II Nau Rêh Jêng 24 - Nau Brah Ndu Ngơi 2023

Y-Jôas nkra đŏng ngih brah

¹ Nôk hao jêng hađăch, Y-Jôas geh pơh năm jêh ri chiă uănh puăn jât năm ta Yêrusalem. Me păng amoh H'Sibia bơh ƀon tơm ta Bêr-Sêba.

² Y-Jôas ƀư nau di tanăp măt Brah Yêhôva tâm lĕ rnôk rô̆ kôranh ƀư brah Y-Jêhôida hôm rêh.

³ Y-Jêhôida joi bar hê ur ma Y-Jôas, păng geh phung kon bu klâu jêh ri phung kon bu ur.

⁴ Jêh nau nây, Y-Jôas geh nau mĭn nkra tay ngih Brah Yêhôva.

⁵ Păng tâm rƀŭn phung kôranh ƀư brah, phung Lêvi jêh ri lah: “Hăn hom ma lĕ rngôch ƀon tâm n'gor Yuđa, jêh ri riu prăk tâm lĕ rngôch phung Israel gay ăp năm nkra tay ngih Brah Ndu khân may. Khân may ƀư hom kan ăn gơnh.” Ƀiălah phung Lêvi mâu ƀư gơnh ôh kan nây.

⁶ Hađăch jă kôranh ƀư brah toyh lơn Y-Jêhôida tât jêh ri ôp: “Mâm ƀư may mâu kêh phung Lêvi djôt chê̆ rnoh prăk pi bơh phung Yuđa jêh ri phung gŭ ta Yêrusalem tĭng nâm Y-Môis, oh mon Brah Yêhôva, hŏ tâm nal jêh ma phung Israel tâm rƀŭn chê̆ prăp ma Ngih Bok Nau Tâm Rnglăp?”

⁷ Yorlah phung kon bu klâu H'Athali, bu ur janh ƀai nây, hŏ ƀư ƀơ̆ ngih Brah Ndu; khân păng dŏng tay lĕ ndơ kloh tâm ngih Brah Yêhôva ăn ma brah Baal.

⁸ Hađăch ntrŭnh ăn bu ƀư du mlâm hip dơm padih mpông ngih Brah Yêhôva.

⁹ Jêh nây bu mbơh lam n'gor Yuđa jêh ri ƀon Yêrusalem pô aơ ăp nơm djôt nhhơr ma Brah Yêhôva prăk pi Y-Môis, oh mon Brah Ndu, hŏ tâm nal jêh ma phung Israel tâm bri rdah.

¹⁰ Lĕ rngôch phung kôranh jêh ri lĕ rngôch phung ƀon lan hâk răm da dê, djôt leo prăk pi chê̆ tâm hip kŏ tât bêng hip.

¹¹ Lah saơ tâm hip bêng prăk, phung Lêvi djôt jao ma phung pah kan ma hađăch. Nơm nchih samƀŭt ma hađăch jêh ri bunuyh pah kan ma kôranh ƀư brah toyh lơn văch nkhŭt prăk tâm hip nây, jêh nây djôt leo mplơ̆ sĭt hip ma ntŭk ơm. Ăp nar, khân păng ƀư kơt nĕ jêh ri riu prăp âk râk ngăn.

¹² Hađăch jêh ri Y-Jêhôida jao prăk nây ma phung mât uănh nau kan ngih Brah Yêhôva. Khân păng nkhôm phung châm trah lŭ jêh ri phung trah si gay nkra tay ngih Brah Yêhôva; khân păng nkhôm đŏng phung pah kan ma loih jêh ri kông gay nkra ngih brah.

¹³ Pôri, lĕ rngôch phung blau nây ƀư nau kan, jêh ri tă bơh nĕ nau kan nkra tay ngih brah dơi ƀư lôch. Khân păng nkra tay ngih Brah Ndu tâm ban nâm ơm jêh ri ƀư ăn nâp lơn.

¹⁴ Lah ƀư lôch jêh, khân păng leo prăk hôm e rmeh tât tanăp măt hađăch jêh ri Y-Jêhôida. Bu dŏng prăk nây ƀư lĕ ndơ dŏng ma ngih Brah Yêhôva, jêng lĕ ndơ dŏng prăp ma nau yơk mbah jêh ri nhhơr ndơ ƀư brah gŭch, kachok jêh ri lĕ ndơ dŏng ma mah jêh ri prăk. Lôch nau rêh Y-Jêhôida, bu nhhơr ƀaƀơ ndơ ƀư brah gŭch ta ngih Brah Yêhôva.

Y-Jêhôida khĭt

¹⁵ Nôk nây, Y-Jêhôida lĕ ranh, âk năm jêh ri păng khĭt; ta nar păng khĭt, păng geh du rhiăng pe jât năm.

¹⁶ Khân păng tâp păng tâm ƀon Đavit ndrel ma phung hađăch, yorlah păng ƀư nau ueh tâm n'gor Israel tâm nau pah kan Brah Ndu jêh ri nkra tay ngih brah Păng.

Y-Jôas ƀư tih mbah rup brah

¹⁷ Lah Y-Jêhôida hŏ khĭt jêh, phung kôranh Yuđa văch tâm mâp đah hađăch. Bơh nĕ, hađăch iăt tĭng nau khân păng,

¹⁸ chalơi ngih Yêhôva Brah Ndu phung chô yau khân păng, jêh ri pah kan ma phung brah Asêrah jêh ri ma phung rup brah êng. Yor nau tih nây, nau Kôranh Brah ji nuih tât ta phung Yuđa jêh ri phung ƀon Yêrusalem.

¹⁹ Brah Yêhôva đă phung nơm mbơh lor tât ma khân păng, gay njŭn leo khân păng plơ̆ tay ma Brah Yêhôva, ƀiălah khân păng mâu iăt ôh.

²⁰ Huêng Brah Brah Ndu tât Y-Sakari, kon bu klâu kôranh ƀư brah Y-Jêhôida. Păng gŭ tanăp phung ƀon lan jêh ri lah: “Brah Ndu lah: ‘Mâm ƀư khân may ƀư tih nau vay Brah Yêhôva ntăm? Khân may mâu mra dơi jêng yorlah khân may hŏ chalơi Brah Yêhôva, jêh ri Brah Yêhôva lĕ chalơi jêh khân may tâm ban lĕ.’ ”

²¹ Khân păng tâm rnglăp ndrel rdâng đah păng, jêh ri tĭng nâm nau hađăch ntrŭnh, khân păng klŭp păng ma lŭ tâm nkual toyh ngih Brah Yêhôva.

²² Pônây, hađăch Jôas mâu knŏng chuêl jêh nau yô̆ Y-Jêhôida, mbơ̆ Y-Sakari, hŏ ƀư jêh ma păng, ƀiălah hôm nkhĭt đŏng kon bu klâu păng. Nôk dăch khĭt, Y-Sakari lah: “Dăn Brah Yêhôva sek uănh jêh ri plơng bôk!”

Phung tahan Aram sŏk pit Yêrusalem. – Bu nkhĭt Y-Jôas

²³ Ta dăch lôch năm, phung tahan Aram văch tâm lơh đah Y-Jôas. Khân păng tât ma Yuđa jêh ri ma Yêrusalem, nkhĭt lĕ rngôch phung kôranh chiă uănh tâm phung ƀon lan, jêh nây njuăl lĕ ndô ndơ khân păng pit in ma hađăch khân păng nơm ta Damas.

²⁴ Nđâp tơlah, phung tahan Aram văch knŏng djê̆ bunuyh, ƀiălah Brah Yêhôva hŏ jao jêh du phung tahan âk ngăn tâm ti phung Aram, yorlah khân păng hŏ chalơi jêh Yêhôva Brah Ndu phung chô yau khân păng. Pônây, phung Aram tâm rmal Y-Jôas.

²⁵ Tơlah phung tahan Aram hŏ plơ̆ rŭch jêh, chalơi êng Y-Jôas gŭ păm rmanh jru. Phung oh mon păng tâm nchră ndrel tâm rdâng đah păng yorlah rnon mham kon bu klâu kôranh ƀư brah Y-Jêhôida. Khân păng nkhĭt păng ta klơ sưng bê̆ch. Bu tâp păng tâm ƀon Đavit, ƀiălah mâu di tâm môch ma phung hađăch ôh.

²⁶ Aơ jêng phung hŏ tâm rdâng đah hađăch: Y-Saƀat, kon bu klâu H'Simêat jêng bu ur Ammôn; jêh ri Y-Jêhôsaƀat, kon H'Simrit jêng bu ur Môap.

²⁷ Bi ma nau kan ma phung kon bu klâu păng, lĕ nau mbơh lor tâm rdâng đah păng, jêh ri nau nkra tay ngih Brah Ndu bu nchih da dê tâm kô̆ nkoch bri ndrom samƀŭt Phung Hađăch. Y-Amasia, kon bu klâu păng, hao klơ sưng hađăch chiă uănh thoi păng.