II Nau Rêh Jêng 31 - Nau Brah Ndu Ngơi 2023

Phung ƀon lan mƀăr lơi rup brah

¹ Lah lĕ nau kan nây lôch jêh, lĕ rngôch phung Israel geh măt ta ƀon Yêrusalem dâk hăn ăp ƀon tâm n'gor Yuđa, mbang nchah lơi lĕ n'gâng mbah, kăl lơi lĕ rup brah Asêra, ƀư rai lĕ ntŭk prêh klơ jêh ri lĕ nơng ƀư brah tâm lam n'gor Yuđa, Benjamin, Êphraim, jêh ri Manasê, kŏ tât khân păng hŏ ƀư rai lĕ ƀhiau. Jêh nây, lĕ rngôch phung ƀon lan Israel plơ̆ sĭt ma ƀon nơm, ntŭk drăp ndơn khân păng nơm.

Hêsêkia ndâk tay nau dăp pă kan ma phung Lêvi

² Hađăch Hêsêkia ndâk tay nau dăp ma phung Lêvi, tĭng nâm nau kan ăp nơm gay nhhơr ndơ ƀư brah gŭch jêh ri ndơ ƀư brah ma nau đăp mpăn, jêh ri pah kan, lah ueh, mprơ tâm rnê Păng ta lĕ ntŭk mpông pêr ngih Brah Yêhôva.

³ Hađăch sŏk đŏng du kô̆ ndơ păng nơm ƀư ndơ ƀư brah gŭch ma ôi jêh ri mhaơ, jêh ri ndơ ƀư brah gŭch tâm nar Saƀat, ma nar khay mhe jêh ri lĕ nar rƀŭn hŏ tâm nal jêh tĭng nâm bu nchih jêh tâm ndrom samƀŭt nau vay Brah Yêhôva.

⁴ Hađăch ntĭnh ma phung ƀon lan gŭ ta ƀon Yêrusalem ăn siăm ma phung kôranh ƀư brah jêh ri phung Lêvi, gay ma khân păng dơi pah kan lĕ nuih n'hâm di nâm nau vay Brah Yêhôva hŏ dăp.

⁵ Lah tăng nau hađăch ntrŭnh lam jêh, phung ƀon lan Israel djôt tât âk ngăn ndơ bôk rah tă bơh ba, tă bơh ndrănh, bơh dak sŭt, bơh dak ngi ôlive, jêh ri lĕ rngôch ndô ndơ êng luh bơh mir. Khân păng nhhơr đŏng du kô̆ tâm jât tâm lĕ ndơ khăn păng geh, dŭt âk râk.

⁶ Phung Israel jêh ri phung Yuđa gŭ tâm ăp ƀon n'gor Yuđa, ăt djôt đŏng ndrôk jêh ri biăp tât gay nhhơr du kô̆ tâm jât, ndrel ma lĕ ndơ du kô̆ tâm jât prăp êng jêh ma nau kloh ueh ăn ma Yêhôva Brah Ndu khân păng. Lĕ ndơ nhhơr nây dơi dăp tĭng mbŭch.

⁷ Tâm khay pe, khân păng ntơm dăp rgum lĕ ndơ nhhơr nây tĭng mbŭch jêh ri tât khay pơh mơ lĕ.

⁸ Lah Y-Hêsêkia jêh ri phung kôranh văch tât jêh ri uănh saơ âk mbŭch bu bun ndơ nhhơr, khân păng tâm rnê ma Brah Yêhôva jêh ri ăn nau ueh uĭn ma phung ƀon lan Israel.

⁹ Y-Hêsêkia ôp ma phung kôranh ƀư brah jêh ri phung Lêvi lĕ mbŭch bun ndơ nhhơr nây.

¹⁰ Y-Asaria, kôranh ƀư brah toyh jêng noi deh Y-Sadôk, plơ̆ lah ma hađăch pô aơ: “Ntơm bơh nar phung ƀon lan djôt ndơ nhhơr tâm ngih Brah Yêhôva, mâu knŏng hên tŏng sông sa ƀiălah geh âk ndơ rmeh, yorlah Brah Yêhôva hŏ ăn jêh nau ueh uĭn ma ƀon lan Păng. Aơ jêng mbŭch hôm e rmeh.”

Nau dăp tay phung kôranh bu brah jêh ri phung Lêvi

¹¹ Y-Hêsêkia ntăm đă ƀư kloh jrô tâm ngih Brah Yêhôva. Lah ƀư lôch jêh,

¹² khân păng răp jăp djôt lĕ ndô ndơ nhhơr, du kô̆ tâm jât jêh ri lĕ ndơ kloh êng êng. Kôranh mât chiă ndơ nây jêng Y-Kênania, phung Lêvi, ndrel ma Y-Simei oh păng jêng nơm groi kâp kơl.

¹³ Tĭng nâm nau hađăch Hêsêkia đă jêh ri phung kôranh chiă uănh ngih Brah Ndu jêng Y-Asaria, phung Y-Jêhiêl, Y-Asasia, Y-Nahat, Y-Asahel, Y-Jêrimôt, Y-Jôsaƀat, Y-Êliêl, Y-Ismachia, Y-Mahat, jêh ri Y-Bênaya jêng phung kôranh chiă uănh kơl Y-Kênania jêh ri Y-Simei oh păng.

¹⁴ Y-Kôrê, kon bu klâu Y-Imna bunuyh Lêvi, jêng nơm chiă uănh mpông pêr mpeh luh nar, jêng nơm mât lĕ ndơ nhhơr nđơr êng ma Brah Ndu, gay tâm pă lĕ ndơ bu nhhơr prăp jêh ma Brah Yêhôva jêh ri lĕ ndơ nhhơr dŭt kloh ueh.

¹⁵ Phung groi Y-Kôra geh: Y-Êđen, Y-Miniamin, Y-Jêsua, Y-Sêmaya, Y-Amaria, jêh ri Y-Sêkania tâm lĕ rngôch ƀon phung kôranh ƀư brah, khân păng tâm pă tâm ban lĕ ndơ nây ma phung oh nâu khân păng, phung toyh nđâp phung jê̆ tĭng nâm mpôl khân păng.

¹⁶ Phung bu mâu nchih ôh amoh tâm ndrom samƀŭt noi deh, khân păng pă đŏng ma phung bu klâu ntơm pe năm rlet klơ, jêh ri ăn đơ phung pah kan tĭng nâm nau ndăch khân păng dăp ăp nar lăp tâm ngih Brah Yêhôva gay pah kan tĭng nâm kan khân păng jêh ri tĭng nau hŏ dăp.

¹⁷ Khân păng pă đŏng ma phung kôranh ƀư brah hŏ nchih jêh săk tĭng noi deh păng nơm, jêh ri ăn phung Lêvi ntơm bar jât năm leo klơ, tĭng nâm kan pah jêh ri mbŭch khân păng.

¹⁸ Ăt tâm pă đŏng ăn ma lĕ rngôch kon jê̆ khân păng, ur khân păng, kon bu klâu jêh ri kon bu ur khân păng, nâm bu ntĭt lĕ rngôch phung tâm rƀŭn hŏ nchih amoh jêh tâm ndŭl mpôl, yorlah khân păng gŭ răp jăp mât săk nơm tâm nau kloh ueh.

¹⁹ Bi ma kon sau Y-Arôn, nâm bu ntĭt đơ phung kôranh ƀư brah gŭ tâm neh mir jŭm ƀon, tâm ăp rplay ƀon khân păng, đơ phung geh amoh bu kuăl, gay tâm pă lĕ ndơ ăn ma lĕ rngôch phung bu klâu tâm phung kôranh ƀư brah jêh ri phung Lêvi hŏ geh nchih jêh săk ndrel ma noi deh.

²⁰ Hađăch Hêsêkia hŏ ƀư nâm pônây tâm lam n'gor Yuđa. Hađăch ƀư nau ueh, sŏng jêh ri răp jăp tanăp Yêhôva Brah Ndu păng.

²¹ Tâm lĕ kan hađăch ƀư, bơh nau pah kan tâm ngih Brah Ndu tât nau djôt prăp nau vay mâu lah nau vay ntăm, păng tĭng joi Brah Ndu ma lĕ nuih n'hâm, rĭ dĭng păng dơi chăt jêng.