bu tâm nchră tâm rdâng đah hađăch, pôri păng nchuăt du tât ma Lakis. Ƀiălah khân păng prơh bunuyh hăn tĭng hađăch tât ta ƀon Lakis jêh ri nkhĭt hađăch ta nây.

²⁰ Khân păng dơm săk jăn hađăch ta klơ seh, rdeng plơ̆ sĭt ta Yêrusalem, jêh ri bu tâp păng ndrel ma phung chô yau păng ta ƀon Đavit.

²¹ Lĕ rngôch phung Yuđa njêng Y-Asaria, hŏ geh jât ma prao năm, jêng hađăch chiă uănh thoi ntrok hađăch mbơ̆ păng jêng Y-Amasia.

²² Jêh mbơ̆ păng khĭt hăn gŭ ndrel ma phung chô yau păng, hađăch Asaria jêng nơm ndâk njêng tay ƀon Êlat jêh ri mplơ̆ sĭt tay ƀon nây ma phung Yuđa.

Y-Jêrôbôam II ƀư hađăch Israel

²³ Tâm năm rơh jât ma prăm rnôk rô̆ Y-Amasia, kon Y-Jôas, hađăch Yuđa chiă uănh geh Y-Jêrôbôam, kon Y-Jôas, ntơm ƀư hađăch Israel ta ƀon Samari. Păng chiă uănh puăn jât ma puăn năm.

²⁴ Păng ƀư nau mhĭk tanăp măt Brah Yêhôva, mâu ŭch chalơi ôh bơh lĕ nau tih Y-Jêrôbôam, kon bu klâu Y-Nêbat, jêng nau hŏ nsŭk phung Israel ƀư tih.

²⁵ Păng nơm sŏk sĭt n'har bri n'gor Israel ntơm bơh n'har ƀon Hamat tât ma dak mƀŭt Arabah, tĭng nâm nau Yêhôva Brah Ndu Israel hŏ ngơi jêh ma trôm mbung oh mon Păng jêng nơm mbơh lor Y-Yôna, kon Y-Amitai, gŭ ta ƀon Gat-Hêpher.

²⁶ Yorlah Brah Yêhôva saơ jêh nau rêh ni phung Israel jêng nđêh nji ngăn; mâu hôm om du huê nuyh, nđâp lah dĭk bu mâu lah nau kon me, kŏ mâu geh lĕ nơm kơl sâm rklaih phung Israel.

²⁷ Jêh ri Brah Yêhôva mâu mâp lah ôh Păng mra jut lơi amoh phung Israel bơh tâm dâng trôk, pôri Păng hŏ dŏng Y-Jêrôbôam, kon Y-Jôas, gay rklaih khân păng.

²⁸ Mâu di hĕ lĕ kan êng Y-Jêrôbôam, lĕ nau păng ƀư jêh, nau ktang păng, nau păng hŏ lơh jêh ri nau păng sŏk sĭt tay ƀon Damas jêh ri ƀon Hamat tă bơh phung Yuđa mplơ̆ ma phung Israel, bu hŏ nchih da dê tâm ndrom samƀŭt nau rêh jêng ma phung hađăch Israel?

²⁹ Y-Jêrôbôam khĭt hăn gŭ ndrel ma chô yau păng, jêng phung hađăch Israel. Kon hađăch jêng Y-Sakari, gŭ ta sưng hađăch chiă uănh thoi ntrok păng.