II Phung Hađăch 12 - Nau Brah Ndu Ngơi 2023

Y-Jôas chiă uănh Yuđa

¹ Tâm năm rơh pơh rnôk rô̆ hađăch Jêhu chiă uănh, Y-Jôas ntơm jêng hađăch jêh ri chiă uănh puăn jât năm tâm ƀon Yêrusalem. Mê̆ păng amoh H'Sibia, ƀon tơm ta Bêr-Sêba.

² Bơh kôranh ƀư brah Y-Jêhôida ntĭm nti, Y-Jôas ƀư nau di tanăp măt Brah Yêhôva du njăr rêh păng.

³ Ƀiălah, mâu ƀư rai ôh lĕ ntŭk prêh klơ; phung ƀon lan ăt hôm nhhơr mpa ƀư brah jêh ri su n'hôl ƀâu kah ta ntŭk prêh klơ.

Nkra tay ngih brah Yêrusalem.

⁴ Y-Jôas lah ma phung kôranh ƀư brah pô aơ: “Lĕ rngôch prăk bu djôt ƀư ndơ ƀư brah kloh ueh ma ngih Brah Yêhôva, jêng rnoh prăk chuai nau rêh ma ăp nơm chê̆ pi tĭng nâm nau vay nal nôk bu kơp rnoh bunuyh, jêh ri prăk phung ƀon lan nhhơr tâm ngih Brah Yêhôva ma nuih n'hâm lŏng;

⁵ ăn phung kôranh ƀư brah sŏk dơn rnoh prăk nây tă bơh phung nhhơr gay nkra tay lĕ ntŭk bluh sat tâm ngih brah.”

⁶ Ƀiălah kŏ tât năm rơh bar jât ma pe rnôk rô̆ hađăch Jôas, phung kôranh ƀư brah mâu mâp nkra ôh ngih brah.

⁷ Yor nây, hađăch Jôas kuăl kôranh ƀư brah Y-Jêhôida jêh ri phung kôranh ƀư brah êng văch tât, jêh ri ôp: “Mâm khân may mâu ŭch nkra tay lĕ ntŭk bluh sat ngih brah? Pôri aƀaơ, khân may lơi hôm dơn prăk tă bơh phung khân may nhhơr đŏng ôh, ƀiălah jao hom rnoh prăk nây ma phung geh nau kan nkra tay ngih brah.”

⁸ Phung kôranh ƀư brah mâu hôm dơn rnoh prăk tă bơh phung ƀon lan đŏng ôh, jêh ri mâu đŏng khân păng pah nau kan nkra tay ngih brah.

⁹ Kôranh ƀư brah Y-Jêhôida sŏk du mlâm hip, lôk trôm ta klơ ndrŭp, jêh nây dơm ta meng nơng ƀư brah, mpeh pa ma ntŭk lăp ngih Brah Yêhôva. Phung kôranh ƀư brah gak mpông ngih brah djôt leo tâm hip nây da dê lĕ rngôch prăk bu leo nhhơr tâm ngih Brah Yêhôva.

¹⁰ Tơlah bu saơ geh prăk lĕ âk jêh tâm trôm hip, kôranh nchih samƀŭt hađăch ndrel ma kôranh ƀư brah toyh lơn hăn hao sŏk rnoh prăk tâm ngih Brah Yêhôva gay kơp, djôt leo tâm trôm dŭng jêh ri kât tay dŭng nây.

¹¹ Jêh nau nây, khân păng jao rnoh prăk nây hŏ kơp jêh tâm ti ma kôranh uănh kan mât uănh nau nkra ngih Brah Yêhôva. Phung nây sŏk prăk nây ƀơk prăk nkhôm ăn phung trah meh jêh ri phung mon rli,

¹² phung ndâk lŭ jêh ri phung châm lŭ, pah kan nau nkra tay ngih Brah Yêhôva. Khân păng dŏng đŏng prăk nây rvăt tơm si jêh ri lŭ chah gay nkra tay lĕ ntŭk bluh sat ngih Brah Yêhôva, jêh ri moh ntil nau kan nkra tay ngih.

¹³ Ƀiălah bu mâu dŏng ôh prăk hŏ nhhơr jêh tâm ngih Brah Yêhôva, gay ƀư ngan grưng ma prăk, katrei nkăp brai ŭnh kađen, khăl, nŭng, mâu lah lĕ ndơ êng ma mah, ma prăk, dŏng tâm ngih brah Brah Yêhôva.

¹⁴ Yorlah khân păng jao rnoh prăk nây ma phung chiă uănh nau kan gay dŏng tâm nau nkra tay ngih Brah Yêhôva.

¹⁵ Bu mâu sek uănh ôh prăk ma phung bunuyh bu jao jêh ăn khân păng ƀơk phung pah kan, yorlah khân păng ƀư ma nau di.

¹⁶ Bi rnoh prăk ma ndơ ƀư brah chuai nau tih jêh ri ndơ ƀư brah chuai nau tih nây mâu dơi leo ôh lăp tâm ngih Brah Yêhôva; rnoh prăk nây jêng ndơ ma phung kôranh ƀư brah.

Nau chê̆ pi ma Y-Hasael, hađăch Aram

¹⁷ Tâm rnôk nây, hađăch Aram jêng Y-Hasael leo phung tahan rduh lơh đah ƀon Gat jêh ri dơi pit sŏk ƀon aơ. Hađăch plơ̆ rduh lơh đah ƀon Yêrusalem.

¹⁸ Y-Jôas, hađăch Yuđa, sŏk lĕ rngôch ndơ kloh ueh phung hađăch Yuđa jêng Y-Jôsaphat, Y-Jôram jêh ri Y-Ahasia hŏ prăp êng ma nau kloh ueh, ndrel ma lĕ rngôch ndơ kloh ueh jêng ndơ hađăch nơm hŏ nhhơr jêh, jêh ri lĕ rngôch mah tâm jay ngih Brah Yêhôva jêh ri tâm ngih hađăch gay djôt leo chê̆ lĕ ndơ nây ma Y-Hasael, hađăch Aram. Yor ri, Y-Hasael du ngai bơh Yêrusalem.

Y-Jôas khĭt

¹⁹ Mâu di hĕ lĕ kan êng bơh Y-Jôas jêh ri lĕ rngôch kan păng ƀư, bu hŏ nchih da dê tâm ndrom samƀŭt nau rêh jêng ma phung hađăch Yuđa?

²⁰ Bar hê phung oh mon Y-Jôas dâk jêh ri nchră ŭch tâm rdâng đah Y-Jôas jêh ri nkhĭt păng tâm ngih Milô, ta trong hăn trŭnh Sila.

²¹ Bar hê phung oh mon hŏ lơh nkhĭt hađăch jêng Y-Jôsaƀat, kon Y-Simêat, jêh ri Y-Jêhôsaƀat, kon Y-Sômer. Bu tâp păng ndrel ma phung chô yau păng tâm ƀon Đavit. Jêh nây kon hađăch jêng Y-Amasia ntơm chiă uănh thoi ntrok păng.