II Nau Rêh Jêng 23 - Nau Brah Ndu Ngơi 2023

Y-Jêhôida njêng Y-Jôas jêng hađăch Yuđa

¹ Tâm năm rơh pơh, Y-Jêhôida sŏk nau dăng ktang gay jă phung kôranh chiă uănh toyh ma du rhiăng bunuyh tahan jêng: Y-Asaria, kon Y-Jêrôham; Y-Ismaêl, kon Y-Jôhanan; Y-Asaria, kon Y-Ôbet; Y-Maseya, kon Y-Adaya; jêh ri Y-Êlisaphat, kon Y-Sikri. Păng ƀư nau tâm rnglăp đah phung nây.

² Khân păng nsong lam n'gor Yuđa, tâm rƀŭn phung Lêvi bơh lĕ rngôch rplay ƀon tâm n'gor Yuđa jêh ri phung kôranh ndŭl mpôl phung Israel. Jêh nây khân păng văch ta Yêrusalem.

³ Lĕ rngôch phung tâm rƀŭn ƀư nau tâm rnglăp đah hađăch tâm ngih Brah Ndu. Y-Jêhôida lah ma khân păng pô aơ: “Aơ, kon bu klâu hađăch, păng mra chiă uănh tĭng nâm nau Brah Yêhôva ngơi jêh ma phung kon sau Y-Đavit.

⁴ Aơ jêng nau ăn khân may mra ƀư: Du kô̆ tâm pe tâm phung khân may, jêng phung kôranh ƀư brah jêh ri phung Lêvi tâm pah kan tâm nar saƀat mra mât chăm mpông sâng;

⁵ du kô̆ tâm pe mra gŭ chăm tâm ngih hađăch; jêh ri du kô̆ tâm pe gŭ ta ntŭk mpông pêr Jêsôt. Bi lĕ rngôch phung ƀon lan mra gŭ tâm ndring ngih Brah Yêhôva.

⁶ Lơi ăn du huê lăp ôh tâm ngih Brah Yêhôva, knŏng ma phung kôranh ƀư brah jêh ri phung Lêvi gŭ pah kan; khân păng dơi lăp, yorlah khân păng jêng phung kloh ueh. Bi lĕ rngôch phung ƀon lan mra djôt prăp da dê nau ntrŭnh bơh Brah Yêhôva.

⁷ Phung Lêvi mra gŭ jŭm hađăch, ăp nơm djôt ndơ tâm lơh tâm ti, mbu nơm lăp tâm ngih brah bu mra nkhĭt. Lĕ phung khân may hăn gŭ êp meng hađăch tơlah păng hăn luh hăn lăp.”

Bu n'hao Y-Jôas ƀư hađăch

⁸ Phung Lêvi jêh ri lĕ rngôch phung Yuđa ƀư tĭng nâm lĕ nau kôranh ƀư brah Y-Jêhôida ntĭnh jêh. Ăp nơm mât mray phung băl păng, nđâp lah phung ntơm tâm pah kan nar saƀat mâu lah phung ƀư lôch jêh pah kan tâm nar saƀat, yorlah kôranh ƀư brah Y-Jêhôida mâu ăn sĭt rlu ôh.

⁹ Kôranh ƀư brah Y-Jêhôida sŏk tak, khêl jê̆ jêh ri toyh hađăch Đavit dơm tâm ngih Brah Ndu ăn ma phung kôranh chiă uănh toyh ma rhiăng bunuyh tahan.

¹⁰ Păng dơm lĕ rngôch phung gak hađăch, ăp nơm djôt ndơ tâm lơh tâm ti, dăp mbor văr jŭm hađăch, njŏ tĭng nơng ƀư brah jêh ri ngih brah, ntơm bơh pa ma tât ma pa chiau ngih brah.

¹¹ Păng njŭn leo kon bu klâu hađăch luh, ndô đon hađăch klơ bôk păng, jêh ri ăn samƀŭt Nau Tâm Rnglăp ma păng; jêh ri n'hao păng ƀư hađăch. Y-Jêhôida jêh ri phung kon bu klâu păng tŏ dak ƀâu kah ma Y-Jôas, jêh nây nter lah: “Hađăch gŭ rêh n'ho ro!”

Bu nkhĭt lơi H'Athali

¹² Lah H'Athali tăng nteh phung ƀon lan ƀă nchuăt ƀă mât ton ma hađăch, păng hăn tât tâm mâp ma phung ƀon lan gŭ tâm ngih Brah Yêhôva.

¹³ Păng uănh saơ hađăch gŭ dâk klơ knưl ta mpông ntŭk lăp, kôranh chiă uănh toyh jêh ri phung bunuyh uh nŭng gŭ dâk êp kêng hađăch, bi lĕ rngôch phung ƀon lan tâm n'gor hâk răm uh nŭng da dê, jêh ri phung mprơ ndrel lĕ ntil gong tâm rnê da dê. Saơ pônây, H'Athali nkhêk ao păng ro jêh ri nter: “Nau ƀlêp ƀlêr! Nau ƀlêp ƀlêr!”

¹⁴ Kôranh ƀư brah Y-Jêhôida ntĭnh ma phung kôranh chiă uănh toyh ma rhiăng nuyh tahan, jêng phung geh nau kan chiă uănh ma phung tahan, hăn luh jêh ri ntăm ma khân păng: “Njŭn hom păng luh bơh ngih brah, ta nklang phung tahan! Mbu moh tĭng păng bu mra nkhĭt lơi ma đao.” Yorlah kôranh ƀư brah hŏ ntĭm jêh: “Lơi nkhĭt ôh păng tâm ngih Brah Yêhôva.”

¹⁵ Khân păng nhŭp jêh ri leo păng hăn tĭng ntŭk lăp Mpông Pêr Seh tâm ngih hađăch, jêh nây nkhĭt lơi păng ta nây.

Y-Jêhôida njêng đŏng nau yơk mbah Brah Ndu

¹⁶ Y-Jêhôida ƀư nau tâm rnglăp păng nơm đah lĕ rngôch phung ƀon lan jêh ri đah hađăch, gay ma khân păng ton nanê̆ mra jêng phung ƀon lan ma Brah Yêhôva.

¹⁷ Pakơi nây, lĕ rngôch phung ƀon lan hăn tât ta ntŭk yơk mbah brah Baal gay ƀư rlâm lơi păng; khân păng mbang nchah nơng ƀư brah jêh ri rup brah păng, jêh nây nkhĭt Y-Matan, kôranh ƀư brah ma brah Baal, ta panăp nơng ƀư brah.

¹⁸ Tĭng nâm di tâm ndăch Y-Đavit hŏ dơm tâm ngih Brah Yêhôva, Y-Jêhôida jao nau pah kan tâm ngih Brah Yêhôva ma phung kôranh ƀư brah jêng noi Lêvi, gay khân păng nhhơr lĕ ndơ ƀư brah gŭch ma Brah Yêhôva tĭng nâm nau nchih jêh tâm ndrom samƀŭt nau vay Y-Môis, jêh ri mprơ tâm nau hâk răm tĭng nâm nau Y-Đavit hŏ tâm nal jêh.

¹⁹ Păng dơm đŏng phung gak njrăng lĕ mpông pêr ngih Brah Yêhôva, mâu ăn ma du huê bunuyh ƀơ̆ dơi lăp ta ngih brah nây ôh.

²⁰ Nglĕ dŭt, păng gai phung kôranh chiă uănh toyh ma rhiăng bunuyh tahan, phung ndrŏng, phung kôranh chiă uănh jêh ri lĕ rngôch phung ƀon lan tâm bri nây; khân păng hăn vơt hađăch bơh ngih Brah Yêhôva, chuat rgăn mpông pêr pa lơ, njŭn tât ma ngih hađăch, jêh nây khân păng ăn hađăch gŭ ta sưng hađăch ma mah.

²¹ Lĕ rngôch phung ƀon lan tâm n'gor hâk răm da dê, jêh ri ƀon Yêrusalem gŭ đăp mpăn lah jêh khân păng nkhĭt H'Athali ma đao.