II Nau Rêh Jêng 36 - Nau Brah Ndu Ngơi 2023

Y-Jêhôahas ƀư hađăch Yuđa, nau bu n'glưh păng jêh ri leo ma Êjipt

¹ Phung ƀon lan tâm bri aơ njêng Y-Jôacha, kon bu klâu Y-Jôsia, ƀư hađăch ntrok mbơ̆ păng ta ƀon Yêrusalem.

² Y-Jêhôahas geh bar jât ma pe năm, păng ntơm ƀư hađăch, jêh ri chiă uănh pe khay ta ƀon Yêrusalem.

³ Hađăch Êjipt n'glưh păng tâm ƀon Yêrusalem, jêh ri đă bri Yuđa chê̆ pi pe rbăn kilô prăk jêh ri pe jât kilô mah.

⁴ Jêh nây, hađăch Êjipt ăn Y-Êliakim oh păng jêng hađăch chiă uănh n'gor Yuđa jêh ri ƀon Yêrusalem, jêh ri rgâl amoh săk păng jêng Y-Jêhôjakim. Hađăch Nêkô nhŭp Y-Jêhôahas, nâu Y-Jêhôjakim, djôt leo sĭt ma n'gor bri Êjipt.

Têk Y-Jêhôjakim ƀư bu nă ma ƀon Babilôn

⁵ Y-Jêhôjakim ntơm jêng hađăch tơlah geh bar jât ma prăm năm, jêh ri chiă uănh jât ma nguay năm ta ƀon Yêrusalem. Păng ƀư nau mhĭk tanăp măt Yêhôva Brah Ndu păng.

⁶ Y-Nêbukatnetsar, hađăch Babilôn, rduh lơh păng, bu kât păng ma rse rvăk kông jêh ri têk leo păng ma ƀon Babilôn.

⁷ Y-Nêbukatnetsar sŏk lĕ ndơ dŏng bơh ngih Brah Yêhôva djôt leo ma ƀon Babilôn, jêh ri dơm ndơ nây tâm ntŭk yơk mbah ta ƀon Babilôn.

⁸ Lĕ kan êng Y-Jêhôjakim ƀư, jêh ri nau mhĭk păng hŏ ƀư jêh, jêh ri lĕ nau kan tât ma păng; lĕ rngôch bu hŏ nchih da dê jêh tâm ndrom samƀŭt Phung Hađăch Israel jêh ri phung Yuđa. Y-Jêhôjakin kon bu klâu păng chiă uănh thoi ntrok păng.

Y-Jêhôjakin chiă uănh pe khay jêh ri jêng bu nă ma ƀon Babilôn

⁹ Y-Jêhôjakin geh jât ma pham năm, tơlah păng ntơm chiă uănh, jêh ri chiă uănh pe khay jât nar ta ƀon Yêrusalem. Păng ƀư nau mhĭk tanăp măt Brah Yêhôva.

¹⁰ Tâm bôk năm, hađăch Nêbukatnetsar đă bu hăn nhŭp Y-Jêhôjakin leo păng ma ƀon Babilôn, nđâp ma lĕ rngôch ndơ khlay bơh ngih Brah Yêhôva, jêh ri ndâk oh păng Y-Sêdêkia jêng hađăch chiă uănh n'gor Yuđa jêh ri ƀon Yêrusalem.

Nau Y-Sêdêkia ƀư hađăch phung Yuđa

¹¹ Y-Sêdêkia geh bar jât ma nguay năm, lah păng ntơm chiă uănh, jêh ri păng chiă uănh jât ma nguay năm ta ƀon Yêrusalem.

¹² Păng ƀư nau mhĭk tanăp măt Yêhôva Brah Ndu păng. Păng mâu ŭch dêh rhêt ôh tanăp Y-Yêrêmi, jêng nơm mbơh lor ntuh bâr Brah Yêhôva gay ntĭm nti păng.

¹³ Păng tâm rdâng đŏng đah hađăch Nêbukatnetsar, jêng nơm hŏ nchâp păng sơm ton ma amoh Brah Ndu. Păng plơ̆ jêng dăng bôk jêh ri kranh nuih n'hâm, mâu ŭch plơ̆ sĭt ma Yêhôva Brah Ndu Israel.

¹⁴ Rlau ma nĕ, lĕ rngôch kôranh chiă uănh ma phung kôranh ƀư brah jêh ri phung ƀon lan lơ hô mâu gŭ răp jăp, ƀư lĕ nau ƀơ̆ ƀơch nâm bu phung ƀon lan chiau meng hŏ ƀư. Khăn păng ƀư ƀơ̆ ngih Brah Yêhôva, ngih Păng hŏ ƀư kloh jêh tâm ƀon Yêrusalem.

¹⁵ Yêhôva Brah Ndu phung chô yau khân păng yorlah geh nau yô̆ ma phung ƀon lan Păng jêh ri ngih brah Păng ri dĭng Păng đă phung mbơh văch ta khân păng ƀaƀơ.

¹⁶ Ƀiălah khân păng mưch ma phung bunuyh Brah Ndu đă hăn, uănh mâu khlay nau ngơi Kôranh Brah jêh ri gơm mưch ma phung nơm mbơh lor Păng, kŏ tât Brah Yêhôva ji nuih lam phung ƀon lan Păng, tât mâu hôm dơi bah ôh.

Bu ƀư rai ƀon Yêrusalem

¹⁷ Yor nây, Brah Yêhôva đă hađăch phung Kaldê lơh khân păng, sŏk đao nkhĭt phung ndăm ta ngih brah kloh ueh khân păng, jêh ri mâu yô̆ ôh, ma phung ndăm mâu lah bu druh, bu ranh mâu lah phung rdja. Brah Yêhôva jao lĕ khân păng tâm ti hađăch phung Kaldê.

¹⁸ Lĕ rngôch ndơ dŏng jê̆ toyh tâm ngih Brah Ndu, lĕ drăp ndơ khlay ngih Brah Yêhôva, drăp ndơ hađăch, jêh ri phung kôranh păng, lĕ rngôch djôt leo ma Babilôn da dê.

¹⁹ Khân păng su ngih Brah Ndu, mbang rlâm mpêr ƀon toyh Yêrusalem, sŏk ŭnh su lĕ ngih hađăch, jêh ri ƀư rai lĕ ƀhiau lĕ ndơ khlay tâm ƀon.

²⁰ Đơ phung hôm klen bu nkhĭt ma đao, bu nhŭp lĕ rngôch djôt leo njêng bu nă tâm bri Babilôn, jêh ri khân păng jêng dĭk ma păng jêh ri ma kon sau păng, kŏ tât rnôk bu ndâk ƀon bri hađăch Persi.

²¹ Tât ngăn ƀoi nau Brah Yêhôva hŏ dŏng jêh bâr mbung Y-Yêrêmi ngơi, neh dơi ntop dơn tay năm saƀat. Tâm lĕ năng nar cha lat jêh, neh dơi rlu kŏ tât rĭng pơh jât năm.

Y-Sirus ăn samƀŭt nau ntrŭnh

²² Tâm năm rơh nguay rnôk rô̆ Y-Sirus hađăch Persi chiă uănh, Brah Yêhôva ŭch ƀư tât di nau ngăn Păng hŏ ngơi jêh ma bâr mbung Y-Yêrêmi, Brah Yêhôva hŏ nsŭk nsôr nuih n'hâm Y-Sirus, hađăch Persi, gay ma păng tơih mbơh lam ƀon bri hađăch păng pô aơ:

²³ “Y-Sirus, hađăch Persi lah pô aơ: ‘Yêhôva Brah Ndu klơ trôk, ăn jêh ma gâp lĕ rngôch ƀon bri hađăch ta neh ntu; Păng yơh đă gâp ndâk ăn ma Păng du rplay ngih brah ta ƀon Yêrusalem, tâm n'gor Yuđa. Pôri tâm phung khân may, mbu moh jêng phung ƀon lan Păng, hăn hao hom ma ƀon Yêrusalem. Dăn Yêhôva Brah Ndu gŭ ndrel ma păng!’”