II Pêtrôs 3 - Nau Brah Ndu Ngơi 2023

Rnôk nglĕ dŭt jêh ri nau Brah Yêsu Krist plơ̆ văch

¹ Hơi phung gâp rŏng, aơ jêng samƀŭt rơh bar gâp nchih ma khân may. Tâm lĕ bar samƀŭt, gâp nkah gay ŭch rlay tâm khân may geh du nau mĭn sŏng,

² gay nchih lĕ nau mbơh lor tă bơh phung nơm mbơh lor kloh ueh tâm ban đŏng lĕ nau vay Kôranh Brah jêh ri Nơm Tâm Rklaih he tă bơh phung kôranh oh mon nkoch tay.

³ Lor lơn, ăn khân may gĭt nau aơ: Tâm lĕ nar nglĕ dŭt, phung mưch mra văch ma nau ngơi srơh mbơh bir, gŭ rêh tĭng nau kơnh ŭch khân păng nơm.

⁴ Khân păng mra lah: “Mbah ntŭk nau ton ma nau Kôranh Brah plơ̆ văch? Yorlah bơh rnôk phung chô yau he khĭt jêh, lĕ rngôch ndơ ăt kơt ơm nâm bu rnôk ntơm nau rhăk njêng neh ntu.”

⁵ Khân păng ndra ƀư mâu gĭt ma lĕ ndâr trôk tâm mpơl jêh ntơm bơh jŏ jêh tă bơh nau ngơi Brah Ndu, rplay neh njêng ntơm bơh dak jêh ri tă bơh dak;

⁶ tă bơh dak đŏng dĭng neh ntu rnôk nây rai jêh lĕ ma nau dak lip.

⁷ Ƀiălah tă bơh nau ngơi nây đŏng trôk neh aƀaơ aơ prăp ma ŭnh, jêh ri prăp tay ma tât nar phat dôih jêh ri ƀư rai lôch phung mâu ƀư tĭng nau vay.

⁸ Hơi phung gâp rŏng, lơi chuêl ôh ma nau aơ, tanăp Kôranh Brah du nar jêng nâm bu du rbăn năm, du rbăn năm jêng nâm bu du nar.

⁹ Kôranh Brah mâu mbrĕ mbrơi ma nau Păng ton tĭng nâm ƀaƀă mĭn, ƀiălah Păng srôih đah khân may, mâu ŭch ôh du huê khĭt roh, ƀiălah ŭch ma lĕ rngôch rmal nau tih da dê.

¹⁰ Nđâp lah kơt nĕ, nar Kôranh Brah mra tât nâm bu nơm ntŭng, nôk nĕ lĕ ndâr trôk mra roh tâm nau nteh ktang, lĕ ndơ mra lêk hoch tâm ŭnh, neh ntu jêh ri lĕ rngôch kan ndâk klơ nây ŭnh mra sa lĕ.

¹¹ Yorlah lĕ rngôch ndơ nĕ mra rai lôch kơt nĕ, pôri ăn khân may gŭ rêh nau rêh kloh ueh jêh ri blau yơk

¹² dôl dŭh nuih n'hâm kâp gân ma nar Brah Ndu gơnh tât. Nar nĕ ndâr trôk mra geh ŭnh sa lĕ jêh ri roh rai, lĕ rngôch ndơ mra lêk hoch tâm ŭnh!

¹³ Ƀiălah tĭng nâm nau Păng ton, he kâp gân trôk mhe jêh ri neh ntu mhe jêng ntŭk nau sŏng srăng gŭ.

¹⁴ Pôri, hơi phung gâp rŏng, tâm nôk gŭ kâp lĕ nau nĕ, ăn khân may srôih lĕ nau ktang gay ma Păng saơ khân may mâu geh têl khap, mâu geh nau nduyh jêh ri rêh gŭ tâm nau đăp mpăn.

¹⁵ Kah gĭt hom nau Kôranh Brah he srôih jêng yor ma nau tâm rklaih khân may. Nâm bu Y-Pôl, nâu he rŏng ngăn ngên, nchih jêh ma khân may tĭng nâm nau blau mĭn ăn jêh ma păng.

¹⁶ Tâm lĕ rngôch samƀŭt, păng ngơi ma lĕ nau aơ. Lĕ samƀŭt păng nchih geh ƀaƀă nau jêr gĭt rbăng, jêh ri phung rluk jêh ri mâu nâp hŏ nsak nkhăng, tâm ban ma khân păng ƀư jêh ma lĕ ntŭk êng tâm Nau Brah Ndu Ngơi, gay sŏk dơn nau ƀư rai ma khân păng nơm.

¹⁷ Hơi phung gâp rŏng, khân may gĭt jêh lor nau aơ; pôri, njrăng hom, klach lah phung djơh mhĭk nây têk leo khân may tĭng nau vĭ nhhơt khân păng, jêh ri khân may roh nau nâp.

¹⁸ Ƀiălah ăn khân may văch ma toyh tâm nau yô̆ jêh ri nau gĭt rbăng Kôranh Brah jêh ri Nơm Tâm Rklaih he jêng Brah Yêsu Krist. Mbơh sơm dăn nau chrêk rmah jêng ndơ Păng, ntơm aƀaơ ma tât n'ho ro! Amen.