II Nau Rêh Jêng 32 - Nau Brah Ndu Ngơi 2023

Phung tahan Y-Sênakêrip nchueng lơh ƀon Yêrusalem

¹ Lôch kan aơ jêh ri nau răp jăp Y-Hêsêkia ƀư nây, geh Y-Sênakêrip hađăch Asiri văch tât lăp n'gor Yuđa, nchueng ŭch tâm lơh đah ƀon geh pôih tahan jêh ri đă bu ƀư rai ƀon nây.

² Lah Y-Hêsêkia saơ Y-Sênakêrip hŏ tât jêh ri ndrăp ŭch lơh ƀon Yêrusalem,

³ păng tâm chră đah phung kôranh jêh ri đah phung kôranh tahan janh ktang gay bât lơi tu dak ta mpâr ƀon. Khân păng kơl păng da dê.

⁴ Bunuyh ƀon lan văch rgum âk râk, bât nkrŭl lĕ rngôch dak n'hor jêh ri n'hong dak hoch tâm nklang n'gor bri. Khân păng tâm ngơi ndrăng nơm: “Mâm ƀư he ăn hađăch Asiri tât ta aơ jêh ri dơi saơ dak âk?”

⁵ Păng ƀư ngăn yơh, ndâk tay lĕ rngôch mpêr ƀon hŏ mplŭng jêh, jêh ri ndâk ngih tŭm klơ ăn prêh đê̆, jêh ri ndâk đŏng mpêr êng mpeh padih. Păng ƀư dŭt nâp Milô tâm ƀon Đavit, jêh ri păng ƀư âk tak keng jêh ri khêl.

⁶ Păng dơm phung kôranh chiă uănh tahan, jêh ri rgum khân păng tât ta jâng gung toyh dăch mpông ƀon toyh, jêh ri ngơi n'hao nuih ma khân păng:

⁷ “Ƀư ktang hom jêh ri nâp nuih n'hâm! Lơi ta klach, lơi ta krit kir tanăp măt hađăch Asiri jêh ri mpôl phung tahan âk râk tĭng păng, yorlah Nơm gŭ ndrel he dơi lơn đah nơm gŭ ndrel păng;

⁸ Păng knŏng geh ti nglay săk; bi he geh Yêhôva Brah Ndu gŭ ndrel he gay kâp kơl, jêh ri sâm tâm lơh ăn ma he.” Phung ƀon lan geh nau n'hao nuih yor bơh nau ngơi Y-Hêsêkia, hađăch Yuđa.

⁹ Jêh nau nây, Y-Sênakêrip, hađăch Asiri, ndrel ma lĕ rngôch phung tahan păng hôm nchueng ƀon Lakis. Păng njuăl phung oh mon păng mâp Y-Hêsêkia jêh ri phung Yuđa gŭ ta Yêrusalem jêh ri lah:

¹⁰ “Y-Sênakêrip, hađăch Asiri, lah pô aơ: Bu hŏ nchueng jêh ƀon Yêrusalem, moh nau khân may rnơm nsing dĭng ma khân may gŭ ta nây mro?

¹¹ Mâu di hĕ Y-Hêsêkia ngơi pô aơ: ‘Yêhôva Brah Ndu phung he mra rklaih he tă bơh ti hađăch Asiri’, nây jêng nau păng ngơi mƀruh ma khân may gay ma khân may khĭt ji ngot-ji hir ƀơh?

¹² Mâu hĕ di Y-Hêsêkia aơ yơh lĕ sŏk mƀăr lơi jêh ta lĕ ntŭk prêh jêh ri nơng ƀư brah ma Păng jêh nây ntĭnh phung ƀon lan Yuđa jêh ri Yêrusalem pô aơ: ‘Khân may knŏng yơk mbah panăp du mlâm nơng jêh ri knŏng su ndơ ƀâu kah ta klơ nơng nây dơm ƀơh’?

¹³ Khân may mâu hŏ gĭt hĕ gâp jêh ri chô yau gâp hŏ tă ƀư ma lĕ phung ƀon lan tâm lĕ bri? Lĕ brah phung ndŭl mpôl bri nây geh nau dơi rklaih bri dak khân păng bơh ti gâp lĕ?

¹⁴ Tâm lĕ rngôch brah tâm phung ndŭl mpôl nây, phung chô yau gâp hŏ ƀư rai lĕ jêh, geh đŏng brah dơi rklaih phung ƀon lan khân păng bơh ti gâp? Lah ndrĭ brah khân may klăp lah dơi rklaih khân may bơh ti gâp bơh?

¹⁵ Yor ri aƀaơ, lơi ăn Y-Hêsêkia mplư ndơm jêh ri mƀruh khân may kơt nĕ. Lơi ta khân may iăt nau păng, yorlah tâm lĕ rngôch ndŭl mpôl bunuyh mâu hôm geh brah mâu lah ƀon bri hađăch êng dơi rklaih phung ƀon lan păng bơh ti gâp mâu lah bơh ti chô yau gâp, mâm dĭng Brah Ndu khân may dơi tâm rklaih khân may bơh ti gâp!”

¹⁶ Phung oh mon Y-Sênakêrip ăt hôm ngơi djơh tât ma Yêhôva Brah Ndu, jêh ri ngơi djơh đah Y-Hêsêkia jêng oh mon Păng.

¹⁷ Y-Sênakêrip nchih âk samƀŭt mưch ma Yêhôva Brah Ndu Israel jêh ri ngơi mhĭk đah Păng pô aơ: “Ăp brah tâm lĕ rngôch bri mâu hŏ dơi tâm rklaih ôh phung ƀon lan khân păng bơh ti gâp, tâm ban lĕ brah Y-Hêsêkia mâu dơi ôh tâm rklaih phung ƀon lan păng bơh ti gâp.”

¹⁸ Khân păng troh nter ma nau ngơi Yuđa ăn ma phung ƀon lan Yêrusalem gŭ ta klơ mpêr ƀon tăng, ƀư ăn khân păng klach gay pit sŏk ƀon.

¹⁹ Khân păng lah Brah Ndu ƀon Yêrusalem nâm bu brah phung ƀon lan ta neh ntu, jêng kan ma ti bunuyh ƀư.

Phung tahan Y-Sênakêrip khĭt

²⁰ Hađăch Hêsêkia jêh ri nơm mbơh lor Y-Êsai, kon bu klâu Y-Amôt mbơh sơm yor nau nây jêh ri vơl nđor ma klơ trôk.

²¹ Brah Yêhôva njuăl du huê tông mpăr nkhĭt lơi lĕ rngôch phung tahan janh ktang, phung kôranh tahan jêh ri phung kôranh tâm pôih tahan hađăch Asiri. Păng plơ̆ sĭt ma n'gor păng nơm ma muh măt prêng. Lah păng lăp tâm ngih brah păng, geh tâm phung kon bu klâu păng nơm sreh păng ta nây ma đao.

²² Pôri, Brah Yêhôva tâm rklaih Y-Hêsêkia jêh ri phung gŭ tâm ƀon Yêrusalem tă bơh ti Y-Sênakêrip, hađăch Asiri, jêh ri rklaih bơh lĕ ti phung rlăng; Păng ăn nau đăp mpăn văr jŭm khân păng.

²³ Geh âk bunuyh djôt leo ndơ nhhơr ma Brah Yêhôva ta Yêrusalem, jêh ri âk ndơ khlay ăn ma Y-Hêsêkia, hađăch Yuđa. Ntơm bơh nôk nây tât ô klak, âk bri dak yơk ma păng.

Nau Y-Hêsêkia ji jêh ri dơi bah

²⁴ Tâm lĕ nar nây Y-Hêsêkia ji dăch khĭt. Păng mbơh sơm ma Brah Yêhôva, jêh ri Brah Yêhôva plơ̆ lah jêh ri ăn ma păng du nau tâm mbên.

²⁵ Ƀiălah Y-Hêsêkia mâu kah gĭt lah ueh nau Brah Yêhôva ƀư jêh ma păng, yorlah nuih n'hâm păng sưr yor nây Kôranh Brah ji nuih tât ma păng nđâp ma phung Yuđa jêh ri Yêrusalem.

²⁶ Ƀiălah, Y-Hêsêkia jêh ri phung ƀon lan gŭ ta Yêrusalem ntrŭnh săk ma nau dêh rhêt, mâu hôm sưr, pôri nau Brah Yêhôva ji nuih mâu tât ôh rô̆ Y-Hêsêkia.

Nau ndrŏng jêh ri nau geh jêng Y-Hêsêkia

²⁷ Y-Hêsêkia jêng dŭt ndrŏng jêh ri nau bu yơk toyh ngăn. Păng ndâk ma păng nơm lĕ jay prăp prăk, mah, lŭ khlay, dak si ƀâu kah, khêl, jêh ri lĕ ndơ dŏng geh rnoh khlay.

²⁸ Păng ƀư jay tuh ba, jay ăn ndrănh jêh ri dak ngi ôlive jêh ri ndrung krŭng ăp ntil mpô mpa, phung biăp, jêh ri ndrôk.

²⁹ Păng ăt ndâk âk play ƀon, mât rong âk biăp jêh ri ndrôk, yorlah Brah Ndu ăn ma păng geh âk drăp ndơ.

³⁰ Y-Hêsêkia yơh bât n'hor dak Gihôn, jêh ri n'hoch păng hoch mŭr tâm dâng neh mpeh nhâp nar ƀon Đavit. Tâm lĕ kan Y-Hêsêkia ƀư dơi chăt jêng da dê.

³¹ Ƀiălah tơlah phung mbơh hađăch Babilôn prơh hăn tât gay ôp ma nau mbên khlay hŏ geh jêh tâm n'gor păng, pôri Brah Ndu du, ƀât lât gay ŭch rlong uănh păng, jêh ri ŭch gĭt lĕ rngôch ntil nau tâm nuih n'hâm păng.

Nau Y-Hêsêkia Khĭt

³² Lĕ nau kan êng Y-Hêsêkia ƀư jêh ri lĕ kan ueh păng hŏ ƀư jêh, bu hŏ nchih da dê tâm ndrom samƀŭt phung Hađăch Yuđa jêh ri Israel tă bơh nau tâm saơ kôranh nơm mbơh lor Y-Êsai, kon bu klâu Y-Amôt.

³³ Y-Hêsêkia khĭt hăn gŭ ndrel ma phung chô yau păng, jêh ri bu tâp păng tâm môch klơ dor yôk ma kon sau Y-Đavit. Lĕ rngôch phung Yuđa jêh ri phung gŭ tâm ƀon Yêrusalem tâm mpơl nau yơk ma păng da dê tâm nar păng khĭt. Y-Manasê, kon bu klâu păng, chiă uănh thoi ntrok păng.