II Nau Rêh Jêng 6 - Nau Brah Ndu Ngơi 2023

Nau mbơh sơm jêh ri nau ueh uĭn ma Y-Salômôn

¹ Nôk nây, Y-Salômôn mbơh sơm: “Hơi Brah Yêhôva, May lah jêh pô aơ May mra gŭ tâm ndâr tŭk mbâl.

² Ƀiălah gâp ndâk jêh du ngih brah jêng du ntŭk gŭ ma May, du ntŭk prăp ma May gŭ n'ho ro.”

³ Jêh nây hađăch rle muh măt păng jêh ri ăn nau ueh uĭn ma lĕ rngôch phung Israel, tâm nôk lĕ rngôch phung Israel tâm rƀŭn dâk nsrâng.

⁴ Păng lah: “Tâm rnê ngăn ma Yêhôva Brah Ndu phung Israel, jêng Nơm hŏ yơr ti ƀư lôch jêh nau ton bơh Păng hŏ ntăm jêh ma Y-Đavit, mbơ̆ gâp. Yorlah Păng lah pô aơ:

⁵ Ntơm bơh nar Gâp njŭn leo phung ƀon lan Gâp ngluh bơh n'gor bri Êjipt, Gâp ê hŏ săch ôh du rplay ƀon tâm phung ndŭl mpôl Israel gay ndâk du mlâm ngih brah ma amoh Gâp gŭ ta nây, jêh ri Gâp ăt mâu hŏ săch lĕ du huê bunuyh jêng kôranh chiă uănh phung ƀon lan Israel Gâp.

⁶ Ƀiălah Gâp hŏ săch jêh Yêrusalem gay dơm amoh Gâp ta nây, jêh ri Gâp hŏ săch jêh Y-Đavit gay chiă uănh phung ƀon lan Israel Gâp.

⁷ Y-Đavit, mbơ̆ gâp, geh nuih n'hâm ŭch ndâk du ngih brah ma amoh Yêhôva Brah Ndu Israel.

⁸ Ƀiălah Brah Yêhôva lah jêh ma Y-Đavit, mbơ̆ gâp, pô aơ: ‘May geh nau mĭn ŭch ndâk du ngih brah ma amoh Gâp, nau ŭch nây jêng ueh ngăn.

⁹ Ƀiălah, may mâu mra ndâk ngih brah nây ôh, ƀiălah kon bu klâu may deh, păng mra ndâk ngih brah ma amoh Gâp.’

¹⁰ Aƀaơ ri, Brah Yêhôva hŏ ƀư jêng ngăn jêh nau Păng ngơi, ntrôl gâp chiă uănh thoi ntrok mbơ̆ gâp jêng Y-Đavit gay chiă uănh phung Israel, di tĭng nâm Brah Yêhôva hŏ ntăm jêh, jêh ri gâp hŏ ndâk du rplay ngih brah ma amoh Yêhôva Brah Ndu phung Israel.

¹¹ Ta nây, gâp hŏ dơm jêh Hip geh nau tâm rnglăp Brah Yêhôva ƀư jêh đah phung ƀon lan Israel.”

Nau Y-Salômôn mbơh sơm nhhơr ngih

¹² Y-Salômôn dâk panăp nơng ƀư brah Brah Yêhôva, tanăp lĕ rngôch phung Israel tâm rƀŭn jêh ri păng yơr ti gay mbơh sơm.

¹³ (Păng hŏ ƀư jêh du mlâm râng ƀư ma kông, jong bar met n'gul, dĭ bar met n'gul, prêh du met n'gul, n'gân ta nklang vâl nhuang; jêh ri păng dâk ta nây, jêh nây chon kômâk tra năp măt phung Israel tâm rƀŭn, păng yơr ti klơ trôk.)

¹⁴ Păng lah: “Ơ Yêhôva Brah Ndu phung Israel! Ta klơ trôk jêh ri tâm neh ntu, mâu geh brah êng tâm ban Kôranh Brah. May djôt prăp nau tâm rnglăp jêh ri nau ueh ma phung oh mon May, jêng phung chuat hăn tanăp măt May ma lĕ nuih n'hâm khân păng.

¹⁵ Ma đah oh mon May jêng Y-Đavit, mbơ̆ gâp; Kôranh Brah djôt prăp nau May hŏ ton ma păng. Nanê̆ ngăn, moh ntil bâr May lah jêh, ma ti May hŏ ƀư lôch jêh di nâm bu hŏ geh nar aơ.

¹⁶ Ơ Yêhôva Brah Ndu phung Israel! May hŏ ton đah oh mon May jêng Y-Đavit, mbơ̆ gâp, pô aơ: ‘Tơlah phung kon sau may njrăng tâm trong khân păng nơm, djôt prăp nau vay Gâp ntăm tâm ban may hŏ ƀư jêh tanăp Gâp, may mâu mra pưt ôh du huê bunuyh gŭ ta sưng hađăch phung Israel.’ Aƀaơ aơ, dăn May djôt prăp nau May hŏ ton.

¹⁷ Yor nây, Ơ Yêhôva Brah Ndu phung Israel! Ăn nau May hŏ ngơi jêh ma Y-Đavit, oh mon May dơi tât di ngăn.

¹⁸ Ƀiălah ngăn lĕ! Brah Ndu geh gŭ ndrel ma bunuyh tâm neh ntu aơ? Ri, trôk, jêh ri lĕ ndâr trôk ta klơ dŭt prêh mâm dĭng mâu dơi tŏng prăp ma Kôranh Brah, rlau lơn ma ngih brah gâp hŏ ndâk jêh ta aơ!

¹⁹ Nđâp tơlah pônây, hơi Yêhôva Brah Ndu gâp! Dăn May treng uănh ma nau mbơh sơm jêh ri nau vơl dăn oh mon May, dăn rkêng tôr iăt nau nter jêh ri nau vah vơl dăn oh mon May kuăl mbơh sơm tanăp măt May.

²⁰ Dăn măt May uănh ma ngih aơ măng nâm nar, jêng ntŭk May hŏ ton jêh mra dơm amoh May ta nây, jêh ri dăn May rkêng tôr iăt nau oh mon May rle mpeh ntŭk nây gay kuăl mbơh sơm.

²¹ Dăn May rkêng tôr iăt nau oh mon May mbơh sơm jêh ri phung ƀon lan Israel May rle ma ntŭk aơ gay mbơh sơm. Bơh ntŭk gŭ ta klơ trôk, tơlah May hŏ tăng jêh, ăn May sŏk dơn, jêh ri sâm yô̆ an.

²² Tơlah geh mbu moh ƀư tih đah nơm chiau meng păng nơm jêh ri bu nchâp păng sơm ton, tơlah păng tât ton săk panăp nơng ƀư brah May tâm ngih brah aơ,

²³ rnôk nây dăn ma May klơ trôk rkêng tôr iăt jêh ri ƀư an. Dăn phat dôih ma phung oh mon May: mplơ̆ plơng ma bunuyh mhĭk tĭng nâm trong păng jêh ri ƀư ma nau tih păng nkhŭt tay klơ bôk păng nơm, kơp nau sŏng srăng ma bunuyh nơm sŏng srăng jêh ri nkhôm ma păng tĭng nâm nau sŏng srăng păng.

²⁴ Tơlah phung ƀon lan Israel May ƀư tih đah May, phung rlăng ƀư roh rai khân păng, jêh ri khân păng plơ̆ sĭt ma May, gĭt năl amoh May jêh ri mbơh sơm vơl dăn panăp May tâm ngih brah aơ,

²⁵ dăn May klơ trôk rkêng tôr iăt, yô̆ an nau tih ma phung ƀon lan Israel May jêh ri njŭn leo khân păng plơ̆ sĭt ma n'gor May ăn jêh ma khân păng tâm ban đŏng ma phung chô yau khân păng.

²⁶ Tơlah lĕ ndâr trôk nchăng nâp, mâu geh dak mih ôh, yorlah phung ƀon lan Israel ƀư tih jêh đah May, tơlah jêh May hŏ phat dôih jêh khân păng, khân păng rle mpeh ta ntŭk aơ gay mbơh sơm, gĭt năl ma amoh Kôranh Brah jêh ri chalơi nau tih khân păng,

²⁷ ta rnôk ri dăn ma May klơ trôk rkêng tôr iăt, yô̆ an ma nau tih phung oh mon May jêh ri ma phung ƀon lan Israel May. Jêh nây tơlah May sâm nti jêh ma khân păng trong di ma khân păng hăn tĭng, dăn ma May ăn dak mih djrah ta klơ neh May ăn jêh ma phung ƀon lan May jêng drăp ndơn.

²⁸ Tơlah tâm n'gor geh nau ji ngot, nau ji tưp, prăng phang, hon sêt-o, krah ndrach mâu lah krah nsăt, mâu lah tơlah phung rlăng nchueng jŭm lĕ mpông ƀon tâm n'gor bri khân păng gŭ, mâu lah geh ăp nau mhĭk mâu lah nau ji,

²⁹ lah geh du huê bunuyh, mâu lah lĕ rngôch phung ƀon lan Israel May, hŏ gĭt năl jêh nau mhĭk jêh ri nau rêh ni păng, jêh ri yơr ti rle mpeh ma ngih aơ mbơh sơm jêh ri dăn moh ntil nau ŭch

³⁰ dăn ma May tă bơh klơ trôk, jêng ntŭk May gŭ, rkêng tôr iăt, jêh ri yô̆ an, mbơh tay ma ăp nơm tĭng nâm nau rêh khân păng, yorlah May hŏ gĭt năl jêh nuih n'hâm khân păng; nanê̆ ngăn, knŏng êng May yơh dơi gĭt năl nuih n'hâm kon bunuyh.

³¹ Kơt nĕ, khân păng mra klach yơk ma May jêh ri hăn tĭng tâm trong May lĕ năng nar khân păng gŭ rêh ta n'gor May hŏ ăn jêh ma chô yau hên.

³² Đah ma phung bu năch, jêng phung mâu jêng phung ƀon lan Israel May ôh, ƀiălah yor amoh dŭt toyh May, jêh ri yor ti brah May yơr jêh, tơlah khân păng văch tât tă bơh n'gor ngai jêh ri rle năp mpeh ngih brah aơ mbơh sơm,

³³ dăn ma May gŭ ta klơ trôk, jêng ntŭk gŭ May, rkêng tôr iăt jêh ri ƀư tĭng nâm lĕ rngôch nau bu năch nây kuăl mbơh sơm ma May, gay ma lĕ rngôch phung bunuyh ƀon lan ta neh ntu dơi gĭt năl amoh May, klach yơk ma May nâm bu phung ƀon lan Israel jêng phung ƀon lan May, jêh ri dơi gĭt năl ngih brah aơ gâp ndâk jêh, bu ntơ tâm amoh May.

³⁴ Tơlah phung ƀon lan May dâk hăn tâm lơh đah phung rlăng khân păng tĭng nâm trong May mra prơh khân păng hăn, tơlah khân păng mbơh sơm ma May, rle mpeh ma ƀon May hŏ săch jêh ri ma ngih brah gâp ndâk jêh ma amoh May,

³⁵ dăn ma May tă bơh klơ trôk rkêng tôr iăt lĕ nau khân păng mbơh sơm jêh ri nau vơl dăn gay ƀư nau di ma khân păng.

³⁶ Tơlah phung ƀon lan Israel ƀư tih đah May (yorlah mâu geh du huê bunuyh mâu ƀư tih), jêh ri May ji nuih jao khân păng ăn ma phung rlăng, nhŭp khân păng ƀư dĭk tâm n'gor ngai mâu lah dăch;

³⁷ tơlah tâm n'gor ƀư bu nă, khân păng nklân rvê tay, rmal nau tih, jêh ri kuăl mbơh sơm ma May pô aơ: ‘Hên hŏ ƀư tih jêh, ƀư âk ntil nau kue jêh ri djơh mhĭk’;

³⁸ tơlah tâm n'gor phung rlăng hŏ njŭn khân păng ƀư dĭk bu, khân păng plơ̆ sĭt ma lĕ nuih n'hâm lĕ nau mĭn ma May jêh ri kuăl mbơh sơm ma May, rle mpeh ma n'gor May hŏ ăn jêh ma phung chô yau khân păng, mpeh ma ƀon May hŏ săch jêh, jêh ri ma ngih brah gâp ndâk jêh ma amoh May,

³⁹ dăn ma May tă bơh klơ trôk, jêng ntŭk May gŭ, rkêng tôr iăt nau khân păng mbơh sơm vơl dăn, koh dŏng khân păng, jêh ri yô̆ an nau tih phung ƀon lan May ƀư tih jêh đah May.

⁴⁰ Ơ Brah Ndu gâp ơi! Aƀaơ ri, dăn ma măt May uănh treng jêh ri rkêng tôr iăt ma nau mbơh sơm tâm ntŭk aơ.

⁴¹ Ơ Yêhôva Brah Ndu! Dâk hom Gay ma Kôranh Brah jêh ri Hip Nau Tâm Rnglăp bêng nau brah May dơi lăp ta ntŭk May rlu! Ơ Yêhôva Brah Ndu! Ăn ma phung kôranh ƀư brah May nsoh nau tâm rklaih, Jêh ri phung blau yơk ma May dơi răm maak Tâm nau ueh May!

⁴² Ơ Yêhôva Brah Ndu! Lơi chalơi ôh nơm May tŏ dak ƀâu kah. Kah gĭt hom ma nau May ueh ma Y-Đavit jêng oh mon May.”