II Nau Rêh Jêng 9 - Nau Brah Ndu Ngơi 2023

Hađăch bu ur bri Sêba tâm mâp đah hađăch Salômôn

¹ Lah hađăch bu ur n'gor Sêba tăng lư n'găr amoh Y-Salômôn, păng văch tât ma ƀon Yêrusalem, sŏk âk nau ngơi hôr gay ŭch rlong uănh hađăch Salômôn, geh âk ngăn phung kâp kơl nsong ndrel ma păng, geh âk seh samô rdeng dak si ƀâu kah jêh ri âk ngăn mah nđâp ma lŭ khlay. Păng tât gay tâm mâp ma hađăch Salômôn jêh ri lah ma hađăch lĕ nau geh tâm nuih n'hâm păng.

² Y-Salômôn plơ̆ sĭt lah lĕ rngôch nau păng ôp mâu geh du ntil nau ôp jêng pôn ndâp ir ma Y-Salômôn kŏ tât mâu dơi rblang ma păng.

³ Hađăch bu ur n'gor Sêba saơ nau blau mĭn hađăch Salômôn, ngih hađăch hŏ ndâk jêh,

⁴ lĕ ndơ sông sa ta klơ sưng sông hađăch, nau dăp ntŭk gŭ ma phung oh mon, nau pah kan ma phung kôranh jêh ri ndơ nsoh n'gut khân păng, phung kôranh djôt kachok jêh ri ndơ nsoh khân păng, nđâp ma ndơ hađăch ƀư brah gŭch nhhơr tâm ngih brah Brah Yêhôva, păng hih rhâl hâu ngăn.

⁵ Păng lah ma hađăch: “Nau gâp tăng bu nkoch tâm n'gor gâp tâm lĕ nau ngơi jêh ri nau blau mĭn may, di ngăn!

⁶ Gâp hŏ mâu iăt nau khân păng kŏ tât gâp văch ta aơ jêh ri hŏ saơ ma măt lĕ nau aơ. Nau bu nkoch ma gâp gĭt ê hŏ dơi du n'gul klong nau blau mĭn toyh may geh; may jêng blau rlau lơn ma lĕ nau bu nkoch ma gâp hŏ tăng.

⁷ Phung gŭ tâm jây may geh nau ueh lăng ngăn! Phung kơl kan hađăch, phung gŭ panăp may ƀaƀơ, jêh ri tăng nau blau mĭn may geh nau ueh lăng ngăn!

⁸ Mât ton ma Yêhôva Brah Ndu may, yorlah Nơm hŏ maak nuih n'hâm n'gân may gŭ ta sưng hađăch gay mât uănh ăn ma Yêhôva Brah Ndu may! Yorlah Brah Ndu may rŏng ma phung ƀon lan Israel, ŭch ăn ma phung ƀon lan aơ dơi nâp ƀaƀơ n'ho ro, ri dĭng Păng hŏ njêng jêh may ƀư hađăch ma khân păng, gay ƀư tĭng nau di jêh ri nau sŏng.”

⁹ Hađăch bu ur ăn ma hađăch pe rbăn prao rhiăng kilô mah, dŭt âk dak si ƀâu kah jêh ri lŭ khlay. Mâu dơi geh ôh dak si ƀâu kah ƀaƀă tâm ban dak si ƀâu kah hađăch bu ur n'gor Sêba ăn jêh ma hađăch Salômôn.

¹⁰ (Phung oh mon Y-Hiram jêh ri phung oh mon Y-Salômôn rdeng mah sǐt tă bơh n'gor Ôphir; khân păng rdeng đŏng tơm si rte jêh ri lŭ khlay.

¹¹ Hađăch sŏk tơm si rte nây ƀư ntung gung ma ngih Brah Yêhôva jêh ri ma ngih hađăch; hađăch sŏk đŏng tơm si nây ƀư gong rêng loih, gong rêng ma phung mprơ. Alor nơh, tâm bri Yuđa, bu ê hŏ saơ geh tâm ban kơt nây.)

¹² Hađăch Salômôn ăn ma hađăch bu ur n'gor Sêba lĕ rngôch ndơ păng ŭch jêh ri nau păng dăn, âk lơn ma lĕ ndơ păng hŏ djôt ăn ma păng. Jêh nau nây, hađăch bu ur jêh ri phung tǐng păng hăn sĭt ma bri khân păng nơm.

Nau ndrŏng Y-Salômôn

¹³ Rnoh mah hađăch Salômôn sŏk tâm ăp năm njing jâk bar jât tân,

¹⁴ mâu hŏ ôh kơp rnoh mah phung tăch drăp jêh ri phung tăch êng djôt tât, nđâp ma rnoh mah jêh ri prăk phung hađăch bri Arabi jêh ri phung kôranh chiă uănh bri djôt ăn ma Y-Salômôn.

¹⁵ Hađăch Salômôn ƀư bar rhiăng mlâm khêl toyh ma mah chiăr n'hơ, ăp khêl bu chiăr pơh kilô mah.

¹⁶ Hađăch ƀư đŏng pe rhiăng mlâm khêl jê̆ ma mah chiăr n'hơ, tâm ăp mlâm dŏng mah klăp pe kilô n'gul. Hađăch dơm lĕ khêl nây tâm ngih Bri Krŏng Liban.

¹⁷ Hađăch ƀư du mlâm sưng hađăch toyh ma la jêh ri mblum păng ma mah chrêk.

¹⁸ Sưng hađăch nây geh prao bak gung hao jêh ri du rnơl chrong jâng ndop ma mah ndơ nây tâm nkrêp đah sưng hađăch, bar đah ntŭk gŭ sưng hađăch geh ndơ rkơl ti, ta meng mpeh ndơ rkơl ti aơ geh bar mlâm rup yau mŭr.

¹⁹ Klơ prao bak gung hao geh đŏng jât ma bar rup yau mŭr dâk ta bar đah nây. Mâu hŏ geh ôh ƀon bri hađăch êng ƀư sưng hađăch tâm ban pônây.

²⁰ Lĕ rngôch ndơ nhêt hađăch Salômôn ƀư đah mah da dê, jêh ri lĕ rngôch ndơ dŏng tâm ngih Bri Krŏng Liban ƀư đah mah kloh da dê. Tâm rnôk hađăch Salômôn, prăk mâu geh nau khlay ôh

²¹ yorlah hađăch geh mpôl kumpăn hăn tât ta Tarsis ndrel ma phung gŭ ƀĭt kumpăn Y-Hiram; tâm pe năm du tơ̆, mpôl kumpăn nây djôt leo sĭt mah, prăk, la rveh, dôk jêh ri brak.

²² Pônây, hađăch Salômôn rlau lơn ma lĕ rngôch phung hađăch ta neh ntu tâm nau ndrŏng jêh ri nau blau mĭn.

²³ Lĕ rngôch hađăch ta neh ntu ŭch joi saơ muh măt Y-Salômôn, gay iăt nau blau mĭn păng tă bơh Brah Ndu hŏ dơm jêh tâm nuih n'hâm păng.

²⁴ Tâm ăp năm, khân păng djôt leo lĕ ndơ ăn ma hađăch nâm bu lĕ ndơ dŏng ƀư ma prăk, ma mah, kho ao, ndơ tâm lơh, dak si ƀâu kah jêh ri seh bri.

²⁵ Hađăch Salômôn geh puăn rbăn ndrung seh, âk ndeh seh, jêh ri du rmưn bar rbăn seh tâm lơh tâm ăp ƀon prăp ndeh, jêh ri êp kêng hađăch tâm ƀon Yêrusalem.

²⁶ Hađăch chiă uănh lĕ rngôch hađăch, ntơm bơh dak krong Me tât ma n'gor bri Philistin, jêh ri n'ho tât ma n'har neh bri Êjipt.

²⁷ Tâm ƀon Yêrusalem, hađăch ƀư prăk jêng mâu khlay ôh nâm bu lŭ chreh, jêh ri tơm si sêdar âk ngăn nâm bu tơm si sikamôr tâm n'gor Sêphêla.

²⁸ Bu djôt leo seh bơh n'gor Êjipt jêh ri bơh âk bri dak êng ăn ma Y-Salômôn.

1 Y-Salômôn Khĭt

²⁹ Lĕ nau kan êng Y-Salômôn ƀư ntơm bơh saơm tât lôch nchih tâm ndrom samƀŭt nơm mbơh lor Y-Nathan, tâm ndrom samƀŭt mbơh lor Y-Ahija, bunuyh Silô, jêh ri tâm ndrom samƀŭt nau tâm saơ Y-Idô, nơm gĭt saơ lor nkoch ma Y-Jêrôbôam, kon bu klâu Y-Nêbat.

³⁰ Y-Salômôn chiă uănh lĕ rngôch phung Israel puăn jât năm tâm Yêrusalem.

³¹ Y-Salômôn khĭt hăn gŭ ndrel ma phung chô yau păng jêh ri bu tâp păng tâm ƀon Đavit, mbơ̆ păng. Kon bu klâu hađăch jêng Y-Rôbôam chiă uănh thoi ntrok păng.