II Nau Rêh Jêng 26 - Nau Brah Ndu Ngơi 2023

Nau Y-Usia chiă uănh chrêk rmah

¹ Lĕ rngôch phung ƀon lan Yuđa njêng Y-Usia n'hao ƀư hađăch, ntrok mbơ̆ păng jêng Y-Amasia, nôk Y-Usia geh jât ma prao năm.

² Lah mbơ̆ păng hŏ gŭ ndrel ma phung chô yau păng, Y-Usia ndâk ƀon Êlôt jêh ri njêng tay ƀon nây ma n'gor Yuđa.

³ Nôk hao klơ sưng hađăch, Y-Usia geh jât ma prao năm jêh ri chiă uănh prăm jât bar năm tâm Yêrusalem. Mê̆ păng amoh jêng H'Jêkôlia, ƀon tơm ta Yêrusalem.

⁴ Păng ƀư nau di tanăp măt Brah Yêhôva, di nâm lĕ nau mbơ̆ păng jêng Y-Amasia hŏ ƀư jêh.

⁵ Tâm lĕ rô̆ Y-Sakari jêng bunuyh gĭt rbăng lĕ nau tâm saơ bơh Brah Ndu, Y-Usia joi Brah Ndu ma lĕ nuih n'hâm. Păng joi Brah Ndu ndah jŏ, Brah Ndu ƀư ăn ma păng geh nau ƀŭn lap dah nây lĕ.

⁶ Păng jă phung tahan hăn tâm lơh đah phung tahan Philistin, jêh ri lơh rlâm lĕ mpêr ƀon Gat, Japnê jêh ri mpêr Asdôt. Hađăch rdâk âk play ƀon tâm neh bri Asdôt jêh ri tâm bri Philistin.

⁷ Brah Ndu kơl păng dơi đah phung Philistin, đah phung Arabi gŭ ta Gur-Baal jêh ri đah phung Mêunim.

⁸ Phung Ammôn chê̆ pi ma Y-Usia, jêh ri nau lư n'găr păng bu tăng lư tât ta n'har neh n'gor Êjipt, yorlah păng hao hŏ dơi chăt jêng ngăn.

⁹ Y-Usia ndâk lĕ ngih tŭm ta Yêrusalem, ta mpông pêr Njônh, ta mpông pêr Rlŭng jêh ri ta mpông pêr njônh mpir, ƀư ma lĕ ngih tŭm nây nâp ktang.

¹⁰ Păng ndâk đŏng lĕ ngih tŭm tâm bri rdah, kuyh âk ntu dak, yorlah păng geh âk mpô mpa rong ta nkual Sêphêla nđâp tâm ntŭk nkual prêh. Hađăch geh đŏng phung ƀư mir, phung tăm krăk ƀâu ta klơ dor yôk jêh ri ta Karmel, yorlah păng ŭch nau tuch tăm.

¹¹ Y-Usia geh du phung tahan rơm ndrăp nau tâm lơh, tâm pă tĭng mbŭch, tĭng nâm rnoh bunuyh kôranh nchih samƀŭt Y-Jêiêl, jêh ri kôranh tahan Y-Maseya hŏ săch, jêh ri dơm tâm dâng nau ƀĭt gai Y-Hanania, du huê kôranh toyh ma hađăch.

¹² Lĕ rngôch phung kôranh ndŭl mpôl jêng phung tahan janh ktang, lĕ rngôch jêng bar rbăn prao rhiăng nuyh.

¹³ Khân păng chiă uănh du phung tahan geh pe rsen pơh rbăn prăm rhiăng nuyh, lĕ rngôch jêng phung blau tâm lơh jêh ri janh ktang, kơl hađăch tâm rdâng đah phung rlăng.

¹⁴ Y-Usia ndrăp ma lĕ rngôch tahan rǐng khêl, tak, môk loih, ao loih, na, jêh ri rse pănh lŭ.

¹⁵ Ta Yêrusalem, hađăch ăn ma phung njêh njêng ndeh mhe dơm tâm lĕ ngih tŭm gak jêh ri ta klơ pôih gay pănh hăr jêh ri klŭp lŭ toyh. Nau lư n'găr păng bu tăng lư ngai ngăn, yorlah Kôranh Brah kơl păng khlay ngăn ngên, kŏ tât păng geh jêng.

Y-Usia geh nau ji phŭng

¹⁶ Ƀiălah tơlah Y-Usia hŏ geh jêng jêh, păng geh nuih n'hâm sưr ƀư ăn ma păng nơm roh rai. Păng ƀư tih đah Yêhôva Brah Ndu păng, yorlah păng hŏ lăp tâm ngih Brah Yêhôva gŭch ndơ ƀâu kah ta Nơng ƀư brah gŭch ndơ ƀâu kah.

¹⁷ Kôranh ƀư brah Y-Asaria ndrel ma pham jât kôranh ƀư brah, jêng phung janh ktang, tĭng păng hăn lăp ta ngih brah.

¹⁸ Khân păng buay hađăch Usia jêh ri lah: “Ơ Y-Usia, gŭch ndơ ƀâu kah ma Brah Yêhôva mâu di kan may ôh, ƀiălah nây jêng kan phung kôranh ƀư brah jêng noi deh Y-Arôn, phung bu prăp êng ma nau kloh ueh gay gŭch ndơ ƀâu kah. Luh hom bơh ngih brah kloh ueh aơ, yorlah may ƀư tih jêh, jêh ri yorlah kan aơ, Brah Yêhôva mâu mra ƀư ăn may dơi geh nau chrêk rmah ôh.”

¹⁹ Tăng pôri, Y-Usia ji nuih ngăn. Nôk nây, păng dôl djôt du mlâm glah ndơ ƀâu kah tâm ti gay gŭch ndơ ƀâu kah. Tâm nôk păng hao ji nuih ma phung kôranh ƀư brah, geh phŭng luh ta ndăr kleng păng tanăp măt phung kôranh ƀư brah tâm ngih Brah Yêhôva, êp kêng Nơng ƀư brah gŭch ndơ ƀâu kah.

²⁰ Kôranh ƀư brah toyh lơn Y-Asaria jêh ri lĕ rngôch phung kôranh ƀư brah êng, saơ păng geh ji phŭng ta ndăr kleng, bu mpâk ndal păng luh du tă bơh nây; jêh ri păng nơm hăn luh ndal đŏng, yorlah Brah Yêhôva rmal păng.

²¹ Y-Usia geh nau ji phŭng kŏ tât nar păng khĭt, jêh ri yor ma nau ji phŭng păng gŭ rêh du huê păng tâm du ngih êng, mâu hôm dơi lăp tâm ngih Brah Yêhôva đŏng ôh. Yor ri, kon bu klâu păng jêng Y-Jôtham mât uănh ngih hađăch jêh ri chiă uănh phung ƀon lan tâm bri.

Y-Usia khĭt

²² Nơm mbơh lor Y-Êsai, kon bu klâu Y-Amôt, hŏ nchih lĕ nau kan ƀaƀă Y-Usia ƀư, bơh ntơm tât lôch.

²³ Y-Usia khĭt hăn gŭ ndrel phung chô yau păng, jêh ri bu tâp păng dăch kêng phung chô yau păng ta ntŭk môch prăp ma phung hađăch, yorlah bu lah: “Păng geh nau ji phŭng.” Kon bu klâu păng jêng Y-Jôtham hao klơ sưng hađăch chiă uănh thoi păng.