II Nau Rêh Jêng 3 - Nau Brah Ndu Ngơi 2023

Y-Salômôn ndâk ngih brah

¹ Y-Salômôn ntơm ndâk ngih Brah Yêhôva, tâm Yêrusalem klơ yôk Môria, jêng ntŭk Brah Yêhôva hŏ tâm mpơl jêh ma Y-Đavit, mbơ̆ păng. Nĕ jêng ntŭk Y-Đavit hŏ nchŏng jêh gay ndâk tâm ntŭk mprah ba Y-Ôrnan, bunuyh Jêbusit.

² Y-Salômôn ntơm ndâk tâm nar rơh bar khay rơh bar tâm năm rơh puăn tâm rnôk rô̆ păng chiă uănh.

³ Aơ jêng nau Y-Salômôn veh jêh ma nau ndâk ngih Brah Ndu: jong jêng pe jât met, huy jêng jât met.

⁴ Jong ndring ngih panăp jêng jât met, tâm ban ma huy ngih brah; prêh klơ jêng prao jât met. Păng mblum ma mah chrêk tâm trôm ngih.

⁵ Jrô toyh ngih brah păng ƀư ma tơm si sêdar jêh ri mblum ma mah chrêk, nkrơ̆ rup tơm đung jêh ri rse rvăk ta klơ.

⁶ Păng nkrơ̆ ngih brah ma lŭ khlay, bi mah dŏng mah bơh n'gor bri Parvaim.

⁷ Păng mblum ma mah lam ngih brah: njon ngih, kađar lăp mpông sâng, mpir jêh ri mpông; păng trah rup chêrubim ta mpir.

⁸ Păng ƀư Ntŭk Dŭt Kloh Ueh jong jêng jât met, tâm ban ma huy ngih brah; jêh ri huy Ntŭk Dŭt Kloh Ueh tâm ban đŏng jât met. Păng mblum ntŭk nây ma bar jât tân mah chrêk.

⁹ Rnoh mah gay mblum kđĭn klăp lah n'gul kilô. Păng mblum đŏng ma mah lĕ jrô prêh klơ.

¹⁰ Tâm trôm Ntŭk Dŭt Kloh Ueh, păng ƀư bar chêrubim trah đah tơm si, jêh nây mblum ma mah.

¹¹ Puăn nting năr bar chêrubim lĭ jong jêng jât met; du đah nting năr chêrub pa ma jong bar met n'gul nđĭl êp mpir ngih brah, bi nting năr du đah ri ăt jong bar met n'gul, jêh ri tâm mâp đah nting năr chêrub pa chiau.

¹² Du đah nting năr pa ma chêrub jong bar met n'gul jêh ri tâm rđĭl đah mpir ngih brah, bi nting năr pa chiau đah ri ăt bar met n'gul, tâm mâp đah nting năr pa ma chêrub rơh nguay.

¹³ Lĕ rngôch nting năr bar chêrubim lĭ da dê, lĕ rngôch jong jât met. Bar chêrubim nây dâk sŏng klơ jâng, măt rle năp mpeh ntŭk kloh ueh.

¹⁴ Păng ƀư nthăng bok nching ma brai rnô̆, brai chăng rhưch, brai sut chăng breh gŭr nđâp ma brai mhay rhên, geh cheh rup chêrubim ta klơ.

¹⁵ Panăp ngih brah, păng ƀư bar mlâm meh prêh jât ma pơh met n'gul, ta klơ bôl dŭt lĕ bar meh prêh bar met n'gul.

¹⁶ Păng ƀư đŏng ma rse rvăk tâm ban ma nâm bu rse rvăk tâm Ntŭk Dŭt Kloh ueh, dơm ta klơ bôl dŭt meh, jêh nây ƀư du rhiăng mlâm play pom gra nat jêh ri nkrêp ta klơ rse rvăk nây.

¹⁷ Păng ndâk bar meh nây panăp ngih brah, du meh mpeh pa ma, du meh êng mpeh pa chiau; păng ntơ amoh meh mpeh pa ma jêng Jakin jêh ri meh mpeh pa chiau jêng Bôas.