II Pêtrôs 2 - Nau Brah Ndu Ngơi 2023

Phung kôranh nti nklă

¹ Ƀiălah geh jêh âk phung mbơh lor nklă mpơl tâm phung ƀon lan, jêh ri mra geh đŏng kôranh nti nklă tâm khân may; khân păng mra mbơh nkoch ndâp lĕ nau chroh nklă blau hâu ngăn, dun ma Kôranh Brah jêng Nơm tâm chuai jêh khân păn nơm, sŏk dơn nau ƀư rai gơnh ro ma khân păng nơm.

² Âk bunuyh mra hăn tĭng trong nau tih mhĭk khân păng; yorlah khân păng yơh bu ngơi djơh ma trong nau ngăn.

³ Yorlah nuih n'hâm kơnh ir, khân păng dŏng lĕ nau ngơi mƀruh nchơt gay sŏk drăp nkhôm bơh khân may; nau phat dôih prăp ma khân păng ntơm bơh jŏ nar jêh ăt hôm khlay, jêh ri nau rai lôch prăp ma khân păng mâu gŭ rlu.

⁴ Yorlah tơlah Brah Ndu mâu yô̆ an ma phung tông mpăr nôk khân păng ƀư tih, ƀiălah klŭp lơi khân păng tâm ndrung ŭnh jêh ri krŭng prăp tâm ntŭk ngo ngăn gay gŭ kâp tât nar phat dôih;

⁵ tơlah Păng mâu yô̆ an ma neh ntu kăl e, ƀiălah ăn dak lêng toyh ƀư rai neh ntu mâu chroh nây, knŏng prăp Y-Nôê, bunuyh mbơh nkoch ma nau sŏng srăng, jêh ri pơh nuyh êng;

⁶ tơlah Păng tâm rmal lĕ ƀon Sôdôm jêh ri ƀon Gômôrơ, ƀư ăn khân păng jêng mbŭch ŭnh buh gay ƀư leo trong ma phung bunuyh ŭch gŭ rêh mâu geh nau rêh;

⁷ jêh ri tơlah Păng tâm rklaih Y-Lot, jêng nơm sŏng srăng rngot ngăn ma nau gŭ rêh blă blơ phung bunuyh mâu ƀư tĭng nau vay

⁸ (yorlah bunuyh sŏng srăng aơ gŭ rêh ta nklang khân păng, ăp nar huêng sŏng srăng păng klâng rngot tă bơh lĕ nau kan mâu geh nau vay khân păng),

⁹ pôri Kôranh Brah gĭt năl mâm ƀư gay tâm rklaih phung bunuyh blau yơk bơh nau rlong uănh, jêh ri prăp phung kue tâm nau rmal ma tât nar phat dôih,

¹⁰ lor lơn jêng phung bunuyh ƀư tĭng nau kơnh ŭch djơh mhĭk, mưch rmot ma nau chiă uănh. Phung nĕ dăng bôk hâu ngăn jêh ri sưr rlau, mâu klach ôh ngơi djơh tât ma phung geh nau chrêk rmah;

¹¹ tâm nôk phung tông mpăr, nđâp lah geh nau ktang jêh ri nau brah lơn, mâu đŏng geh nau ngơi djơh gay phong ma phung toyh nĕ tanăp Kôranh Brah.

¹² Ƀiălah, tâm ban phung mpô mpa mâu geh nau gĭt rbăng, gŭ rêh tĭng nau nglay săk ŭch, bu deh ma khân păng prăp ăn ma bu nchron nhŭp jêh ri sreh nkhĭt, phung bunuyh nây ngơi djơh tât lĕ nau khân păng mâu gĭt, bu mra ƀư rai lĕ khân păng tâm ban ma mpô mpa,

¹³ jêh ri sŏk dơn prăk nkhôm ma nau mâu di khân păng nơm. Khân păng uănh nau nhêt sa blă blơ dôl nôk nar jêng nau pâl maak. Khân păng jêng mbên ƀơ̆, têl ƀơ̆ ƀơch, hâk răm tâm âk nau ndơm mƀruh dôl gŭ sông sa nhêt ndrel ma khân may;

¹⁴ bar măt khân păng prăp bêng ma nau mĭn văng tĭr, ƀư tih mâu blau dĭl ôh. Khân păng ndơm phung mâu nâp; nau mĭn nuih n'hâm khân păng mơng kơnh rlau ir. Khân păng jêng phung kon khư ma nau rtăp rak!

¹⁵ Khân păng chalơi jêh trong sŏng, pôri khân păng nhhơt trong, hăn tĭng trong Y-Balam, kon bu klâu Y-Bôsôr, jêng nơm ŭch prăk nkhôm ma nau tih mhĭk.

¹⁶ Ƀiălah bunuyh nây geh nau nduyh jêh ma nau ƀư tih păng; du mlâm seh bri mlo blau ngơi nâm bu bunuyh, buay jêh nau brŭt moih nơm mbơh lor nĕ.

¹⁷ Khân păng jêng lĕ n'hor dak mâu geh dak, lĕ ndâr dak ngom phŭt rdu leo; nau ngo klĕng prăp jêh ma khân păng.

¹⁸ Yorlah khân păng ngơi lĕ nau ngơi hưn mâu jêng khlay ôh, dŏng lĕ nau kơnh ŭch nglay săk gay ndơm phung bunuyh mhe klaih bơh ti phung gŭ rêh tâm nau vĭ nhhơt.

¹⁹ Khân păng ton djôt leo nau kon me tât ma bunuyh êng, ƀiălah khân păng nơm ƀư dĭk ma nau djơh mhĭk; yorlah moh ntil dơi lơh du huê bunuyh pôri bunuyh nây plơ̆ jêng dĭk ma ntil nây.

²⁰ Yorlah tơlah ma nau gĭt năl Kôranh Brah jêh ri Nơm Tâm Rklaih he jêng Brah Yêsu Krist, khân păng klaih bơh nau ƀơ̆ ƀơch tâm neh ntu, ƀiălah aƀaơ ri lŏ geh nau têk leo jêh ri plơ̆ lăp tâm dâng lĕ nau nây du tơ̆ đŏng, pôri tâm nau nglĕ dŭt khân păng mra mhĭk lơn rnôk dak bôk.

²¹ Ueh lơn khân păng mâu gĭt trong nau sŏng srăng ueh lơn lĕ gĭt ƀiălah rle ndŭr kơi đah nau vay kloh ueh bu ntĭm nti jêh ma khân păng.

²² Nau tât jêh ma khân păng di đah nau ngơi hôr: “So ler tay ndơ păng hŏ hok jêh” jêh ri “Sŭr hŏ nđŭm jêh, plơ̆ pung tâm nung dak bŏk.”