II Nau Rêh Jêng 34 - Nau Brah Ndu Ngơi 2023

Nau Y-Jôsia ƀư hađăch phung Yuđa

¹ Y-Jôsia geh pham năm, tơlah păng ntơm chiă uănh, jêh ri păng chiă uănh pe jât ma nguay năm ta ƀon Yêrusalem.

² Păng ƀư nau sŏng tanăp măt Brah Yêhôva jêh ri hăn tĭng tâm lĕ trong Y-Đavit, chô yau păng, mâu teng mpeh pa ma mâu lah mpeh pa chiau ôh.

Y-Jôsia ƀư nau tâm rgâl mhe

³ Năm rơh pham rô̆ păng chiă uănh, dôl păng hôm mom, păng ntơm joi Brah Ndu Y-Đavit, che păng. Tâm năm rơh jât ma bar, păng ntơm ƀư kloh n'gor Yuđa jêh ri ƀon Yêrusalem, mƀăr lơi lĕ ntŭk prêh, rup brah Asêrim, rup brah trah jêh ri rup tŏ chiăr.

⁴ Tanăp măt hađăch, bu ƀư rlâm lơi lĕ nơng ƀư brah Baal, jêh ri kăl lơi lĕ nơng ƀư brah su ndơ ƀâu kah gŭ ta klơ nơng brah Baal nây; jêh ri chah hăch rhên lĕ rup brah Asêrim, rup ndah, jêh ri rup bu tŏ chiăr; păng jot rchiăt tât môi rup nây, jêh ri sui ta klơ môch phung ƀư brah ma rup nây.

⁵ Tâm ban lĕ păng su nting phung kôranh ƀư brah ta klơ nơng phung brah nây, jêh ri ƀư kloh n'gor Yuđa jêh ri ƀon Yêrusalem.

⁶ Tâm ăp ƀon Manasê, ƀon Êphraim, jêh ri ƀon Simêôn jêh ri tât ta nkual Naptali, jêh ri lam văr jŭm ntŭk lĕ rai jêh,

⁷ păng ƀư rlâm lĕ nơng ƀư brah jêh ri jot rchiăt tât môi lĕ rngôch rup brah Asêrim, rup brah trah, jêh ri rup tŏ chiăr, kăl nchôt lĕ rngôch nơng ƀư brah tâm lam bri Israel. Jêh ri păng plơ̆ sĭt ma ƀon Yêrusalem.

⁸ Tâm năm rơh jât ma pham rnôk rô̆ păng chiă uănh, lah păng hŏ ƀư kloh jêh bri dak jêh ri ngih brah, păng đă Y-Saphan (kon bu klâu Y-Asalia), Y-Maseya (kôranh chiă uănh ƀon), jêh ri Y-Jôa (kon bu klâu Y-Jôahas, kôranh kâp nchih lĕ nau tât) nkra tay ngih Brah Yêhôva Brah Ndu.

⁹ Phung nây hăn tâm mâp ma Y-Hilkia, kôranh ƀư brah toyh lơn, jêh ri jao prăk bu nhhơr jêh ma ngih Brah Ndu ma păng, jêng prăk phung Lêvi mât mray mpông ngih brah, hŏ dơn jêh tă bơh ti phung Manasê, phung Êphraim, jêh ri tă bơh lĕ rngôch phung Israel hôm klen, bơh lĕ rngôch phung Yuđa, phung Benjamin jêh ri bơh phung gŭ tâm ƀon Yêrusalem.

¹⁰ Khân păng jao prăk nây ma phung mât uănh nau kan tâm ngih Brah Yêhôva. Khân păng pă ăn lĕ rngôch phung nkra tay ngih brah ăn mhe;

¹¹ jêng lah jao ma phung trah si, phung ndâk lŭ gay rvăt lŭ trah jêh ri tơm si prăp ƀư ryong rda ma lĕ ngih jêng ndơ ngih brah phung hađăch Yuđa lĕ chalơi rlâm rai jêh.

¹² Lĕ phung pah kan nây răp jăp da dê. Phung Lêvi chiă uănh phung pah kan nây geh Y-Jahat jêh ri Y-Ôbadia, jêng noi deh Y-Mêrari; Y-Sakari jêh ri Y-Mêsulam jêng noi deh Y-Kôhat nđâp ma phung Lêvi êng, lĕ rngôch blau ăp ntil ndơ kreh mpât mprơ da dê.

¹³ Khân păng uănh đŏng phung tung mbăk jêh ri chiă uănh đơ phung pah kan ƀư ăp nau kan. Tâm phung Lêvi, geh phung jêng kôranh nchih samƀŭt, phung kôranh jêh ri phung chiă uănh mpông pêr.

Dơi joi saơ tay ndrom samƀŭt nau vay

¹⁴ Tâm nôk bu njŭn prăk hŏ nhhơr jêh tâm ngih brah Brah Yêhôva, pôri Y-Hilkia kôranh ƀư brah saơ ndrom samƀŭt nau vay Brah Yêhôva yor tă bơh Y-Môis ăn jêh.

¹⁵ Y-Hilkia lah ma Y-Saphan kôranh nchih samƀŭt: “Gâp joi saơ jêh ndrom samƀŭt nau vay tâm ngih Brah Yêhôva.” Jêh ri Y-Hilkia jao ndrom samƀŭt nây ma Y-Saphan.

¹⁶ Y-Saphan djôt leo ndrom samƀŭt nây ăn ma hađăch, jêh ri lah: “Phung oh mon may dôl ƀư lĕ nau kan hŏ jao.

¹⁷ Khân păng hŏ sŏk jêh prăk tâm ngih Brah Yêhôva jêh ri jao prăk nây ta ti phung kôranh uănh kan jêh ri phung pah kan.”

¹⁸ Kôranh nchih samƀŭt Y-Saphan mbơh ma hađăch: “Y-Hilkia, kôranh ƀư brah geh ăn ma gâp du ndrom samƀŭt.” Y-Saphan răk samƀŭt nây tanăp hađăch.

¹⁹ Lah hađăch tăng jêh nau ngơi tâm ndrom samƀŭt nau vay nây, păng nkhêk ro bok ao păng.

²⁰ Hađăch ntrŭnh nau ntăm ma Y-Hilkia, ma Y-Ahikam, kon bu klâu Y-Saphan, Y-Apdôn kon bu klâu Y-Mika, Y-Saphan kôranh nchih samƀŭt jêh ri Y-Asaya oh mon hađăch:

²¹ “Yor ma gâp jêh ri yor ma phung Israel hôm e klen jêh ri phung Yuđa, hăn ôp hom Brah Yêhôva ma lĕ rngôch nau ngơi tâm ndrom samƀŭt aơ hŏ joi saơ jêh. Yor nau Brah Yêhôva ji nuih nkhŭt jêh ta klơ he dŭt toyh ngăn, yor tă bơh phung che he mâu ŭch djôt prăp ôh nau Brah Yêhôva ntăm, jêh ri mâu tĭng kơt lĕ ntil nau hŏ nchih jêh tâm ndrom samƀŭt aơ.”

Nơm mbơh lor bu ur H'Hulda

²² Y-Hilkia jêh ri lĕ phung hađăch hŏ đă, hăn mâp ma H'Hulda nơm mbơh lor bu ur jêng ur Y-Salum, nơm chiă mât jrô prăp bok ao, kon bu klâu Y-Tôkhat, sau Y-Hasra. Bu ur nây gŭ tâm nkual mrô bar ta ƀon Yêrusalem. Khân păng ngơi đah bu ur nây tĭng nâm nau hađăch hŏ lah jêh.

²³ Bu ur nây lah ma khân păng: “Nau Yêhôva Brah Ndu Israel, lah: Mbơh hom ma nơm hŏ đă jêh khân may văch tât ma gâp.

²⁴ Brah Yêhôva lah: Aơ, ‘Gâp mra ăn tât nau mhĭk ma ntŭk aơ jêh ri ma phung ƀon lan gŭ ta ntŭk aơ tĭng nâm lĕ rngôch nau bu rtăp rak hŏ nchih jêh tâm ndrom samƀŭt bu hŏ răk jêh tanăp măt hađăch Yuđa.

²⁵ Yorlah khân păng chalơi jêh Gâp, gŭch ndơ ƀâu kah ăn ma phung brah êng, sŏk lĕ rngôch kan ti khân păng ƀư gay nsônh nau Gâp ji nuih, yor ri yơh nau ji nuih Gâp mra nkhŭt ta ntŭk aơ, mâu dơi rhân ôh.’

²⁶ Bi ma hađăch Yuđa, nơm hŏ đă jêh khân may hăn ôp ma Brah Yêhôva, ăn khân may mbơh ma păng pônây, aơ jêng nau ngơi Yêhôva Brah Ndu phung Israel lah tât ma lĕ rngôch nau may hŏ tăng:

²⁷ ‘Tơlah may tăng jêh nau Gâp lah tâm rdâng đah ntŭk aơ jêh ri phung ƀon lan gŭ tâm ntŭk aơ, pôri may geh nuih n'hâm rdơ̆ rbăn, ntrŭnh dêh rhêt tanăp măt Gâp, nkhêk ao jêh ri nhhiăng nhĭm tanăp măt Gâp, yor ri Gâp hŏ tăng jêh nau may; Brah Yêhôva lah kơt nây.

²⁸ Aơ, Gâp mra ăn ma may rgum ndrel ma phung chô yau may, may mra khĭt tâm nau đăp mpăn jêh ri măt may mâu mra saơ ôh lĕ rngôch nau mhĭk Gâp mra ăn tât ma ntŭk aơ jêh ri ma phung gŭ tâm ntŭk aơ.’” Jêh ri khân păng plơ̆ mbơh tay lĕ nau ngơi ma hađăch.

Ndâk đŏng nau tâm rnglăp

²⁹ Hađăch đă bu hăn tâm rgum lĕ rngôch phung kôranh bu ranh Yuđa jêh ri ƀon Yêrusalem.

³⁰ Jêh nây hađăch ndrel ma lĕ rngôch phung Yuđa, jêh ri lĕ rngôch phung gŭ tâm ƀon Yêrusalem, phung kôranh ƀư brah, phung Lêvi, jêh ri lĕ rngôch phung ƀon lan ntơm bơh toyh tât jê̆, hăn hao ngih Brah Yêhôva. Păng răk ăn khân păng tăng lĕ rngôch nau ngơi tâm ndrom samƀŭt nau tâm rnglăp bu joi saơ jêh tâm ngih Brah Yêhôva.

³¹ Hađăch dâk tâm knưl păng jêh ri ƀư nau tâm rnglăp tanăp Brah Yêhôva, ton chuat tĭng Brah Yêhôva ma lĕ nuih n'hâm, lĕ nau mĭn djôt prăp lĕ nau vay Păng ntăm, nau Păng mbơh, jêh ri nau vay Păng dăp, gay ƀư tĭng nau ngơi ma tâm rnglăp hŏ nchih jêh tâm ndrom samƀŭt aơ.

³² Păng ntăm ma phung gŭ ta ƀon Yêrusalem jêh ri Benjamin tĭng nau tâm rnglăp nây. Pôri, phung ƀon lan gŭ ta ƀon Yêrusalem ƀư tĭng nâm nau tâm rnglăp bơh Brah Ndu, jêng Brah Ndu phung chô yau khân păng.

³³ Y-Jôsia sŏk mƀăr lĕ rngôch ndơ ƀơ̆ ƀơch tă bơh bri dak Israel jêh ri đă lĕ rngôch phung gŭ tâm bri Israel pah kan ma Yêhôva Brah Ndu khân păng. Du bông Y-Jôsia gŭ rêh, khân păng tĭng mro Yêhôva Brah Ndu phung chô yau khân păng, mâu ntlơi Păng ôh.