II Nau Rêh Jêng 27 - Nau Brah Ndu Ngơi 2023

Y-Jôtham jêng hađăch Yuđa

¹ Nôk hao jêng hađăch, Y-Jôtham geh bar jât ma prăm năm jêh ri păng chiă uănh jât ma prao năm ta ƀon Yêrusalem. Amoh mê̆ păng jêng H'Jêrusa, kon bu ur Y-Sadôk.

² Păng ƀư di tanăp măt Brah Yêhôva tĭng nâm lĕ rngôch nau mbơ̆ păng Y-Usia hŏ ƀư jêh; ƀiălah păng mâu lăp ôh tâm ngih Brah Yêhôva, bi phung ƀon lan ăt hôm ƀư blă blơ.

³ Păng ndâk mpông pêr ta klơ ngih Brah Yêhôva, jêh ri ƀư âk kan ndâk n'gŏ mpêr ƀon Ôphel.

⁴ Păng ndâk đŏng âk play ƀon tâm bri klơ dor Yuđa, jêh ri ndâk pôih nâp, ngih tŭm gak ta klơ yôk geh bri krŏng.

⁵ Păng tâm lơh đah hađăch phung Ammôn jêh ri dơi khân păng. Tâm năm nĕ, phung Ammôn chê̆ ma păng pe rbăn kilô prăk, bar rkeh bar rsen lit ba ƀlê, jêh ri bar rkeh bar rsen lit ba ôrgơ. Phung Ammôn chê̆ đŏng ma păng lĕ ndơ nây tâm năm rơh bar jêh ri rơh pe.

⁶ Pôri, Y-Jôtham plơ̆ jêng janh ktang, yorlah păng tĭng ndô̆ trong di tanăp măt Yêhôva Brah Ndu.

⁷ Lĕ kan ƀaƀă Y-Jôtham ƀư, lĕ rngôch nau păng tâm lơh, jêh ri trong chuat hăn bu nchih da dê tâm ndrom samƀŭt phung hađăch Israel jêh ri Yuđa.

⁸ Păng geh bar jât ma prăm năm tơlah păng ntơm chiă uănh, jêh ri păng chiă uănh jât ma prao năm ta ƀon Yêrusalem.

⁹ Y-Jôtham khĭt hăn gŭ n'hanh ma phung chô yau păng, jêh ri bu tâp păng tâm ƀon Đavit. Y-Ahas kon bu klâu păng chiă uănh thoi ntrok păng.