II Nau Rêh Jêng 29 - Nau Brah Ndu Ngơi 2023

Y-Hêsêkia ndâk tay nau yơk mbah Brah Ndu

¹ Nôk hao jêng hađăch, Y-Hêsêkia geh bar jât ma prăm năm jêh ri păng chiă uănh bar jât ma sĭn năm tâm ƀon Yêrusalem. Amoh mê̆ păng, H'Abija kon bu ur Y-Sakari.

² Păng ƀư nau di tanăp măt Brah Yêhôva tĭng nâm lĕ rngôch nau chô yau păng Y-Đavit, ƀư jêh.

Ƀư kloh ngih brah

³ Tâm khay nguay năm tal nguay păng chiă uănh, hađăch pơk mpông ngih Brah Yêhôva, jêh ri nkra tay.

⁴ Păng kuăl rgum phung kôranh ƀư brah jêh ri phung Lêvi tât, jêh ri rgum khân păng tâm ndring mpeh luh nar,

⁵ jêh ri lah: “Ơ phung Lêvi, iăt hom gâp! Aƀaơ ri, ƀư kloh hom khân may nơm, jêh ri ƀư kloh lơi ngih Yêhôva Brah Ndu phung chô yau khân may jêh ri sŏk mƀăr lơi ndơ ƀơ̆ ƀơch bơh ngih brah kloh ueh.

⁶ Yorlah phung che he hŏ ƀư tih jêh, ƀư nau mhĭk tanăp măt Yêhôva Brah Ndu he, chalơi Păng, jêh ri mâu ŭch rle muh măt uănh ma ntŭk Brah Yêhôva gŭ, ndôn kơi ma Păng.

⁷ Khân păng nchăng lơi lĕ mpông ta ndring, jêh ri nhhât lơi ŭnh kađen, mâu su ôh ndơ ƀâu kah jêh ri mâu nhhơr ôh ndơ ƀư brah gŭch Ntŭk Kloh Ueh ăn ma Brah Ndu phung Israel.

⁸ Yor ri, nau Brah Yêhôva ji nuih tât ma Yuđa jêh ri Yêrusalem; Păng jao khân păng ma nau klach krit ngăn, nau roh rai, nau bu gơm mưch, tĭng nâm măt khân may nơm lĕ saơ jêh.

⁹ Yor nau nây, rĭ dĭng phung che he cha lôt khĭt ma đao, bi phung kon bu klâu, phung kon bu ur jêh ri phung ur he jêng bu nă.

¹⁰ Aƀaơ, gâp geh nau tâm nal ƀư nau tâm rnglăp đah Yêhôva Brah Ndu phung Israel, gay nau ji nuih Păng du ngai bơh phung he.

¹¹ Ơ phung kon bu klâu gâp ơi, lơi ta brơl rlach ôh! Yorlah Brah Yêhôva hŏ săch jêh khân may jêng oh mon Păng gay gŭ dâk panăp Păng, pah kan jêh ri su ndơ ƀâu kah ma Păng.”

Phung Lêvi ƀư kloh ngih brah

¹² Pôri phung Lêvi dâk dơn ro: Bơh phung noi Y-Kôhat geh Mahat kon bu klâu Y-Amasai, jêh ri Y-Yôel kon bu klâu Y-Asaria; bơh phung noi Y-Mêrari geh Y-Kis kon bu klâu Y-Apdi, jêh ri Y-Asaria kon bu klâu Y-Jêhalêlel; bơh phung noi Gersôn geh Y-Jôa kon bu klâu Y-Sima, jêh ri Y-Êđen kon bu klâu Y-Jôa;

¹³ bơh phung noi Y-Êlisaphan geh Y-Simri jêh ri Y-Jêiêl; bơh phung noi Y-Asap geh Y-Sakari jêh ri Y-Matania;

¹⁴ bơh phung noi Y-Hêman geh Y-Jêhiêl jêh ri Y-Simei; bơh phung noi Y-Jêduthun geh Y-Sêmaya jêh ri Y-Usiêl.

¹⁵ Khân păng rƀŭn phung oh nâu khân păng, jêh ri ƀư kloh lơi khân păng nơm, jêh nây tĭng nâm hađăch ntăm, di nâm nau Brah Yêhôva ngơi, khân păng tât gay ƀư kloh ngih Brah Yêhôva.

¹⁶ Phung kôranh ƀư brah lăp tâm trôm jrô ngih Brah Yêhôva gay ƀư kloh, khân păng djôt lĕ rngôch ndơ ƀơ̆ khân păng saơ tâm trôm ngih Brah Yêhôva ngluh mƀăr padih ndring ngih brah, jêh nây phung Lêvi sŏk ndơ nây djôt leo klŭp ta rđŭng Kidrôn.

¹⁷ Lơ nguay khay nguay khân păng ntơm ƀư kloh ngih brah. Lơ pham khay nây, khân păng tho tât ta ndring ngih brah, jêh ri ƀư kloh tay ngih Brah Yêhôva ntop pham nar đŏng. Tât nar jât ma prao khay nguay, nau kan lôch jêh.

¹⁸ Khân păng lăp tâm ngih hađăch Hêsêkia jêh ri lah: “Hên ƀư kloh lĕ rngôch jêh ngih Brah Yêhôva, ndơ ƀư brah gŭch jêh ri nđâp lĕ rngôch ndơ dŏng, sưng dơm piăng let nhhơr jêh ri lĕ rngôch ndơ dŏng.

¹⁹ Lĕ rngôch ndơ hađăch Ahas dŏng bu klŭp mƀăr lơi jêh dôl rnôk păng chiă uănh, ma nau păng mâu gŭ răp jăp ôh, hên nkra jêh ri ƀư kloh da dê, aơ, lĕ rngôch ndơ nây gŭ panăp nơng Brah Yêhôva.”

Y-Hêsêkia nhhơr ndơ ƀư brah

²⁰ Hađăch Hêsêkia kah rngăl ơm ôi, tâm rƀŭn phung kôranh tâm ƀon, jêh ri hăn hao ma ngih Brah Yêhôva.

²¹ Khân păng têk leo pơh mlâm ndrôk nkuăng, pơh mlâm biăp nkuăng, pơh mlâm biăp kon, jêh ri pơh mlâm be nkuăng gay ƀư ndơ ƀư brah chuai nau tih ma ƀon bri hađăch, ma ngih brah kloh ueh jêh ri ma phung Yuđa. Păng ntĭnh ma phung kôranh ƀư brah jêng noi Y-Arôn ăn nhhơr lĕ mpa ƀư brah nây ta klơ nơng Brah Yêhôva.

²² Khân păng nkhĭt ndrôk nkuăng, phung kôranh ƀư brah dâng sŏk mham jêh ri nsrih ta klơ nơng ƀư brah. Jêh ri khân păng nkhĭt biăp nkuăng, jêh ri nsrih mham nây ta klơ nơng ƀư brah. Khân păng nkhĭt đŏng phung biăp kon jêh ri nsrih mham nây ta klơ nơng ƀư brah.

²³ Jêh nây, khân păng têk leo be nkuăng dŏng ƀư ndơ ƀư brah chuai nau tih tât tanăp măt hađăch jêh ri phung tâm rƀŭn, jêh ri khân păng pah ti khân păng ta klơ be nây.

²⁴ Phung kôranh ƀư brah nkhĭt khân păng jêh ri dâng sŏk mham nsrih klơ nơng gay ƀư brah chuai nau tih ăn ma lĕ rngôch phung Israel, yorlah hađăch ntĭnh kơt aơ nhhơr ndơ ƀư brah gŭch jêh ri ndơ ƀư brah chuai nau tih ma lĕ rngôch phung Israel.

²⁵ Hađăch dơm phung Lêvi tâm ngih Brah Yêhôva djôt dang, gong rêng jêh ri n'hôm, tĭng nâm nau vay ntrŭnh bơh Y-Đavit, jêh ri Y-Gat, jêng nơm geh nau tâm saơ ma hađăch, jêh ri bơh nơm mbơh lor Y-Nathan ntăm; yorlah nau ntrŭnh nây luh bơh Brah Yêhôva dŏng bâr mbung phung nơm mbơh lor Păng ntĭm nti.

²⁶ Phung Lêvi gŭ dâk djôt ndơ mprơ Y-Đavit jêh ri phung kôranh ƀư brah djôt nŭng.

²⁷ Y-Hêsêkia ntĭnh ăn bu nhhơr ndơ ƀư brah gŭch ta klơ nơng ƀư brah. Tơlah bu ntơm nhhơr mpa nhhơr gŭch ta nây đŏng bu ntơm mprơ tâm rnê ma Brah Yêhôva tâm ban lĕ, nđâp ma bâr nŭng jêh ri lĕ gong Y-Đavit hađăch Israel.

²⁸ Lĕ rngôch phung tâm rƀŭn yơk mbah, phung mprơ, phung uh nŭng kŏ tât rnôk nau kan nhhơr ndơ ƀư brah gŭch lôch jêh.

²⁹ Lah nau nây lôch jêh, hađăch jêh ri lĕ rngôch phung gŭ ta nây ndrel ma păng chon mon yơk mbah.

³⁰ Hađăch Hêsêkia jêh ri phung kôranh ntĭnh ma phung Lêvi mprơ tâm rnê ma Brah Yêhôva ma lĕ nau mprơ Y-Đavit jêh ri Y-Asap, nơm geh nau tâm saơ. Khân păng mprơ nau tâm rnê ma Kôranh Brah tâm nau răm maak, jêh ri khân păng chon mon yơk mbah.

³¹ Hađăch Hêsêkia lah: “Aƀaơ ri, khân may prăp jêh khân may nơm jêng kloh ma Brah Yêhôva. Văch hom, djôt mpa ƀư brah jêh ri ndơ ƀư brah tâm rnê lăp tâm ngih Brah Yêhôva.” Phung tâm rƀŭn leo ro lĕ mpa ƀư brah jêh ri ndơ ƀư brah tâm rnê lah ueh, geh đŏng phung nđơr êng djôt nhhơr lĕ ndơ ƀư brah gŭch.

³² Rnoh kơp mpa ƀư brah dŏng tâm ndơ ƀư brah gŭch, phung tâm rƀŭn djôt leo tât pơh jât mlâm ndrôk nkuăng, du rhiăng mlâm biăp nkuăng, jêh ri bar rhiăng mlâm biăp kon; khân păng dŏng lĕ rngôch ndơ nây prăp ma ndơ ƀư brah gŭch nhhơr ma Brah Yêhôva.

³³ Rlau ma nĕ, khân păng ƀư kloh tay prao rhiăng ndrôk nkuăng jêh ri pe rbăn mlâm biăp jêh ri be.

³⁴ Ƀiălah, phung kôranh ƀư brah ƀhôi ir, mâu tŏng gay n'huk ntâu lĕ rngôch mpa dŏng ma ndơ ƀư brah gŭch ôh. Pôri kŏ tât ntop tay phung kôranh ƀư brah lĕ ƀư kloh jêh khân păng nơm, phung oh nâu khân păng phung Lêvi kơl kan khân păng, tât lĕ kan dơi jêh yorlah phung Lêvi geh nuih n'hâm sŏng lơn ma phung kôranh ƀư brah tâm nau ƀư kloh khân păng nơm.

³⁵ Rlau ma rnoh ndơ ƀư brah gŭch âk ngăn, bi ngi ndơ ƀư brah ma nau đăp mpăn, jêh ri geh ndơ nhhơr nhêt ndrel ma mpa nhhơr gŭch. Pôri, nau yơk mbah tâm ngih Brah Yêhôva bu hŏ ndâk njêng tay jêh.

³⁶ Y-Hêsêkia jêh ri lĕ rngôch phung ƀon lan hâk răm yor lĕ nau Brah Ndu ƀư jêh ma khân păng, yorlah lĕ nau kan dơi ƀư gơnh ro.