II Phung Hađăch 11 - Nau Brah Ndu Ngơi 2023

H'Athali chiă uănh phung Yuđa

¹ Tơlah H'Athali, mê̆ Y-Ahasia, saơ kon păng lĕ khĭt jêh, păng dâk nkhĭt lĕ rngôch ngih hađăch.

² Ƀiălah H'Jôsêba, kon bu ur hađăch Jôram jêh ri jêng ruh Y-Ahasia, nhŭp rdu Y-Jôas, kon Y-Ahasia, tă bơh phung kon bu klâu hađăch, bu ŭch nkhĭt, jêh nây rdu pôn păng tâm jrô bê̆ch ndrel ma bunuyh sâm mpu. Pônây bu hŏ pôn Y-Jôas ndâp măt H'Athali, jêh ri bu mâu dơi nkhĭt ôh păng.

³ Y-Jôas gŭ krap ndrel ma H'Jôsêba tâm ngih Brah Yêhôva tâm prao năm, tâm nôk H'Athali chiă uănh tâm n'gor.

Y-Jêhôida tŏ dak ƀâu kah ma Y-Jôas, kon bu klâu hađăch

⁴ Tâm năm rơh pơh, Y-Jêhôida prơh bu hăn njŭn leo phung kôranh du rhiăng bunuyh tahan tâm phung tahan Karit jêh ri phung tahan gak văch tât ma păng tâm ngih Brah Yêhôva. Păng ƀư nau tâm rnglăp đah khân păng, nchâp khân păng sơm ton tâm ngih Brah Yêhôva jêh ri păng nchŏng kon bu klâu hađăch ma khân păng.

⁵ Păng ntĭnh: “Aơ jêng nau ăn khân may mra ƀư: Du kô̆ tâm pe tâm phung khân may tât nau dăp pah kan tâm nar saƀat mra mât gak ngih hađăch,

⁶ du kô̆ tâm pe mra gŭ ta mpông pêr Sur, bi du kô̆ tâm pe êng đŏng mra gŭ ta mpông pêr pakơi phung tahan gak. Khân may mra gak ngih hađăch.

⁷ Hôm bar kô̆ tâm pe tâm phung khân may lôch jêh nau dăp pah kan nar saƀat, mra gŭ dăch hađăch, kâp njrăng ngih Brah Yêhôva.

⁸ Khân may mra gŭ jŭm hađăch, ăp nơm djôt ndơ tâm lơh tâm ti. Mbu nơm văch dăch ma phung tahan, khân may nkhĭt lơi hom. Tơlah hađăch hăn luh hăn lăp, ăn khân may dơi gŭ êp meng păng.”

⁹ Phung kôranh ma du rhiăng bunuyh tahan ƀư tĭng nâm nau ntăm kôranh ƀư brah Y-Jêhôida. Ăp nơm njŭn leo phung tahan păng, geh phung tât nau dăp pah kan tâm ban đŏng phung lôch jêh tât nau dăp pah kan nar saƀat, văch tât ma kôranh ƀư brah Y-Jêhôida.

¹⁰ Kôranh ƀư brah ăn ma phung kôranh ma du rhiăng bunuyh tahan lĕ tak jêh ri khêl hađăch Đavit, ndơ nây gŭ tâm ngih Brah Yêhôva.

¹¹ Phung tahan gak, ăp nơm djôt da dê ndơ tâm lơh tâm ti dâk gŭ văr jŭm hađăch, njŏ tĭng nơng ƀư brah jêh ri ngih brah, ntơm bơh pa ma tât pa chiau ngih brah.

¹² Y-Jêhôida njŭn leo kon bu klâu hađăch luh, ndô đon hađăch jêh ri ăn Nau Tâm Rnglăp ma păng. Khân păng tŏ dak ƀâu kah mbơh nau njêng hađăch ma kon bu klâu hađăch, jêh nây khân păng tap ti jêh ri nter lah: “Hađăch gŭ rêh n'ho ro!”

H'Athali khĭt

¹³ Tơlah tăng nteh nau nter drơu drơu phung tahan gak jêh ri phung ƀon lan, H'Athali hăn mâp đah phung ƀon lan gŭ tâm ngih Brah Yêhôva.

¹⁴ Păng saơ hađăch gŭ dâk êp meh n'gâng prêh tĭng nâm nau vay rƀŭn, geh phung kôranh jêh ri phung bunuyh uh nŭng gŭ dâk êp kêng hađăch. Lĕ rngôch phung ƀon lan tâm n'gor hâk răm da dê ta nklang bâr nŭng huy ngăn. H'Athali nkhêk ao păng ro jêh ri nter: “Nau ƀlêp ƀlêr! Nau ƀlêp ƀlêr ro yơh!”

¹⁵ Ƀiălah kôranh ƀư brah Y-Jêhôida ntĭnh ma phung kôranh tahan: “Ngluh hom păng luh bơh phung tahan! Mbu nơm hăn tĭng păng, nkhĭt lơi ma đao.” Yorlah kôranh ƀư brah hŏ ntĭm jêh: “Lơi nkhĭt ôh păng tâm ngih Brah Yêhôva,”

¹⁶ pôri khân păng nhŭp păng njŭn leo păng tât ta ngih hađăch tĭng trong seh, jêh ri nkhĭt lơi păng ta nây.

Nau Y-Jêhôida tâm rgâl

¹⁷ Y-Jêhôida ƀư nau tâm rnglăp Brah Yêhôva đah hađăch jêh ri đah phung ƀon lan, gay gĭt năl khân păng mra jêng phung ƀon lan ma Brah Yêhôva. Păng ƀư đŏng nau tâm rnglăp ndrăng păng đah phung ƀon lan.

¹⁸ Jêh nây lĕ rngôch ƀon lan tâm n'gor văch tât jêh ri rơih lơi ngih brah Baal. Khân păng nchah lơi lĕ nơng ƀư brah jêh ri rup brah Baal jêng âk rngơl. Hôm Y-Matan, kôranh ƀư brah ma brah Baal, bu nkhĭt lơi khân păng. Jêh nau nây, kôranh ƀư brah dơm phung gak njrăng ngih Brah Yêhôva.

¹⁹ Păng djôt phung kôranh ma du rhiăng bunuyh tahan, phung tahan Karit, phung tahan gak jêh ri lĕ rngôch phung ƀon lan tâm n'gor bri. Khân păng njŭn leo hađăch trŭnh tă bơh ngih Brah Yêhôva, hăn rgăn mpông pêr phung tahan gak gay hăn lăp ma ngih hađăch. Jêh nây Y-Jôas gŭ ta sưng hađăch.

²⁰ Lĕ rngôch phung ƀon lan tâm n'gor hâk răm da dê, jêh ri ƀon gŭ đăp mpăn jêh bu nkhĭt H'Athali ma đao ta ngih hađăch.

²¹ Y-Jôas geh pơh năm tơlah păng ntơm chiă uănh.