II Phung Hađăch 10 - Nau Brah Ndu Ngơi 2023

Nau bu nkhĭt phung kon bu klâu Y-Ahap

¹ Rnôk nây, geh pơh jât nuyh kon bu klâu Y-Ahap gŭ rêh ta ƀon Samari. Y-Jêhu nchih samƀŭt njuăl tât ta Samari ma phung kôranh chiă uănh jêng phung bu ranh ƀon Jesrêel, jêh ri phung nai nti phung kon klâu Y-Ahap. Păng nchih tâm samƀŭt:

² “Yorlah phung kon bu klâu kôranh khân may dôl gŭ ndrel ma khân may, jêh ri yorlah khân may geh âk ndeh seh, seh tâm lơh, jêh ri âk rplay ƀon geh pôih nâp, jêh ri bêng ma ndơ tâm lơh, yor ri tơlah samƀŭt nây njuăl tât ma ti khân may,

³ săch hom tâm phung kon bu klâu kôranh khân may du huê gĭt blau lơn gay dơm păng ta sưng hađăch chiă uănh thoi ntrok mbơ̆ păng. Jêh nây khân may tâm lơh hom yor ngih kôranh khân may.”

⁴ Khân păng klach krit hâu ngăn ngên jêh ri lah: “Aơ, bar hê hađăch nây mâu dơi râl ôh tanăp păng, pôri mâm he dơi tâm rdâng?”

⁵ Phung kôranh tahan mât uănh ƀon jêh ri ngih hađăch, ndrel ma phung bu ranh jêh ri phung nai nti phung kon bu klâu Y-Ahap, njuăl nơm hăn tât gay lah ma Y-Jêhu: “Hên jêng phung oh mon may, hên mra ƀư lĕ nau may ntĭnh. Hên mâu mra njêng du huê hađăch ôh. Ƀư hom tĭng nâm nau may mĭn di.”

⁶ Y-Jêhu nchih đŏng samƀŭt rơh bar ma khân păng, păng nchih tâm samƀŭt: “Tơlah khân may gŭ mpeh ma gâp jêh ri ndrăp kâp tông gâp, ăn khân may koh trô ko sŏk bôk phung kon bu klâu kôranh khân may, jêh nây djôt leo ma gâp ta Jesrêel ta mông aơ.” Nôk nây, pơh jât phung kon hađăch dôl gŭ ndrel ma bunuyh lư n'găr tâm ƀon, jêng phung mât rong khân păng.

⁷ Tơlah dơn samƀŭt nây, khân păng nhŭp ro jêh ri nkhĭt lơi pơh jât phung kon bu klâu Y-Ahap, jêh nây dơm bôk khân păng tâm lĕ bĭ jêh ri njuăl bôk nây ma Y-Jêhu ta ƀon Jesrêel.

⁸ Tơlah nơm mbơh tât jêh ri mbơh ma Y-Jêhu pô aơ: “Khân păng djôt leo jêh bôk phung kon Y-Ahap văch tât jêh.” Păng lah: “Bun hom bôk nây jêng bar mbŭch ta ntŭk lăp mpông ƀon kŏ tât ôi.”

⁹ Tât ang ôi, Y-Jêhu hăn luh, gŭ nsrâng lah ma lĕ rngôch phung ƀon lan: “Khân may jêng sŏng ngăn! Ri, gâp nơm chră nau tâm rdâng jêh ri nkhĭt lơi kôranh gâp. Ƀiălah mbu nkhĭt lĕ rngôch phung aơ?

¹⁰ Pônây, aƀaơ ri, ăn gĭt rah vah ngăn pô aơ: Tâm nau Brah Yêhôva hŏ lah ma ngih Y-Ahap mâu mra geh ôh du nau mâu mra ăn tât tĭng nâm Brah Ndu ngơi; nau nây Brah Yêhôva ngơi jêh di ma ngih Y-Ahap, yorlah Brah Yêhôva ƀư jêh nau Păng hŏ ngơi ma oh mon Păng Y-Êli.”

¹¹ Pônây, Y-Jêhu nkhĭt lĕ rngôch phung hôm e tâm ngih Y-Ahap ta Jesrêel, lĕ rngôch bunuyh lư n'găr, phung mĭt jiăng jêh ri phung kôranh ƀư brah păng, kŏ tât mâu hôm geh du huê hôm klen.

¹² Jêh nau nây, Y-Jêhu hăn trong tât ƀon Samari. Tâm trong hăn, tơlah păng tât Bet-Êket Harôim,

¹³ Y-Jêhu mâp phung oh nâu Y-Ahasia, hađăch Yuđa, ôp: “Mbu moh khân may?” Khân păng plơ̆ lah: “Hên jêng oh nâu Y-Ahasia. Hên hăn khâl phung kon bu klâu hađăch jêh ri hađăch bu ur.”

¹⁴ Y-Jêhu lah: “Nhŭp hom khân păng!” Bu nhŭp rêh jêh ri nkhĭt phung nây ta du ntu brŏng ta ƀon Bet-Êket, lĕ rngôch jêng puăn jât ma bar nuyh, jêh ri păng mâu om klen du huê bunuyh.

¹⁵ Tơlah du luh tă bơh ntŭk nây, Y-Jêhu tâm mâp đah Y-Jêhônadap, kon Y-Rêkap, dôl văch chuă vơt ma păng. Y-Jêhu mbah ma Y-Jêhônadap jêh ri ôp: “Nuih n'hâm may jêng răp jăp ma gâp lĕ, nâm bu nuih n'hâm gâp răp jăp ma may?” Y-Jêhônadap plơ̆ lah: “Nanê̆ ngăn.” Y-Jêhu lah: “Tơlah pônây, yơr hom ti may.” Y-Jêhônadap yơr ti, jêh ri Y-Jêhu ăn păng hao klơ ndeh seh ndrel păng.

¹⁶ Y-Jêhu lah: “Văch hom ndrel gâp jêh ri uănh nau gâp nsrôih nsram ma Brah Yêhôva.” Pôri khân păng hăn ndrel hao ncho klơ ndeh seh Y-Jêhu.

¹⁷ Tơlah hŏ tât ta Samari, Y-Jêhu nkhĭt lĕ rngôch phung hôm klen ma ngih Y-Ahap ta Samari, kŏ tât ƀư rai jêh ngih nây, di nâm nau Brah Yêhôva hŏ lah jêh ma Y-Êli.

Ƀư rai lĕ phung yơk mbah ma brah Baal

¹⁸ Y-Jêhu rgum lĕ rngôch phung ƀon lan jêh ri lah ma khân păng: “Y-Ahap pah kan ma brah Baal djê̆ dơm, Y-Jêhu mra pah kan ma păng âk lơn.

¹⁹ Pôri aƀaơ, kuăl rgum hom ma gâp lĕ rngôch phung nơm mbơh lor brah Baal, lĕ rngôch phung rhŏ brah Baal jêh ri lĕ rngôch phung kôranh ƀư brah păng. Lơi ăn roh du huê, yorlah gâp mra nhhơr du nau ƀư brah toyh ma brah Baal. Mbu nơm mâu tât, mâu mra rêh ôh.” Ƀiălah, Y-Jêhu ƀư nau nây ma nau ndơm gay ƀư rai phung rhŏ ma brah Baal.

²⁰ Y-Jêhu ntĭnh: “Nkra hom du nau tâm rƀŭn ma nau yơk ma brah Baal.” Pôri bu mbơh nau tâm rƀŭn nây.

²¹ Y-Jêhu prơh bunuyh mbơh hăn lam n'gor Israel. Yor ri, lĕ rngôch phung yơk mbah ma brah Baal văch tât da dê, mâu geh ôh du huê mâu văch. Khân păng lăp tâm ngih brah Baal, jêh ri ngih brah nây bêng bunuyh ntơm bôl aơ kŏ tât bôl ri.

²² Y-Jêhu lah ma nơm mât mray ao nau rƀŭn: “Ƀơk hom ao rƀŭn ma lĕ rngôch phung yơk mbah ma brah Baal.” Păng ƀơk ao rƀŭn ma khân păng.

²³ Jêh nau nây, Y-Jêhu lăp tâm ngih brah Baal ndrel ma Y-Jêhônadap, kon bu klâu Y-Rêkap. Păng lah ma phung yơk mbah ma brah Baal pô aơ: “Sek uănh hom ăn nanê̆, uănh ta aơ geh lĕ bunuyh pah kan ma Brah Yêhôva ta nklang khân may mâu lah mâu; ƀiălah knŏng ma phung yơk mbah ma brah Baal nây dơm.”

²⁴ Jêh nây khân păng lăp gay nhhơr mpa ƀư brah jêh ri ndơ ƀư brah gŭch. Ƀiălah Y-Jêhu hŏ dơm pham jât nuyh gŭ kâp dâp padih, jêh ri lah: “Bunuyh ăn klaih du huê tâm phung gâp jao ma ti khân may, nơm nây mra roh nau rêh păng.”

²⁵ Tơlah păng nhhơr ndơ ƀư brah gŭch lôch jêh, Y-Jêhu ntăm ma phung tahan gak jêh ri phung kôranh tahan: “Lăp nkhĭt hom khân păng, lơi ăn du huê klaih ôh!” Pôri phung tahan gak jêh ri phung kôranh tahan sŏk đao nkhĭt khân, mƀăr lơi săk jăn khân păng padih. Jêh nây khân păng hăn lăp tâm trôm jrô ngih brah Baal,

²⁶ ngluh lơi lĕ n'gâng mbah ngih brah Baal jêh ri su lơi păng.

²⁷ Khân păng ƀư rlâm lơi n'gâng mbah brah Baal jêh ri ƀư rai ngih brah Baal, plăch jêng du ntŭk ek chrach tât ma nar aơ.

²⁸ Pônây yơh, Y-Jêhu ƀư rai brah Baal bơh phung Israel.

²⁹ Ƀiălah, Y-Jêhu mâu chalơi ôh nau tih Y-Jêrôbôam, kon bu klâu Y-Nêbat, jêng nau hŏ ƀư ma phung Israel ƀư tih. Y-Jêhu mâu ƀư rai ôh nau yơk mbah rup kon ndrôk mah ta Bêthel jêh ri ta ƀon Dan.

³⁰ Brah Yêhôva lah ma Y-Jêhu: “Yorlah may ƀư ueh jêh tâm nau sŏng srăng tanăp măt Gâp, di nâm lĕ nau Gâp ŭch may ƀư ma ngih Y-Ahap, pôri phung kon sau may mra gŭ ta sưng hađăch Israel tât ta rnôk rơh puăn.”

³¹ Ƀiălah Y-Jêhu mâu njrăng ôh gay chuat hăn tâm nau vay Yêhôva Brah Ndu Israel ma lĕ nuih n'hâm păng. Păng mâu chalơi ôh nau tih Y-Jêrôbôam, jêng nau nsŭk ma phung Israel ƀư tih.

³² Tâm rnôk nây, Brah Yêhôva ntơm koh n'hŭch n'har bri phung Israel. Y-Hasael dơi đah khân păng lam n'gor bri Israel,

³³ pit sŏk n'gor neh mpeh luh nar dak krong Yurdan; jêng lam nkual Gilêat, neh phung ndŭl mpôl Gat, Ruben, jêh ri Manasê, ntơm bơh ƀon Arôer, ta kơh dak krong Arnôn, ma tât lĕ nkual Gilêat jêh ri Basan.

Y-Jêhu Khĭt

³⁴ Mâu di hĕ lĕ kan êng Y-Jêhu, lĕ nau păng ƀư jêh, jêh ri nau ktang păng, bu hŏ nchih da dê jêh tâm ndrom samƀŭt nau rêh phung hađăch Israel?

³⁵ Y-Jêhu khĭt hăn gŭ ndrel ma phung chô yau păng, jêh ri bu tâp păng tâm ƀon Samari. Y-Jôacha, kon bu klâu păng, gŭ ta sưng hađăch chiă uănh thoi ntrok păng.

³⁶ Tâm rnôk Y-Jêhu chiă uănh ma phung Israel ta Samari jêng bar jât ma pham năm.