II Nau Rêh Jêng 8 - Nau Brah Ndu Ngơi 2023

Y-Salômôn ndâk njêng tay lĕ ƀon

¹ Ta lôch năm rơh bar jât, nôk Y-Salômôn hŏ ndâk lôch jêh ngih Brah Yêhôva jêh ri ngih hađăch păng nơm,

² Y-Salômôn ndâk njêng tay lĕ ƀon Y-Hiram hŏ nkơ ăn păng, jêh ri ăn phung ƀon lan Israel gŭ ta nây.

³ Y-Salômôn hăn lơh Hamat-Sôba jêh ri dơi păng pit in ƀon nây.

⁴ Hađăch ndâk Tatmôr tâm bri rdah jêh ri ndâk lĕ ƀon ƀư ntŭk prăp drăp khlay tâm n'gor Hamat.

⁵ Păng ndâk đŏng Bet-Hôron Pa Lơ jêh ri ƀon Bet-Hôron Pa Dâng, jêng lĕ ƀon dŭt nâp ngăn, geh mpêr ƀon jêh ri mpông sâng jêh ri geh mâng rnăng nđăng.

⁶ Hađăch ndâk ƀon Balat jêh ri lĕ rngôch ƀon ƀư jay prăp drăp khlay ma Y-Salômôn, lĕ rngôch ƀon prăp ndeh seh, jêh ri seh tâm lơh. Y-Salômôn ƀư lôch jêh lĕ rngôch samƀŭt rup ndâk tâm Yêrusalem, tâm bri Liban jêh ri lam n'gor tâm nau dơi păng.

⁷ Lĕ rngôch phung hôm rêh klen tâm phung ndŭl mpôl Hitit, Amôrit, Pêrisit, Hivit jêh ri Jêbusit mâu jêng di Israel ôh,

⁸ nâm bu ntĭt jêng phung kon sau khân păng hôm e gŭ tâm n'gor, phung nây phung ƀon lan Israel mâu ƀư rai lĕ ôh, Y-Salômôn nhŭp khân păng, ăn jêng dĭk n'ho tât nar aơ.

⁹ Ƀiălah ma phung ƀon lan Israel, Y-Salômôn mâu ŭch sŏk ôh khân păng ƀư dĭk ma kan păng ôh. Khân păng jêng phung tahan, phung kôranh tahan, phung kôranh tahan ƀĭt ndeh seh jêh ri phung tahan ncho seh ma hađăch.

¹⁰ Nây jêng phung kôranh hađăch Salômôn dơm gay kôranh chiă uănh phung pah kan jêng bar rhiăng prăm jât nuyh.

¹¹ Y-Salômôn prơh bu vơt kon bu ur Pharaôn bơh ƀon Đavit hao tât ta ngih hađăch păng hŏ ndâk jêh ma păng, yorlah păng lah pô aơ: “Ur gâp mâu mra gŭ tâm ngih hađăch Y-Đavit, hađăch Israel ôh, yorlah ta ntŭk Hip Nau Tâm Rnglăp Brah Yêhôva gŭ, ntŭk nây jêng kloh ueh.”

¹² Nôk nây, Y-Salômôn nhhơr ndơ ƀư brah gŭch ma Brah Yêhôva ta klơ nơng ƀư brah Brah Yêhôva păng ndâk jêh panăp ndring ngih brah;

¹³ hađăch nhhơr di nâm nau vay ntăm bơh Y-Môis ntĭnh ma nau kan nhhơr ndơ ƀư brah tâm lĕ nar saƀat, nar khay mhe, jêh ri pe nar nau ƀŭn toyh tâm ăp năm jêng nau rƀŭn Piăng Let Mâu Geh Ndrui, nau rƀŭn Lĕ Pơh jêh ri nau rƀŭn Ngih Ndưp.

¹⁴ Tĭng nâm nau mbơ̆ păng Y-Đavit ntĭnh, păng pă kan ma phung kôranh ƀư brah tĭng nâm di tâm ndăch; pă kan phung Lêvi tâm nau kan mât ton Kôranh Brah jêh ri kâp kơl phung kôranh ƀư brah tâm nau kan ăp nar. Hađăch ăt pă kan ma phung mât mray mpông pêr tĭng nâm di tâm ndăch tâm ăp mpông pêr ngih brah, yorlah aơ jêng nau ntĭnh bơh Y-Đavit, bunuyh Brah Ndu.

¹⁵ Moh ntil nau hađăch ntăm jêh tât ma phung kôranh ƀư brah, phung Lêvi, tâm ban đŏng ma jay prăp drăp khlay jêh ri ma lĕ nau kan êng, khân păng mâu dơi chuêl hêng du ntil nau ôh.

¹⁶ Lĕ rngôch nau kan ndâk Y-Salômôn lôch jêh, ntơm bơh nar dăp mbon ngih brah Brah Yêhôva ma tât nar ƀư lôch jêh. Tâm ban pônây, ngih brah ma Brah Yêhôva hŏ ndâk lôch jêh.

¹⁷ Dôl nây, Y-Salômôn hăn tât ma Êsiôn-Gêber jêh ri Êlôt ta kơh dak mƀŭt tâm n'gor Êđôm.

¹⁸ Hađăch Hiram đă phung oh mon păng djôt leo tât ma hađăch Salômôn kumpăn jêh ri phung gŭ ƀĭt kumpăn blau hăn dak mƀŭt. Khân păng hăn ndrel ma phung oh mon Y-Salômôn tât ta Ôphir gay rdeng plơ̆ sĭt klăp lah jât mprăm tân mah ăn ma hađăch Salômôn.