II Nau Rêh Jêng 21 - Nau Brah Ndu Ngơi 2023

Nau Y-Jôram chiă uănh

¹ Y-Jôsaphat khĭt hăn gŭ ndrel ma phung chô yau păng jêh ri bu tâp păng ndrel ma khân păng tâm ƀon Đavit. Kon bu klâu păng jêng Y-Jôram gŭ ta sưng hađăch chiă uănh thoi păng.

² Phung kon bu klâu Y-Jôsaphat, phung oh Y-Jôram, jêng Y-Asaria, Y-Jêhiêl, Y-Sakari, Y-Asaria, Y-Mikel jêh ri Y-Sêphatia; lĕ rngôch phung nây jêng phung kon bu klâu Y-Jôsaphat, hađăch Israel.

³ Mbơ̆ khân păng ăn jêh ma khân păng âk drăp ndơ ma prăk jêh ri mah, lĕ ndô ndơ khlay, nđâp ma lĕ ƀon nâp tâm bri Yuđa. Ƀiălah Y-Jôsaphat ăn ƀon bri hađăch ma Y-Jôram, yorlah păng jêng kon bu klâu bôk rah.

⁴ Tơlah Y-Jôram hao jêh klơ sưng hađăch chiă uănh thoi mbơ̆ păng jêh ri ƀư ktang nau dăng ma nau păng sŏk đao nkhĭt lĕ rngôch phung oh păng jêh ri phung ƀaƀă kôranh Israel.

⁵ Y-Jôram hao jêh klơ sưng hađăch nôk geh pe jât ma bar năm, jêh ri chiă uănh pham năm ta ƀon Yêrusalem.

⁶ Păng hăn tĭng ndô̆ trong phung hađăch Israel, nâm bu ngih Y-Ahap hŏ ƀư jêh, yorlah păng sŏk kon bu ur Y-Ahap jêng ur păng. Păng ƀư nau mhĭk tanăp măt Brah Yêhôva.

⁷ Ƀiălah, yorlah Brah Yêhôva hŏ ƀư jêh nau tâm rnglăp đah Y-Đavit, Păng hŏ ton mra ăn du mlâm ŭnh kađen ma Y-Đavit jêh ri ăn tât ma phung kon sau păng kŏ tât ƀaƀơ n'ho ro, yor ri Păng mâu ŭch ƀư rai ngih Y-Đavit.

Nau phung Êđôm tâm rdâng

⁸ Tâm rnôk rô̆ Y-Jôram chiă uănh, phung Êđôm dâk tâm rdâng đah phung Yuđa jêh ri njêng du huê hađăch ma khân păng nơm.

⁹ Y-Jôram ndrel ma phung kôranh chiă uănh jêh ri lĕ rngôch ndeh seh n'hoch phung tahan hăn nau tâm lơh. Phung tahan Êđôm nchueng jŭm păng jêh ri phung kôranh tahan ƀĭt ndeh seh păng, ƀiălah tâm bri măng, hađăch dâk rduh lơh khân păng.

¹⁰ Pôri, phung Êđôm dâk tâm rdâng ma nau phung Yuđa chiă uănh kŏ tât ta nar aơ. Tâm nôk nây, phung ƀon lan ƀon Lipna dâk đŏng tâm rdâng đah nau Y-Jôram chiă uănh, yorlah păng chalơi jêh Yêhôva Brah Ndu phung chô yau păng.

Samƀŭt bơh Y-Êli

¹¹ Hađăch ndâk đŏng lĕ ntŭk prêh klơ lĕ yôk Yuđa, ƀư ăn phung ƀon lan gŭ tâm ƀon Yêrusalem yơk mbah rup brah, jêh ri njŭn leo phung Yuđa hăn lăp trong nhhơt.

¹² Nơm mbơh lor Y-Êli njuăl samƀŭt ma Y-Jôram, lah pô aơ: “Yêhôva Brah Ndu Y-Đavit chô yau may, hŏ ntăm jêh: ‘Yorlah may mâu hăn tĭng ndô̆ trong Y-Jôsaphat, mbơ̆ may, mâu đŏng hăn tĭng trong Y-Asa, hađăch Yuđa,

¹³ ƀiălah may hŏ hăn tĭng trong phung hađăch Israel, ƀư ăn phung Yuđa jêh ri phung gŭ tâm ƀon Yêrusalem yơk mbah rup brah nâm bu ngih Y-Ahap hŏ ƀư. Rlau lơn ma nĕ, may hŏ nkhĭt jêh phung oh nâu may bơh ngih mbơ̆ may, jêng phung ueh lơn ma may.

¹⁴ Aơ, Brah Yêhôva mra nkhŭt nau mhĭk toyh ma phung ƀon lan may, ma phung kon may, ma phung ur may, jêh ri ma lĕ rngôch drăp ndơ may geh.

¹⁵ Bi may nơm mra geh âk nau ji tâm proch khŭng, lơ nar lơ hâu glăm ngăn tât nôk proch khŭng may tăch grăl.’”

¹⁶ Rlau ma nây, Brah Yêhôva nsŭk nsôr nsônh đŏng ma phung Philistin jêh ri phung Arabi, gŭ dăch phung Kus, tâm rdâng đah Y-Jôram.

¹⁷ Khân păng văch tâm lơh đah phung Yuđa, rvan pit n'gor Yuđa jêh ri pit in lĕ rngôch drăp ndơ ta ngih hađăch, nhŭp lĕ phung kon bu klâu hađăch nđâp ma ur păng jêh ri phung ur yông; knŏng hôm e kon mpŏt jêng Y-Jôacha, mâu hôm klen du huê kon bu klâu êng ôh.

Nau ji jêh ri nau Y-Jôram khĭt

¹⁸ Jêh lĕ nau nây, Brah Yêhôva ƀư nau mhĭk ma păng, ƀư ăn păng geh nau ji tâm proch khŭng mâu hôm blau bah ôh.

¹⁹ Âk nar khay lăn jêh, nau ji păng jŏ jong tâm bar năm. Nglĕ dŭt, proch khŭng Y-Jôram tăch grăl luh du padih, jêh ri păng khĭt ma nau nđêh nji ngăn. Phung ƀon lan păng mâu geh mpoh ŭnh toyh gay klâng rngot ma păng ôh, nâm bu hŏ ƀư jêh ma phung chô yau păng.

²⁰ Y-Jôram hao klơ sưng hađăch nôk geh pe jât ma bar năm, jêh ri păng chiă uănh pham năm ta Yêrusalem. Păng khĭt mâu geh ôh bunuyh klâng ndrê ma păng. Bu tâp păng tâm ƀon Đavit, ƀiălah mâu dơm tâm môch phung hađăch ôh.