II Nau Rêh Jêng 30 - Nau Brah Ndu Ngơi 2023

Y-Hêsêkia ntĭnh djôt prăp rƀŭn Nau Găn

¹ Y-Hêsêkia njuăl phung mbơh hăn tât ma lĕ rngôch phung Israel jêh ri phung Yuđa; păng nchih đŏng samƀŭt njuăl ma phung Êphraim jêh ri phung Manasê, gay jă khân păng văch tât ma ngih Brah Yêhôva ta ƀon Yêrusalem gay kah gĭt rƀŭn Nau Găn ma Yêhôva Brah Ndu Israel.

² Hađăch jêh ri phung kôranh nđâp ma lĕ rngôch phung tâm rƀŭn ta ƀon Yêrusalem tâm nchră ndrăng khân păng gay kah gĭt rƀŭn Nau Găn tâm khay bar,

³ yorlah khân păng hăn rƀŭn Nau Găn mâu dơi di mông ôh, yorlah rnoh phung kôranh ƀư brah ƀư kloh khân păng nơm ê hŏ tŏng nŭm ôh, jêh ri phung ƀon lan ê hŏ rgum đŏng ta ƀon Yêrusalem.

⁴ Hađăch jêh ri lĕ rngôch phung tâm rƀŭn saơ nau kan nĕ di ngăn.

⁵ Pôri, khân păng mbơh lam bri Israel, ntơm bơh Bêr-Sêba tât ma Dan, gay ma phung ƀon lan văch ta Yêrusalem jêh ri kah gĭt rƀŭn Nau Găn ma Yêhôva Brah Ndu phung Israel. Yorlah hŏ jŏ jêh khân păng mâu geh hăn râng nhêt ƀŭn Nau Găn nây tĭng nâm nau hŏ nchih jêh tâm nau vay.

⁶ Tĭng nau hađăch ntrŭnh, phung njŭn samƀŭt hađăch jêh ri phung kôranh hăn lam n'gor bri Israel jêh ri n'gor Yuđa. Samƀŭt kuăl: “Ơ phung kon sau Israel, plơ̆ sĭt hom ma Yêhôva Brah Ndu Y-Abraham, Y-Isăk jêh ri Israel, gay ma Păng plơ̆ sĭt tay ma phung hôm e klen tâm khân may, jêng phung dơi klaih jêh tă bơh phung hađăch Asiri.

⁷ Lơi ta kơt nâm bu phung che jêh ri phung oh nâu khân may ôh, khân păng hŏ ƀư tih mâu ŭch gŭ răp jăp ma Yêhôva Brah Ndu phung chô yau khân păng, kŏ tât Păng ƀư rai jêh khân păng tĭng nâm khân may hŏ saơ jêh.

⁸ Aƀaơ, lơi ta dăng ko ôh nâm bu phung che khân may; yơr hom ti khân may nơm rle mpeh ma Brah Yêhôva jêh ri lăp hom Ntŭk Kloh Ueh jêng ntŭk ƀư kloh ueh n'ho ro jêh ri pah kan hom ma Yêhôva Brah Ndu khân may, gay ma nau Păng ji nuih dơi du ngai bơh khân may.

⁹ Yorlah tơlah khân may plơ̆ sĭt ma Brah Yêhôva, phung oh nâu khân may, jêh ri phung kon khân may mra geh nau yô̆ tanăp măt phung nhŭp khân păng, jêh ri khân păng mra dơi plơ̆ sĭt tâm n'gor aơ. Yêhôva Brah Ndu khân may geh nuih n'hâm ueh jêh ri vay yô̆ nđach, mâu mra ndôn kơi bơh khân may, tơlah khân may plơ̆ sĭt ma Păng.”

¹⁰ Phung njŭn samƀŭt hăn bơh ƀon aơ tât ƀon ri, tâm lam n'gor Êphraim, Manasê, jêh ri tât ta neh Sabulôn, ƀiălah bu gơm mưch, suai rak ma khân păng.

¹¹ Nđâp lah kơt nĕ, ăt geh noi deh tâm phung Aser, Manasê, jêh ri Sabulôn khân păng geh nau dêh rhêt jêh ri văch tât ma ƀon Yêrusalem.

¹² Ti Brah Ndu rlay đŏng ma phung Yuđa gay ăn ma khân păng geh du ai nuih n'hâm tông tĭng nau hađăch jêh ri phung kôranh hŏ ntăm jêh tĭng nâm nau Brah Yêhôva ngơi.

¹³ Tâm khay bar, geh âk ngăn bunuyh tât rƀŭn tâm ƀon Yêrusalem jêng du phung tâm rƀŭn toyh gay yơk ma Nau Sa Piăng Let Mâu Geh Ndrui.

¹⁴ Khân păng ntơm phă lĕ nơng bu ndâk ma brah êng tâm ƀon Yêrusalem jêh ri lĕ rngôch nơng ƀư brah su ndơ ƀâu kah jêh ri klŭp mƀăr ndơ nây tâm rlŭng Kidrôn.

¹⁵ Nar jât ma puăn khay bar, bu nkhĭt mpa ƀư brah gay rƀŭn Nau Găn. Bi phung kôranh ƀư brah jêh ri phung Lêvi, geh nau prêng, pôri ƀư kloh êng khân păng nơm jêh ri leo ndơ ƀư brah gŭch lăp tâm ngih Brah Yêhôva.

¹⁶ Khân păng hăn gŭ tâm ntŭk vay kan, nâm bu hŏ dăp jêh tâm nau vay Y-Môis, bunuyh Brah Ndu, jêh ri phung kôranh ƀư brah sŏk mham tâm ti phung Lêvi jêh ri nsrih mham nây.

¹⁷ Tâm phung tâm rƀŭn hôm geh âk phung ê hŏ ƀư kloh ôh khân păng nơm, yor nây, phung Lêvi nhhơr đŏng du kon biăp ƀư nhhơr Nau Găn ăn ma ăp nơm ê hŏ kloh, gay ma khân păng dơi jêng kloh ma Brah Yêhôva.

¹⁸ Yorlah geh âk bunuyh, tâm phung ƀon lan phung Êphraim, Manasê, Isakar, jêh ri Sabulôn ê hŏ ƀư kloh khân păng nơm ôh, ƀiălah ăt khân păng sa rƀŭn Nau Găn, mâu tĭng kơt ôh nau vay bu hŏ nchih jêh. Yor nây Y-Hêsêkia mbơh sơm ma khân păng pô aơ:

¹⁹ “Dăn ma Brah Yêhôva jêng Nơm ueh, yô̆ an nau tih ma lĕ rngôch bunuyh hŏ lĕ nuih n'hâm tĭng joi Yêhôva Brah Ndu phung chô yau khân păng, nđâp lah mâu hŏ di ôh nau vay ƀư kloh tâm ngih brah kloh ueh gay ƀư kloh khân păng nơm.”

²⁰ Brah Yêhôva iăt nau mbơh sơm bơh Y-Hêsêkia jêh ri ƀư bah an phung ƀon lan.

²¹ Phung ƀon lan Israel geh măt ta ƀon Yêrusalem, kah gĭt yơk nau Sa Piăng Let Mâu Geh Ndrui tâm pơh nar ma nau răm maak ngăn ngên. Tâm nôk nĕ, phung Lêvi, phung kôranh ƀư brah mprơ tâm rnê ma Brah Yêhôva nar aơ tât nar ri đah lĕ gong rlet.

²² Y-Hêsêkia ngơi n'hao nuih ma lĕ rngôch phung Lêvi hŏ mpơl nau gĭt mĭn ma kan yơk mbah Brah Yêhôva. Khân păng sông sa răm maak nau rƀŭn tâm pơh nar, nhhơr lĕ mpa ƀư brah ma nau đăp mpăn, jêh ri tâm rnê lah ueh ma Yêhôva Brah Ndu phung chô yau khân păng.

²³ Lĕ rngôch phung tâm rƀŭn sŏk dơn djôt prăp nau rƀŭn ntop pơh nar, pôri khân păng răm maak djôt prăp nau rƀŭn ntop pơh nar đŏng.

²⁴ Yor ri, Y-Hêsêkia, hađăch Yuđa, hŏ ăn jêh ma phung tâm rƀŭn geh du rbăn ndrôk nkuăng jêh ri pơh rbăn biăp; phung kôranh ăn ma phung tâm rƀŭn du rbăn ndrôk nkuăng jêh ri du rmưn biăp. Geh âk ngăn phung kôranh ƀư brah ƀư kloh khân păng nơm.

²⁵ Lĕ rngôch phung tâm rƀŭn Yuđa, phung kôranh ƀư brah nđâp ma phung Lêvi, jêh ri phung Israel văch tâm rƀŭn, nđâp phung bu năch gŭ njưh tâm n'gor Israel, gŭ njưh tâm n'gor Yuđa, răm maak da dê.

²⁶ Pôri, tâm ƀon Yêrusalem răm maak ngăn ngên yơh, yorlah bơh rô̆ Y-Salômôn, kon bu klâu Y-Đavit, hađăch Israel, tât aƀaơ, ta ƀon Yêrusalem ê hŏ geh ôh nau maak nâm pônây.

²⁷ Pônây, phung kôranh ƀư brah jêng noi Lêvi gŭ dâk ăn nau ueh uĭn ma phung ƀon lan; Brah Ndu dơn bâr khân păng, nau mbơh sơm khân păng hao tât ma ntŭk kloh ueh Kôranh Brah ta klơ trôk.