II Nau Rêh Jêng 22 - Nau Brah Ndu Ngơi 2023

Nau Y-Ahasia chiă uănh

¹ Phung gŭ tâm ƀon Yêrusalem n'hao kon bu klâu mpŏt Y-Jôram jêng Y-Ahasia, hao jêng hađăch chiă uănh thoi mbơ̆ păng; yorlah phung tahan văch ndrel phung Arabi hăn rduh lăp pôih tahan Yuđa nkhĭt lĕ rngôch kon bu klâu ranh lơn păng. Tâm ban pônây, kon bu klâu Y-Jôram jêng Y-Ahasia hao jêng hađăch phung Yuđa.

² Nôk păng jêng hađăch, Y-Ahasia geh bar jât ma bar năm jêh ri păng chiă uănh du năm tâm Yêrusalem. Mê̆ păng amoh jêng H'Athali, jêng sau bu ur Y-Ômri.

³ Păng ăt hăn tĭng lĕ trong ndô̆ ngih Y-Ahap, yorlah me păng jêng nơm nsŭk ma păng ƀư nau mhĭk.

⁴ Păng ƀư nau mhĭk tanăp măt Brah Yêhôva, nâm bu ngih Y-Ahap hŏ ƀư jêh. Yorlah jêh mbơ̆ păng khĭt jêh, phung ngih Y-Ahap jêng phung ƀư nau ndơm ma păng tât nau rai lôch.

⁵ Iăt tĭng nau nchră khân păng, Y-Ahasia ndrel ma Y-Jôram, kon bu klâu Y-Ahap, hađăch Israel, jă phung tahan hăn tât Ramôt-Gilêat, gay tâm lơh đah Y-Hasael, hađăch Aram. Phung Aram ƀư ăn ma Y-Jôram geh nau sôt rmanh.

⁶ Păng plơ̆ sĭt ta Jesrêel gay săm ăn bah lĕ sôt rmanh dôl păng tâm lơh ta Rama đah Y-Hasael, hađăch Aram. Nôk nây, Y-Ahasia, kon bu klâu Y-Jôram, hađăch Yuđa, hăn jŭr ta Jesrêel gay khâl Y-Jôram, kon bu klâu Y-Ahap.

⁷ Nau Y-Ahasia hăn chop khâl Y-Jôram jêng bơh nau mĭn Brah Ndu gay leo Y-Ahasia tât ntŭk rai lôch. Ngăn yơh lah păng tât ta nây, păng ndrel ma Y-Jôram hăn lơh Y-Jêhu, kon Y-Nimsi, jêng nơm Brah Yêhôva tŏ jêh dak ƀâu kah ăn ƀư rai ngih Y-Ahap.

⁸ Tâm nôk ƀư rai ngih Y-Ahap, Y-Jêhu tâm mâp đŏng đah phung kôranh bri Yuđa jêh ri phung kon bu klâu phung oh nâu Y-Ahasia, phung pah kan Y-Ahasia, Y-Jêhu nkhĭt khân păng ro.

⁹ Y-Jêhu tĭng joi đŏng Y-Ahasia dôl gŭ krap ta Samari. Bu nhŭp Y-Ahasia njŭn leo ma Y-Jêhu, păng ntrŭnh nkhĭt lơi hađăch Ahasia. Bu tâp păng ăn ueh yorlah bu lah: “Păng jêng kon sau ma Y-Jôsaphat, jêng nơm tǐng joi Brah Yêhôva ma lĕ nuih n'hâm.” Pôri ngih Y-Ahasia mâu hôm geh du huê dơi chiă uănh ƀon bri hađăch ôh.

H'Athali pit in sưng hađăch

¹⁰ Lah H'Athali, mê̆ Y-Ahasia, saơ kon bu klâu păng khĭt jêh, păng dâk jêh ri ƀư rai lĕ rngôch noi deh hađăch ngih Yuđa ro.

¹¹ Ƀiălah H'Jôsaƀat, kon bu ur hađăch Jôram, nhŭp rdu Y-Jôas, kon bu klâu Y-Ahasia, ntŭng djôt leo luh bơh phung kon bu klâu hađăch bu ŭch nkhĭt, jêh nây rdu pôn Y-Jôsa tâm jrô bê̆ch nđâp ma nơm rong păng. Pôri, H'Jôsaƀat, kon bu ur hađăch Jôram, ur kôranh ƀư brah Y-Jêhôida, hŏ pôn Y-Jôas lơi ăn H'Athali saơ, pôri H'Athali mâu dơi nkhĭt păng ôh. H'Jôsaƀat jêng ruh Y-Ahasia.

¹² Y-Jôas gŭ krap ndrel khân păng tâm prao năm tâm ngih brah Brah Ndu, tâm nôk H'Athali chiă uănh tâm n'gor.