II Pêtrôs 1 - Nau Brah Ndu Ngơi 2023

Nau mbah jô̆ khâl

¹ Y-Simôn Pêtrôs, oh mon jêh ri kôranh oh mon Brah Yêsu Krist, nchih njuăl ma phung tă bơh nau sŏng srăng Brah Ndu he jêh ri tă bơh Nơm Tâm Rklaih jêng Brah Yêsu Krist, sŏk dơn jêh ndrel du nau chroh khlay nâm bu hên.

² Dăn nau yô̆ jêh ri nau đăp mpăn bêng ler tâm khân may tă bơh nau gĭt năl Brah Ndu jêh ri Brah Krist, Kôranh Brah he!

Nau kuăl jêh ri nau Brah Ndu săch

³ Nau brah Brah Ndu ăn jêh ma he lĕ rngôch nau tât ma nau rêh jêh ri ma nau blau yơk, tă bơh nau gĭt năl Păng jêng Nơm kuăl jêh he ma nau chrêk rmah jêh ri nau ueh Păng nơm.

⁴ Tă bơh nau chrêk rmah jêh ri nau ueh nây, Păng ăn jêh ma he lĕ nau ton toyh jêh ri dŭt khlay, gay tă bơh nĕ khân may dơi der luh bơh nau djơh mhĭk tâm neh ntu tă bơh nau kơnh mhĭk, jêh ri plơ̆ jêng bunuyh geh kô̆ tâm nau ŭch ta klơ trôk.

⁵ Yor nau nĕ ăn ma khân may srôih lĕ nau ktang gay ntop nuih n'hâm ueh ma nau chroh khân may nơm, ntop nau gĭt rbăng ma nau ueh,

⁶ ntop nau di keh ma nau gĭt rbăng, ntop nau srôih ma di keh, ntop nuih n'hâm blau yơk ma nau srôih,

⁷ ntop nau rŏng ndrăng oh nâu ma nuih n'hâm blau yơk, ntop nau rŏng ma nau rŏng ndrăng oh nâu.

⁸ Yorlah tơlah khân may geh lĕ nau aơ jêh ri geh rmeh ler, khân may mâu mra klach khân may nơm gŭ dơm dam mâu lah mâu geh play tâm nau gĭt năl ma Kôranh Brah he jêng Brah Yêsu Krist.

⁹ Yorlah mbu nơm pưt lĕ nau nĕ jêng bunuyh uănh ngai mâu saơ, bunuyh chieh măt, chuêl ma păng nơm geh jêh nau ƀư kloh bơh lĕ nau tih ơm.

¹⁰ Pôri, hơi oh nâu, srôih lơn đŏng gay gĭt năl ma nau kuăl jêh ri nau săch khân may nơm; ƀư nâm nđĕ khân may mâu mra chêh prah;

¹¹ jêh ri tă bơh nĕ, trong lăp tâm ƀon bri hađăch n'ho ro Kôranh Brah jêh ri Nơm Tâm Rklaih he jêng Brah Yêsu Krist mra pơk huy ma khân may.

¹² Yor nĕ gâp mra nkah ƀaƀơ ma khân may ma lĕ nau aơ, nđâp lah khân may hŏ gĭt jêh jêh ri dôl gŭ nâp tâm nau ngăn khân may nơm hŏ dơn jêh.

¹³ Gâp mĭn, ndah jŏ gâp hôm gŭ tâm ngih njưh aơ, ăn gâp nkah gay ma rlay khân may,

¹⁴ yorlah gâp gĭt hŏ tât jêh nôk gâp mra du gơnh bơh ngih njưh aơ, nâm bu Kôranh Brah he jêng Brah Yêsu Krist tâm mpơl jêh ma gâp.

¹⁵ Ƀiălah gâp mra srôih gay ma lah jêh gâp luh hăn, khân may hôm kah gĭt tay ƀaƀơ ma lĕ nau aơ.

Saơ nau chrêk rmah Brah Krist

¹⁶ Nôk nkoch mbơh ma khân may gĭt nau brah jêh ri nau plơ̆ văch Kôranh Brah he jêng Brah Yêsu Krist, hên mâu nsing tâm lĕ nau mbơh nkoch ơm dŭt blau nau nklă, ƀiălah hên saơ jêh nau chrêk rmah Păng ma măt hên nơm.

¹⁷ Yorlah Păng sŏk dơn jêh nau yơk jêh ri nau chrêk rmah bơh Brah Ndu jêng Mbơ̆, tơlah geh bâr ngơi tă bơh Nơm Dŭt Prêh Chrêk Rmah lah ma Păng: “Aơ jêng Kon Gâp rŏng ngăn ngên, tâm Păng Gâp geh nau maak ngăn.”

¹⁸ Hên yơh tăng jêh bâr nây tă bơh trôk dôl hên gŭ ndrel ma Păng ta klơ yôk kloh ueh.

¹⁹ Yor ma nau nây, nau mbơh lor hên geh lơ hô ngơi rah vah lơn. Ăn khân may rkêng tôr iăt ma nau aơ nâm bu ŭnh kađen sol ang tâm ntŭk ngo, kŏ tât mpơl nôk nar jêh ri mănh mbing ôi luh tâm nuih n'hâm khân may.

²⁰ Lor lơn, ăn khân may gĭt jêh mâu geh du ntil nau mbơh lor tâm Nau Brah Ndu Ngơi geh nau rblang tĭng nâm nau mĭn êng tă bơh du huê bunuyh,

²¹ yorlah mâu geh du ntil nau mbơh lor luh tă bơh bunuyh mĭn, ƀiălah Brah Huêng Ueh sŭk nsôr khân păng ngơi nau luh bơh Brah Ndu.