II Nau Rêh Jêng 20 - Nau Brah Ndu Ngơi 2023

Phung tahan Môap jêh ri phung mpeh băl păng hăn tâm lơh đah Y-Jôsaphat

¹ Jêh nau nây, phung Môap jêh ri phung Ammôn, ndrel ma phung ƀaƀă Mêun hăn tĭng khân păng, n'hoch văch ŭch tâm lơh đah Y-Jôsaphat.

² Bu mbơh ma Y-Jôsaphat pô aơ: “Geh du phung tahan âk ngăn tă bơh kơh dak mƀŭt đah ri, tă bơh bri Êđôm tât ŭch tâm lơh đah may; jêh ri aơ, khân păng gŭ ta Hasasôn Tamar, tâm ban đŏng rnha jêng Êngêdi.”

³ Y-Jôsaphat klach, jêh ri tǐng joi Brah Yêhôva, jêh ri kuăl ma lĕ rngôch phung Yuđa ât sông sa.

⁴ Phung Yuđa tâm rƀŭn gay kuăl dăn Brah Yêhôva kơl. Tă bơh lĕ rngôch ƀon n'gor Yuđa, khân păng văch ŭch joi Brah Yêhôva.

Y-Jôsaphat mbơh sơm

⁵ Y-Jôsaphat dâk ta nklang phung Yuđa tâm rƀŭn jêh ri Yêrusalem, panăp ndring mhe tâm ngih Brah Yêhôva

⁶ mbơh sơm pô aơ: “Ơ Yêhôva Brah Ndu phung che hên! Mâu di hĕ May jêng Kôranh Brah gŭ ta klơ lĕ ndâr trôk? Mâu di hĕ May jêng Nơm chiă uănh ma lĕ rngôch ntil mpôl bunuyh bơh lĕ rngôch bri dak? Tâm ti May geh nau brah jêh ri nau ktang, pôri mâu geh du huê dơi tâm rdâng ôh đah May.

⁷ Ơ Brah Ndu hên! Mâu di hĕ May mprơh jêh phung gŭ tâm n'gor aơ luh bơh phung ƀon lan Israel, jêh ri ăn ma n'gor aơ ma noi deh Y-Abraham, mĭt jiăng May, gay ƀư drăp ndơn n'ho ro ƀơh?

⁸ Khân păng gŭ jêh ta nây jêh ri ndâk jêh ma amoh May du ngih brah kloh ueh, jêh ri lah pô aơ:

⁹ ‘Tơlah nau mhĭk tât ma hên, mâu lah đao tak, mâu lah nau phat dôih, mâu lah nau ji kuet, mâu lah nau ji ngot, hên mra gŭ dâk tanăp ngih aơ jêh ri panăp May (yorlah amoh May gŭ tâm ngih brah aơ), jêh ri vơl dăn ma May dôl hên geh nau rêh ni hâu ngăn, May mra tăng jêh ri tâm rklaih hên.’

¹⁰ Dôl phung ƀon lan Israel luh tă bơh n'gor Êjipt, May mâu ăn ôh khân păng hăn lăp tâm n'gor phung Ammôn, phung Môap jêh ri phung ta n'gor yôk Sêir, pôri phung Israel ndôn kơi tă bơh khân păng jêh ri mâu ƀư rai khân păng ôh.

¹¹ Nĕ, aƀaơ khân păng plơng hên, văch gay mprơh hên tă bơh drăp ndơn May hŏ ăn jêh ma hên.

¹² Ơ Brah Ndu hên! Mâu di hĕ May mra phat dôih khân păng? Yorlah hên mâu tŏng nau ktang gay tâm rdâng đah phung tahan âk râk dôl văch lơh hên. Hên mâu gĭt ôh mâm mra ƀư, ƀiălah măt hên gŭ uănh ma May!”

¹³ Lĕ rngôch phung Yuđa, nđâp phung ur, phung kon se, gŭ dâk panăp Brah Yêhôva da dê.

¹⁴ Nôk nây ta nklang phung tâm rƀŭn, Huêng Brah Yêhôva jŭr gŭ ta Y-Jahasiêl, kon bu klâu Y-Sakari, sau Y-Bênaya, se Y-Jêiêl, săn Y-Matania, jêng bunuyh Lêvi bơh noi deh Y-Asap.

¹⁵ Păng lah: “Ơ lĕ rngôch phung Yuđa jêh ri phung gŭ tâm ƀon Yêrusalem, jêh ri hađăch Jôsaphat, iăt hom! Brah Yêhôva lah ma khân may kơt aơ: ‘Lơi ta klach ôh, lơi krit ôh tanăp phung tahan âk râk nây, yorlah nau tâm lơh aơ mâu jêng kan khân may ôh, ƀiălah jêng kan Brah Ndu.

¹⁶ Ôi taơ, trŭnh tâm lơh hom đah khân păng. Aơ, khân păng hăn hao sop Sis. Khân may mra tâm mâp đah khân păng ta bôl dŭt rlŭng tâm tra đah bri rdah Jêruêl.

¹⁷ Tâm nau lơh nây, khân may mâu mra tâm lơh ôh. Gŭ nâp hom tâm ntŭk jêh ri dâk nsrâng gay kâp uănh nau tâm rklaih Brah Yêhôva, Nơm gŭ ndrel ma khân may. Ơ phung Yuđa jêh ri phung gŭ ta Yêrusalem! Lơi klach ôh, lơi krit ôh! Ôi taơ hăn luh tâm mâp hom đah khân păng, yorlah Brah Yêhôva gŭ ndrel ma khân may.’”

¹⁸ Y-Jôsaphat păn muh măt ta neh. Lĕ rngôch phung Yuđa jêh ri phung gŭ tâm ƀon Yêrusalem păn muh măt da dê panăp Brah Yêhôva yơk mbah ma Păng.

¹⁹ Phung Lêvi jêng noi Kôhat jêh ri noi Kôra dâk da dê tâm rnê ma Yêhôva Brah Ndu Israel ma bâr ngơi huy ngăn.

Y-Jôsaphat dơi tâm lơh

²⁰ Ôi taơ, khân păng kah rngăl ơm ôi jêh ri luh hăn tâm bri rdah Têkôa. Dôl khân păng luh du, Y-Jôsaphat gŭ dâk jêh ri lah: “Ơ phung Yuđa jêh ri phung gŭ tâm ƀon Yêrusalem, iăt hom gâp! Rnơm nsing hom ma Yêhôva Brah Ndu khân may, jêh ri khân may mra dơi nâp; iăt hom phung nơm mbơh lor Păng, jêh ri khân may mra dơi jêng.”

²¹ Hađăch tâm chră jêh đah phung ƀon lan jêh ri păng dơm phung mprơ gay mât ton ma Brah Yêhôva. Khân păng nsoh ao kloh ueh, n'ho chuat panăp phung tahan n'ho tâm rnê Brah Ndu pô aơ: “Tâm rnê lah ueh hom ma Brah Yêhôva, Yorlah nau ueh Păng hôm e tât ƀaƀơ n'ho ro.”

²² Tơlah khân păng ntơm mprơ tâm rnê, Brah Yêhôva dơm du phung gŭ kâp dâp hăn lơh ma phung tahan dôl hăn lơh phung Yuđa jêng phung Ammôn, phung Môap jêh ri phung gŭ ta yôk Sêir, jêh ri ƀư ăn phung tahan nây roh rai.

²³ Phung Ammôn jêh ri phung Môap dâk tâm lơh đah phung gŭ ta klơ yôk Sêir jêh ri ƀư rai lĕ khân păng. Lah ƀư rai jêh phung tahan gŭ ta Sêir, khân păng plơ̆ sĭt tâm ntâp nkhĭt ndrăng khân păng nơm.

²⁴ Tơlah phung Yuđa tât jêh ma ngih tŭm gak tâm bri rdah, n'gơr uănh mpeh phung tahan âk nây, jêh ri saơ săk jăn phung rlăng khĭt mbrach tâm neh, mâu geh du huê rêh ôh.

²⁵ Y-Jôsaphat jêh ri phung tahan păng tât sŏk pit ndô ndơ, âk ngăn drăp ndơ jêh ri ndơ nkrơ̆ khlay klơ săk jăn phung tahan rlăng. Khân păng sŏk pit ma khân păng nơm kŏ tât khân păng mâu hôm dơi tuy ôh. Khân păng sŏk gro ndô ndơ nây tâm pe nar, yorlah ndô ndơ dŭt âk ngăn.

²⁶ Tât nar rơh puăn, khân păng tâm rƀŭn tâm rlŭng Bêraka, jêh ri tâm rnê ma Brah Yêhôva ta nây; yor nây, bu ntơ ntŭk nây jêng rlŭng Bêraka kŏ tât ta nar aơ.

²⁷ Lĕ rngôch phung Yuđa jêh ri phung gŭ tâm ƀon Yêrusalem, bơh Y-Jôsaphat hăn lor panăp, plơ̆ sĭt rlet ƀon Yêrusalem ma nau răm maak, yorlah Brah Yêhôva hŏ ƀư ăn ma khân păng hâk răm, yor ma phung rlăng khân păng lĕ roh rai jêh.

²⁸ Khân păng sĭt ma ƀon Yêrusalem jêh ri tât ta ngih Brah Yêhôva tâm bâr gong rêng, uh n'hôm jêh ri bâr nŭng.

²⁹ Lah lĕ rngôch ƀon bri hađăch ta klơ neh tăng lư ma Brah Yêhôva hŏ tâm lơh đah phung rlăng Israel, ri mơ dŭt klach krit ma Brah Ndu.

³⁰ Pôri, ƀon bri hađăch Jôsaphat gŭ đăp mpăn, yorlah Brah Ndu ăn ma păng tâm nau mpăn rlêk puăn njônh.

Nglĕ dŭt nau Y-Jôsaphat chiă uănh

³¹ Y-Jôsaphat ƀư hađăch bri dak Yuđa; nôk păng geh pe jât ma prăm năm jêh ri chiă uănh bar jât ma prăm năm ta Yêrusalem. Mê̆ păng amoh H'Asuba, kon bu ur Y-Sihi.

³² Păng hăn tĭng trong mbơ̆ păng jêng Y-Asa, mâu teng bơh trong nây ôh jêh ri ƀư nau ueh tanăp măt Brah Yêhôva.

³³ Ƀiălah păng mâu ƀư rai ôh lĕ ntŭk prêh klơ, jêh ri phung ƀon lan ê hŏ prăp ôh nuih n'hâm khân păng ma Brah Ndu phung chô yau păng nơm.

³⁴ Lĕ kan ƀaƀă Y-Jôsaphat ƀư ntơm bơh saơm tât lôch, bu nchih da dê tâm ndrom samƀŭt Y-Jêhu, kon bu klâu Y-Hanani, jêh ri nau nkoch bri nây bu nchih prăp jêh tâm ndrom samƀŭt phung hađăch Israel.

³⁵ Jêh nau nây, Y-Jôsaphat, hađăch Yuđa, tâm rnglăp đah hađăch Israel jêng Y-Ahasia, du huê nơm djơh mhǐk ngăn.

³⁶ Bar hađăch tâm rnglăp ndrel ƀư du mpôl kumpăn hăn ma Tarsis; khân păng ƀư kumpăn ta Êsiôn-Gêber.

³⁷ Nôk nây, Y-Êliêser, kon Y-Dôdava gŭ ta Marêsa, lah nau mbơh lor ma Y-Jôsaphat pô aơ: “Yorlah may hŏ tâm rnglăp jêh đah Y-Ahasia, pôri Brah Yêhôva ƀư rai lơi nau kan may lĕ ƀư jêh.” Jêh ri mpôl kumpăn khân păng ƀư nây nchah rai, mâu dơi hăn tât ma Tarsis ôh.