II Nau Rêh Jêng 5 - Nau Brah Ndu Ngơi 2023

¹ Kơt Nây yơh, lĕ rngôch kan Y-Salômôn ƀư ma ngih Brah Yêhôva hŏ lôch jêh. Y-Salômôn djôt leo lĕ ndơ mbơ̆ păng jêng Y-Đavit hŏ prăp êng ma nau kloh ueh, jêng prăk, mah jêh ri lĕ rngôch ndơ dŏng, dơm tâm jay prăp drăp khlay ngih Brah Ndu.

Njŭn leo Hip Nau Tâm Rnglăp lăp ngih brah

² Y-Salômôn kuăl rgum phung bu ranh Israel, kôranh phung ndŭl mpôl jêh ri phung noi deh tâm phung Israel gŭ tâm ƀon Yêrusalem gay tung Hip Nau Tâm Rnglăp Brah Yêhôva tă bơh ƀon Đavit, jêng Siôn, tât ta ngih brah.

³ Lĕ rngôch phung bu klâu Israel rgum ndrel da dê jŭm hađăch tâm nar rƀŭn khlay rơh pơh.

⁴ Lĕ phung kôranh bu ranh Israel hăn tât da dê, phung Lêvi tung Hip Nau Tâm Rnglăp.

⁵ Phung kôranh ƀư brah ma noi deh phung Lêvi tung Hip Nau Tâm Rnglăp hao ma Ngih Bok Nau Tâm Rƀŭn jêh ri djôt lĕ ndơ dŏng kloh ueh tâm Ngih Bok.

⁶ Hađăch Salômôn jêh ri lĕ rngôch phung Israel tâm rƀŭn ndrel ma păng, gŭ dâk panăp Hip Nau Tâm Rnglăp jêh ri nhhơr mpa ƀư brah ma âk râk biăp, ndrôk, kŏ tât mâu hôm dơi kơp.

⁷ Phung kôranh ƀư brah djôt leo Hip Nau Tâm Rnglăp Brah Yêhôva lăp tâm ntŭk prăp ăn Hip ta jrô tâm trôm ngih brah, tâm dâng nting năr chêrubim.

⁸ Bar chêrubim lĭ năr ta klơ ntŭk n'gân Hip Nau Tâm Rnglăp, nkŭm Hip Nau Tâm Rnglăp jêh ri mâng tung.

⁹ Lĕ mâng tung nây jong ngăn, pôri ta panăp jrô tâm trôm, bu knŏng saơ lĕ chiông mâng rho dih ri Hip Nau Tâm Rnglăp, ƀiălah padih bu mâu dơi saơ ndơ nây ôh. Hip Nau Tâm Rnglăp ăt hôm ta nây kŏ tât ta nar aơ.

¹⁰ Tâm trôm Hip Nau Tâm Rnglăp mâu geh ntil ndơ ôh, knŏng bar plơp nau vay Y-Môis dơm ăn tâm nây ta yôk Hôrep, tơlah Brah Yêhôva hŏ ƀư jêh nau tâm rnglăp đah phung ƀon lan Israel dôl khân păng du luh bơh Êjipt.

¹¹ Lĕ rngôch phung kôranh geh măt prăp êng ma nau kloh ueh, mâu pă ôh ma phung mpôl ƀaƀă. Tơlah lĕ kôranh ƀư brah hăn luh jêh bơh ntŭk kloh ueh

¹² jêh ri lĕ mpôl mprơ tâm phung Lêvi, jêng Y-Asap, Y-Hêman, Y-Jêduthun ndrel kon bu klâu jêh ri oh nâu khân păng, nsoh bok ao ma bok mhay rhên, djôt rgu dang nteh ăn huy, gong rêng loih, jêh ri gong rêng gŭ mpeh luh nar nơng ƀư brah ndrel ma du rhiăng bar jât nuyh phung kôranh ƀư brah jêng phung uh nŭng.

¹³ Phung uh nŭng nđâp ma phung mprơ ăn bu iăt khân păng tâm rnglăp tâm ban du huê, mât ton tâm rnê ma Brah Yêhôva. Khân păng mprơ ndrel nđâp ma bâr nŭng, bâr rgu dang nteh ăn huy, jêh ri lĕ gong êng, jêh ri mât ton ma Brah Yêhôva pô aơ: “Yorlah Kôranh Brah jêng ueh, Nau ueh Păng hôm tât ƀaƀơ n'ho ro!” Nôk nây, ngih Brah Yêhôva geh bêng tŭk

¹⁴ kŏ tât phung kôranh ƀư brah mâu dơi dâk pah kan ôh ta nây, yorlah nau chrêk rmah Brah Yêhôva lĕ bêng ma ngih Brah Ndu.