II Nau Rêh Jêng 25 - Nau Brah Ndu Ngơi 2023

Y-Amasia ƀư hađăch

¹ Nôk hao jêng hađăch, Y-Amasia geh bar jât ma prăm năm jêh ri păng chiă uănh bar jât ma sĭn năm tâm ƀon Yêrusalem. Me păng amoh H'Jêhôađin, ƀon tơm ta Yêrusalem.

² Păng ƀư nau di tanăp măt Brah Yêhôva, ƀiălah nuih n'hâm mâu dơi jêng kloh rsang ngăn ôh.

³ Tơlah ƀon bri hađăch dơi ƀư nâp jêh păng nkhĭt phung oh mon păng jêng phung hŏ nkhĭt jêh mbơ̆ păng.

⁴ Ƀiălah păng mâu nkhĭt phung kon khân păng, tĭng ntil nau hŏ nchih jêh tâm ndrom samƀŭt nau vay Y-Môis, di nâm bu Brah Yêhôva hŏ ntăm jêh: “Mê̆ mbơ̆ mâu mra khĭt yor phung kon, phung kon tâm ban lĕ mâu mra khĭt yor mê̆ mbơ̆; ƀiălah ăp nơm mra khĭt yor nau tih păng nơm.”

Nau bu nkhĭt phung Êđôm

⁵ Y-Amasia tâm rƀŭn phung Yuđa, tĭng ndŭl mpôl tâm chô yau Yuđa jêh ri Benjamin, jêh ri njêng phung kôranh chiă uănh toyh ma du rbăn nuyh tahan jêh ri du rhiăng nuyh tahan. Păng kơp rnoh bunuyh ntơm bơh bar jât năm leo klơ, geh lĕ rngôch pe rsen nuyh, dơi djôt tak jêh ri khêl hăn tâm lơh.

⁶ Păng manh nkhôm đŏng du rsen nuyh phung tahan janh ktang tâm phung Israel, rnoh pe rbăn kilô prăk.

⁷ Ƀiălah geh du huê bunuyh Brah Ndu tât jêh ri lah ma păng pơ aơ: “Ơ hađăch, lơi jă phung tahan Israel nây hăn ndrel ma may ôh, yorlah Brah Yêhôva mâu gŭ ndrel ôh ma phung Israel, mâu gŭ ndrel ôh ma phung kon sau Êphraim.

⁸ Bi tơlah may brơl hăn, nđâp lah may tâm lơh dăng ktang, Brah Ndu mra ƀư đŏng ăn may cha lôt panăp phung rlăng, yorlah Brah Ndu geh nau brah dơi kơl jêh ri nau brah ƀư ăn mâu dơi.”

⁹ Y-Amasia lah ma bunuyh Brah Ndu: “Mâm gâp mra ƀư ma pe rbăn kilô prăk gâp hŏ ăn jêh ma phung tahan Israel?” Bunuyh Brah Ndu plơ̆ lah: “Brah Yêhôva ăn ma may âk rmeh lơn ma rnoh nây.”

¹⁰ Pôri, Y-Amasia tâm nkhah ma phung tahan văch jêh ma păng bơh phung Êphraim, jêh ri ăn ma khân păng plơ̆ sĭt ma ngih khân păng. Yor ri, khân păng ji nuih ngăn ma phung Yuđa jêh ri plơ̆ sĭt ma ngih ma nau ji nuih ngăn.

¹¹ Y-Amasia dăng janh njŭn leo phung tahan păng tât rlŭng Boh jêh ri nkhĭt du rmưn nuyh Sêir.

¹² Phung tahan Yuđa ăt nhŭp rêh du rmưn nuyh, njŭn leo khân păng ta klơ n'gơn yôk lŭ, jêh nây bơh klơ n'gơn yôk lŭ nây khân păng nklơ̆ phung nây. Lĕ rngôch khĭt rai săk jăn da dê.

¹³ Bi ma phung tahan Y-Amasia ăn ma khân păng plơ̆ sĭt, mâu geh hăn tâm lơh ndrel ma păng; khân păng rduh lăp lơh lĕ ƀon phung Yuđa, ntơm bơh Samari tât Bet-Hôron, lơh nkhĭt pe rbăn nuyh ta nây jêh ri sŏk pit âk drăp ndơ.

¹⁴ Jêh dơi tâm lơh đah phung tahan Êđôm, Y-Amasia plơ̆ sĭt, djôt leo phung brah phung Sêir, ndâk phung nây jêng brah ma păng, chon mbah jêh ri gŭch ndơ ƀâu kah tanăp măt phung brah nây.

¹⁵ Yor ri, Brah Yêhôva ji nuih ma Y-Amasia, Păng njuăl du huê nơm mbơh lor hăn tât lah ma păng: “Mâm ƀư may hăn joi ma phung brah mâu dơi tâm rklaih phung ƀon lan khân păng nơm bơh ti may?”

¹⁶ Tâm nôk nơm mbơh lor dôl ngơi; hađăch lah ma păng: “Hên mâp dăp may jêng nơm kơl nchră ma hađăch? Găp hôm, gŭ klăk hom! May ŭch khĭt lĕ?” Nơm mbơh lor gŭ klăk, ƀiălah jêh nây păng lah tay: “Gâp gĭt Brah Yêhôva tâm nal ƀư rai may, yorlah may hŏ ƀư jêh nau aơ jêh ri mâu ŭch iăt ôh nau gâp nkah.”

Y-Amasia mâu dơi tâm lơh

¹⁷ Lah jêh tâm nchră ndrel ma phung nơm kơl nchră, Y-Amasia, hađăch Yuđa, njuăl bâr ngơi ma Y-Jôas, kon Y-Jôacha, sau Y-Jêhu, hađăch Israel pô aơ: “Văch hom, gay he tâm thâng muh măt.”

¹⁸ Y-Jôas, hađăch Israel, njuăl bâr ngơi ma Y-Amasia, hađăch Yuđa: “Tơm lok ta bri Liban njuăl bunuyh lah ma tơm si sêdar ta bri Liban pô aơ: ‘Ăn hom kon bu ur may ƀư ur ma kon bu klâu gâp.’ Ƀiălah geh mpô mpa bri ta Liban hăn rgăn jêh ri jot nchah tơm lok nây.

¹⁹ May lah: ‘Aơ, gâp hŏ lơh jêh bri Êđôm!’ Nuih n'hâm may ƀư sưr, n'hao êng may nơm. Aƀaơ aơ, gŭ hom tâm ngih. Mâm ƀư may ŭch anh nau mhĭk jêh ri ƀư ăn may jêh ri phung Yuđa roh rai?”

²⁰ Y-Amasia mâu ŭch iăt ôh, yorlah nau nây luh bơh nau mĭn Brah Ndu gay jao khân păng tâm ti phung rlăng, yorlah khân păng joi brah phung Êđôm.

²¹ Y-Jôas, hađăch Israel, jă phung tahan hăn hao dăp nkrĭp tâm tra đah Y-Amasia, ta ƀon Bet-Sêmes tâm n'gor phung Yuđa.

²² Phung Israel dơi đah phung Yuđa, jêh ri khân păng nchuăt du, ăp nơm plơ̆ sĭt ma rmlak khân păng nơm.

²³ Ta Bet-Sêmes, hađăch Israel jêng Y-Jôas nhŭp Y-Amasia, hađăch Yuđa, kon Y-Jôas, sau Y-Jôacha, jêh ri njŭn leo păng ma ƀon Yêrusalem. Hađăch Jôas mbang chah mpêr ƀon Yêrusalem ntơm bơh mpông Êphraim tât ma mpông Njônh, du rva jong geh bar rhiăng met.

²⁴ Păng sŏk lĕ mah, prăk, jêh ri lĕ ndơ dŏng tâm ngih Brah Ndu jêng lĕ ndơ dŏng Y-Ôbet-Êđôm mât uănh, nđâp ma lĕ ndô ndơ khlay tâm ngih hađăch. Hađăch Jôas ăt nhŭp lĕ bu nă jêh nây plơ̆ sĭt ma ƀon Samari.

Y-Amasia khĭt

²⁵ Jêh hađăch Jôas, kon Y-Jôacha, hađăch Israel khĭt, pôri Y-Amasia, kon Y-Jôas, hađăch Yuđa hôm e rêh jât ma prăm năm đŏng.

²⁶ Lĕ kan êng êng Y-Amasia ƀư, bơh ntơm tât lôch, bu nchih da dê tâm ndrom samƀŭt Phung Hađăch Yuđa jêh ri Israel.

²⁷ Ntơm bơh rnôk Y-Amasia chalơi Brah Yêhôva, geh nơm tâm nchră tâm rdâng đah hađăch ta ƀon Yêrusalem. Hađăch du nchuăt du tât ma Lakis, ƀiălah bu hăn tĭng păng tât ta ƀon Lakis jêh ri nkhĭt păng ta nây.

²⁸ Jêh nây khân păng sŏk seh rdeng săk jăn păng plơ̆ sĭt jêh ri tâp păng tâm ƀon Yuđa ndrel ma phung chô yau păng.