II Nau Rêh Jêng 4 - Nau Brah Ndu Ngơi 2023

Lĕ ndơ dŏng tâm ngih brah

¹ Păng ƀư du nơng ƀư brah ma kông jong jât met, dĭ jât met jêh ri prêh prăm met.

² Păng tŏ du mlâm drŏng prăp dak rup rvang, huy bâr drŏng nây geh prăm met, prêh bar met ma n'gul, jêh ri rval jŭm jât mprăm met.

³ Ta jŭm lam drŏng nây, geh rup lĕ ndrôk, tâm n'gul met geh jât mlâm, bu tŏ ndrel ma drŏng, ƀư bar mbor văr jŭm drŏng.

⁴ Drŏng dak n'gân ta klơ rup jât ma bar rup ndrôk: pe mlâm uănh ma mpeh pa lơ, pe mlâm uănh ma mpeh nhâp nar, pe mlâm uănh ma mpeh pa dâng jêh ri pe mlâm uănh ma mpeh luh nar. Drŏng dak gŭ ta klơ lĕ ndrôk nây, bi săk jăn pakơi khân păng ndôn lăp mpeh tâm trôm da dê.

⁵ Mbâl drŏng geh du nđam, năp bâr drŏng nâm bu năp bâr kachok rup kao si ueh dang; păng dơi dơ prao rmưn prao rbăn lit dak.

⁶ Păng ƀư đŏng jât mlâm thŭng, ăn prăm mlâm pa ma jêh ri prăm mlâm pa chiau prăp rao ta nây ro; bu rao ta nây moh mpa bu prăp ƀư brah gŭch. Bi drŏng dak nây gay ma lĕ rngôch phung kôranh ƀư brah ŭm rao ta nây.

⁷ Păng ƀư jât mlâm jâng kađen ma mah tĭng nâm bu hŏ ntĭnh jêh, jêh nây dơm khân păng tâm ngih brah: prăm mlâm pa ma, prăm mlâm pa chiau.

⁸ Păng ƀư đŏng jât mlâm sưng dơm tâm ngih brah: prăm mlâm pa ma jêh ri prăm mlâm pa chiau. Păng ƀư đŏng du rhiăng mlâm ngan grưng ma mah.

⁹ Păng ƀư du nhuang tâm trôm ma phung kôranh ƀư brah, nhuang vâl huy, lĕ mpông ta bar nhuang vâl bu mblum ma kông da dê.

¹⁰ Păng dơm drŏng dak mpeh pa ma ngih brah, mpeh luh nar tâm rđŭng.

¹¹ Y-Hiram ƀư lĕ glah dơm buh, ndroh jêh ri ngan grưng. Pôri, Y-Hiram ƀư lôch jêh lĕ rngôch nau kan păng hŏ dơn gay ƀư ma Y-Salômôn tâm ngih Brah Ndu geh:

¹² Bar meh n'gâng, bar bôk meh n'gâng rup rval ta klơ bôk dŭt meh n'gâng, bar blah jal nkŭm ma bar rup rval ta klơ bôk meh,

¹³ puăn rhiăng play pom gra nat nkrêp tâm bar blah jal, tâm du blah geh bar mbor play pom gra nat, gay nkŭm ma bar mlâm rval bôk meh;

¹⁴ lĕ jâng thŭng jêh ri thŭng n'gân klơ jâng;

¹⁵ du mlâm drŏng tŏ geh rup jât ma bar mlâm ndrôk nkuăng tâm dâng păng;

¹⁶ lĕ glah dơm buh, ndroh, n'hoi srang jêh ri lĕ rngôch ndơ dŏng. Y-Huram-Abi ƀư ma Y-Salômôn lĕ rngôch ndơ dŏng nây ma kông tho chrêk gay prăp tâm ngih Brah Yêhôva.

¹⁷ Hađăch đă khân păng tŏ lĕ ndơ dŏng aơ tâm ntŭk geh âk neh uk ta neh lâng Yurdan, tâm neh choih, vah vang Sukôt jêh ri Sêrêda.

¹⁸ Hađăch Salômôn ƀư lĕ rngôch ndơ dŏng nây, âk ngăn kŏ tât bu mâu dơi kơp rnoh kông hŏ dŏng ôh.

¹⁹ Y-Salômôn ƀư jêh lĕ rngôch ndơ dŏng tâm ngih Brah Ndu geh: nơng ƀư brah ma mah, lĕ sưng n'gân piăng let nhhơr;

²⁰ lĕ jâng kađen ma mah kloh gay mpoh ŭnh kađen panăp jrô tâm trôm tĭng nâm bu hŏ ntĭnh jêh,

²¹ lĕ kao, kađen jêh ri n'hoi srang ma mah kloh;

²² katrei nkăp brai ŭnh kađen, khăl, ngan jam dơm ma ndơ ƀâu kah jêh ri khăl gŭch ndơ ƀâu kah ƀư đŏng ma mah chrêk; jêh ri ntŭk lăp ngih brah, lĕ rngôch blah mpông tâm trôm lăp tâm Ntŭk Dŭt Kloh Ueh, jêh ri lĕ rngôch blah mpông ngih brah ƀư ma mah da dê.