II Phung Hađăch 1 - Nau Brah Ndu Ngơi 2023

Nau rêh jêng phung hađăch nglĕ dŭt ma phung Israel jêh ri Yuđa ( 1:1 – 17:41 ) Nau ji Y-Ahasia

¹ Jêh Y-Ahap khĭt, phung Môap dâk tâm rdâng đah phung Israel.

² Hađăch Ahasia tŭp tă bơh jrô păng prêh ta klơ tâm ƀon Samari, jêh ri yor ma nây n'ho ma ji. Hađăch prơh phung mbơh hăn jêh ri ntĭnh pô aơ: “Hăn ôp hom ma Baal-Sêbup, brah ƀon Êkron, gĭt lah năl ma gâp mra bah hĕ nau ji aơ?”

³ Ƀiălah tông mpăr Brah Yêhôva lah ma Y-Êli, bunuyh Tisbê: “Dâk hăn hao hom, tâm chuă đah phung bunuyh hađăch Samari, jêh ri lah ma khân păng: ‘Tâm phung Israel mâu hĕ geh Brah Ndu, kŏ tât khân may hăn ôp ma Baal-Sêbup, brah ƀon Êkron?’

⁴ Yor ri, Brah Yêhôva lah kơt aơ: ‘May mâu mra dâk ôh tă bơh sưng may bê̆ch nây, ƀiălah nanê̆ ngăn may mra khĭt.’” Y-Êli tông bâr jêh ri dâk hăn luh.

⁵ Tơlah phung mbơh plơ̆ sĭt ma hađăch Ahasia, hađăch ôp ma khân păng: “Mâm ƀư khân may plơ̆ sĭt?”

⁶ Khân păng plơ̆ lah: “Geh du huê bunuyh hăn hao, tâm mâp đah hên jêh ri lah: ‘Plơ̆ sĭt hom ma hađăch nơm hŏ prơh khân may hăn jêh ri lah ma hađăch pô aơ Brah Yêhôva lah: Tâm phung Israel mâu hĕ geh Brah Ndu kŏ tât may prơh nơm mbơh hăn ôp ma Baal-Sêbup, brah ƀon Êkron? Yor ri, may mâu mra dâk ôh tă bơh sưng may bê̆ch nây, ƀiălah nanê̆ ngăn may mra khĭt.’”

⁷ Hađăch ôp ma khân păng: “Mâm nau bunuyh văch tâm mâp đah khân may jêh ri lah lĕ nau ngơi nây ma khân may?”

⁸ Khân păng plơ̆ lah: “Bunuyh nây nsoh ao rsau jêh ri vân rse bŭt ntâu.” Hađăch lah: “Nĕ jêng Y-Êli yơh, bunuyh Tisbê.”

⁹ Hađăch prơh du huê kôranh ma prăm jât bunuyh tahan djôt leo prăm jât bunuyh tahan păng hăn hao tâm mâp đah Y-Êli. Nôk nây, Y-Êli dôl gŭ ta klơ du n'gơn yôk. Kôranh nây lah ma păng: “Hơi bunuyh Brah Ndu, hađăch lah ma may: ‘Jŭr hom!’”

¹⁰ Ƀiălah Y-Êli plơ̆ lah ma kôranh ma prăm jât nuyh tahan: “Tơlah gâp jêng bunuyh Brah Ndu, dăn ŭnh tă bơh trôk jŭr su may ndrel ma prăm jât bunuyh tahan may!” Ŭnh tă bơh trôk ro su kôranh nây jêh ri prăm jât bunuyh tahan păng.

¹¹ Hađăch Ahasia prơh đŏng du huê kôranh ma prăm jât nuyh tahan êng djôt leo ma prăm jât nuyh tahan hăn hao tâm mâp Y-Êli. Kôranh nây lah ma Y-Êli: “Hơi bunuyh Brah Ndu, hađăch ntĭnh ma may: ‘Jŭr hom gơnh oi!’”

¹² Ƀiălah Y-Êli plơ̆ lah: “Tơlah gâp jêng bunuyh Brah Ndu, dăn ŭnh tă bơh trôk su may ndrel ma prăm jât nuyh tahan may!” Ŭnh Brah Ndu tă bơh trôk ro su kôranh nây jêh ri phung prăm jât bunuyh tahan păng.

¹³ Hađăch prơh đŏng du huê kôranh ma prăm jât nuyh tahan rơh pe djôt leo prăm jât bunuyh tahan păng hăn. Kôranh aơ hăn hao, jêh ri tơlah văch ta ntŭk, chon kômâk panăp Y-Êli, vơh vơl: “Hơi bunuyh Brah Ndu, gâp dăn ma may uănh khlay nau rêh gâp jêh ri nau rêh prăm jât bunuyh aơ, jêng phung oh mon may.

¹⁴ Aơ, ŭnh tă bơh trôk hŏ su jêh bar hê phung kôranh lor ndrel ma phung prăm jât bunuyh tahan khân păng. Ƀiălah aƀaơ ri, dăn ma may uănh khlay nau rêh gâp.”

¹⁵ Tông mpăr Brah Yêhôva lah ma Y-Êli: “Hăn jŭr hom ma bunuyh aơ, lơi klach ma păng ôh.” Pôri, Y-Êli dâk hăn jŭr ndrel ma kôranh nây gay tâm mâp ma hađăch.

¹⁶ Păng lah ma hađăch: “Brah Yêhôva lah kơt aơ: ‘Di lĕ tâm phung Israel mâu geh hĕ Brah Ndu gay ôp, mâm ƀư may prơh phung mbơh hăn ôp ma Baal-Sêbup, brah ƀon Êkron? Yor ri, may mâu mra dâk ôh tă bơh sưng may bê̆ch nây, yorlah may nanê̆ ngăn mra khĭt.’”

Y-Ahasia khĭt

¹⁷ Pônây, Y-Ahasia khĭt di nâm nau Brah Yêhôva hŏ dŏng jêh ma bâr mbung Y-Êli gay mbơh. Yorlah Y-Ahasia mâu geh ôh kon bu klâu, pôri Y-Jôram gŭ ta sưng hađăch chiă uănh thoi ntrok păng ta năm tal bar Y-Jôram, kon Y-Jôsaphat, hađăch Yuđa.

¹⁸ Lĕ kan êng Y-Ahasia hŏ ƀư bu hŏ nchih da dê tâm ndrom samƀŭt nau rêh jêng ma phung hađăch Israel.