II Phung Hađăch 13 - Nau Brah Ndu Ngơi 2023

Y-Jôacha ƀư hađăch Israel

¹ Năm rơh bar jât ma pe rnôk rô̆ Y-Jôas chiă uănh kon bu klâu Y-Ahasia, hađăch Yuđa, pôri Y-Jôacha, kon bu klâu Y-Jêhu, ntơm ƀư hađăch Israel ta Samari, jêh ri păng chiă uănh jât ma pơh năm.

² Păng ƀư nau mhĭk tanăp măt Brah Yêhôva, hăn tĭng ndô̆ nau tih Y-Jêrôbôam kon bu klâu Y-Nêbat, jêng nau nsŭk phung Israel ƀư tih; păng mâu chalơi ôh bơh nau tih nây.

³ Yor ri, Brah Yêhôva ji nuih ma phung Israel, Păng jao khân păng tâm ti Y-Hasael, hađăch Aram, jêh ri tâm ti Y-Ben-Hadat, kon bu klâu Y-Hasael, tâm rnôk rô̆ bar hê phung hađăch nây chiă uănh.

⁴ Ƀiălah dôl Y-Jôacha vơh vơl nau ueh uĭn bơh Brah Yêhôva, Brah Yêhôva iăt păng, yorlah Păng lĕ saơ nau hađăch Aram tŭn jot phung Israel.

⁵ Brah Yêhôva ăn ma phung Israel du huê nơm sâm rklaih gay klaih khân păng du luh bơh ti phung Aram. Yor nây, phung ƀon lan Israel dơi gŭ rêh tâm ngih bok khân păng nâm bu saơm.

⁶ Ƀiălah, khân păng mâu chalơi ôh nau tih ngih Y-Jêrôbôam, jêng nau nsŭk phung Israel ƀư tih; khân păng ăt ƀư nau tih nây, kŏ tât n'gâng mbah brah bu ur Asêrah ăt gŭ tâm Samari.

⁷ Kôranh Brah mâu hôm ôh om moh ndơ ma phung tahan Y-Jôacha, knŏng om ma păng prăm jât nuyh tahan ncho seh, jât bôk ndeh seh, jêh ri du rmưn tahan hăn jâng. Yorlah hađăch Aram ƀư rai jêh ri ƀư nchah rai phung tahan Israel nâm bu ndruyh neh tâm ntŭk mprah ba.

⁸ Mâu di hĕ lĕ kan êng Y-Jôacha, lĕ rngôch nau kan păng hŏ ƀư, jêh ri nau ktang hađăch bu hŏ nchih da dê tâm ndrom samƀŭt nau rêh jêng ma phung hađăch Israel?

⁹ Y-Jôacha khĭt hăn gŭ ndrel ma phung chô yau păng jêh ri bu tâp păng tâm ƀon Samari. Y-Jôas, kon păng, ntơm chiă uănh thoi ntrok păng.

Y-Jôas ƀư hađăch Israel

¹⁰ Năm rơh pe jât ma pơh rnôk rô̆ Y-Jôas, hađăch Yuđa chiă uănh, geh Y-Jôas, kon bu klâu Y-Jôacha, ntơm ƀư hađăch Israel tâm Samari, jêh ri chiă uănh jât ma prao năm.

¹¹ Păng ƀư nau mhĭk tanăp măt Brah Yêhôva, mâu chalơi ôh nau tih Y-Jêrôbôam, kon bu klâu Y-Nêbat, jêng nau nsŭk phung Israel ƀư tih; hađăch ăt hăn tĭng tâm nau tih nây.

¹² Mâu di hĕ lĕ kan êng Y-Jôas, lĕ rngôch kan hađăch hŏ ƀư, jêh ri nau ktang păng tâm lơh đah Y-Amasia, hađăch Yuđa, bu hŏ nchih da dê tâm ndrom samƀŭt nau rêh jêng ma phung hađăch Israel?

¹³ Y-Jôas khĭt hăn gŭ ndrel ma phung chô yau păng, jêh nây Y-Jêrôbôam ntơm gŭ ta sưng thoi ntrok. Bu tâp Y-Jôas tâm Samari ndrel ma phung hađăch Israel.

Y-Êlisê khĭt

¹⁴ Y-Êlisê geh nau ji, jêh ri yorlah nau ji nây păng khĭt. Alor, Y-Jôas, hađăch Israel, hăn trŭnh chop khâl păng, nhĭm tanăp măt păng jêh ri lung nter: “Hơi mbơ̆ gâp! hơi mbơ̆ gâp! Ndeh seh jêh ri phung tahan ncho seh Israel!”

¹⁵ Y-Êlisê lah ma păng: “Sŏk hom na jêh ri hăr văch ta aơ.” Y-Jôas sŏk na jêh ri hăr.

¹⁶ Y-Êlisê lah tay ma hađăch Israel: “Van hom na.” Hađăch van na ro. Jêh nây Y-Êlisê pah ti păng ta ti hađăch

¹⁷ jêh ri: “Pơk hom mpông bloh mpeh luh nar.” Y-Jôas pơk mpông bloh. Y-Êlisê lah tay: “Pănh hom.” Hađăch pănh ro. Nôk nây, Y-Êlisê lah: “Nây jêng hăr ma nau dơi Brah Yêhôva, jêng hăr ma nau dơi đah phung tahan Aram; yorlah may mra tâm lơh đah phung tahan Aram tâm Aphek, kŏ tât may ƀư rai roh lĕ khân păng.”

¹⁸ Y-Êlisê lah đŏng: “Djôt hom lĕ hăr.” Păng djôt ro. Y-Êlisê lah tay đŏng ma hađăch Israel: “Dong hom ta neh ma hăr nây.” Y-Jôas dong pe tơ̆, jêh nây nsrŭng.

¹⁹ Bunuyh Brah Ndu ji nuih ma hađăch jêh ri lah: “Tơlah hađăch hŏ dong prăm mâu lah prao tơ̆, ri mơ may dơi dong tahan Aram kŏ tât may ƀư ăn rai roh khân păng. Ƀiălah aƀaơ aơ, may mra dong bri Aram knŏng pe tơ̆ dơm.”

²⁰ Y-Êlisê khĭt jêh ri bu tâp păng. Tâm rnôk nây, âk phung tahan Môap vay lăp ntŭng phă n'gor tâm nôk bôk năm.

²¹ Du tơ̆ ri, bu dôl djôt leo du huê bunuyh khĭt gay tâp, khân păng saơ du phung tahan âk nây văch sŏk pit, khân păng mƀăr lơi ro bunuyh khĭt nây tâm môch Y-Êlisê jêh nây chalơi păng. Tơlah bunuyh khĭt geh gŏ jêh ta nting Y-Êlisê, bunuyh khĭt dâk rêh tay jêh ri dâk ta klơ jâng păng nơm.

Y-Jôas dơi đah phung Aram

²² Y-Hasael, hađăch Aram, tŭn jot phung Israel tâm bông Y-Jôacha chiă uănh.

²³ Ƀiălah Brah Yêhôva ăt ƀư ueh ma khân păng. Păng yô̆ nđach jêh ri uănh treng khân păng yor nau tâm rnglăp Păng hŏ ƀư jêh đah Y-Abraham, Y-Isăk jêh ri Y-Yakôb. Păng mâu ŭch ƀư rai khân păng, jêh ri n'ho tât ma nar aơ, mâu lĕ mprơh khân păng roh panăp măt Păng.

²⁴ Tơlah hađăch Aram jêng Y-Hasael khĭt, jêh ri kon hađăch jêng Y-Ben-Hadat chiă uănh thoi păng.

²⁵ Y-Jôas, kon bu klâu Y-Jôacha, sŏk sĭt tay tă bơh ti Y-Ben-Hadat, kon bu klâu Y-Hasael, lĕ rngôch ƀon păng lĕ sŏk jêh tă bơh Y-Jôacha mbơ̆ păng tâm nau tâm lơh. Pe tơ̆ Y-Jôas dơi đah păng jêh ri plơ̆ sŏk sĭt tay ƀon phung Israel nây.