II Nau Rêh Jêng 2 - Nau Brah Ndu Ngơi 2023

Ndrăp ndâk ngih brah

¹ Y-Salômôn ntĭnh ndâk ngih brah ma amoh Brah Yêhôva jêh ri ndâk ngih hađăch ma păng nơm.

² Y-Salômôn rgum pơh rmưn nuyh tung ndơ jâk, pham rmưn nuyh châm trah lŭ ta n'gor klơ dor yôk, jêh ri pe rbăn prao rhiăng kôranh uănh kan.

Tâm rnglăp đah Y-Hiram, hađăch Tyre

³ Y-Salômôn njuăl nơm mbơh hăn gay lah ma Y-Hiram, hađăch ƀon Tyre: “May hŏ ăn jêh tơm si sêdar ma Y-Đavit, mbơ̆ gâp, gay ndâk ngih hađăch, pônây lĕ sâm ƀư ăn ma gâp đŏng.

⁴ Nar aơ, gâp ntơm ndâk du mlâm ngih brah ma amoh Yêhôva Brah Ndu gâp, prăp êng ngih brah nây jêng kloh ueh ma Păng, gay gŭch ndơ ƀâu kah panăp Păng, nhhơ piăng let nhhơr ƀaƀơ, nhhơr ndơ ƀư brah gŭch ăp kêng ôi jêh ri kêng mhaơ, tâm nar lĕ saƀat, nar rƀŭn khay mhe, mâu lah lĕ nar rƀŭn Yêhôva Brah Ndu ma hên. Nây jêng lĕ du nau vay rƀŭn n'ho ro ma phung Israel.

⁵ Gâp ntơm ndâk ngih brah jêng toyh ueh ngăn ngên, yorlah Brah Ndu hên jêng toyh lơn ma lĕ rngôch brah.

⁶ Ƀiălah, mbu nơm dơi ndâk ngih brah ma Păng? Yorlah lĕ ndâr trôk, nđâp ma lĕ ndâr trôk ta klơ dŭt prêh mâu dơi đŏng tŏng prăp ma Păng! Pônây, mbu nơm gâp jêng, dĭng dơi ndâk du mlâm ngih brah ăn Kôranh Brah? Knŏng ŭch ndâk du mlâm ngih brah prăp gŭch ndơ ƀâu kah tanăp Păng rĭ dơm.

⁷ Pôri aƀaơ, dăn ma may prơh hom ăn ma gâp du huê bunuyh blau pah kan tŏ njêng mah, prăk, kông, loih, blau tanh ma brai chăng, brai sut jêh ri rnô̆, gĭt đŏng trah mon gay pah kan ndrel ma phung blau njêh gŭ tâm n'gor Yuđa jêh ri tâm Yêrusalem, jêng ndơ Y-Đavit, mbơ̆ gâp, hŏ ndrăp rơm jêh.

⁸ Ăt njuăl đŏng ăn ma gâp tơm si sêdar, tơm si chiprơ jêh ri tơm si rte bơh bri Liban. Yorlah gâp gĭt ma phung oh mon may blau kăl tơm si tâm bri Liban. Phung oh mon gâp mra tâm rnglăp ndrel ma phung oh mon may

⁹ gay nkra tơm si ăn âk râk ngăn ma gâp, yorlah ngih brah gâp ŭch ndâk jêng toyh dŭt ueh ngăn jêh ri lơp rmah mha ngăn ngên.

¹⁰ Gâp mra ăn ma phung oh mon may, jêng phung blau kăl tơm si, puăn rkeh puăn rsen lit ba ƀlê lĕ peh jêh, puăn rkeh puăn rsen lit ba ôrgơ, puăn rkeh puăn rsen lit ndrănh, jêh ri puăn rkeh puăn rsen lit dak ngi ôlive.”

¹¹ Y-Hiram, hađăch ƀon Tyre, nchih samƀŭt njuăl ma Y-Salômôn plơ̆ lah kơt aơ: “Yorlah Brah Yêhôva rŏng ma phung ƀon lan Păng ri dĭng Păng njêng jêh hađăch chiă uănh khân păng.”

¹² Y-Hiram plơ̆ lah đŏng: “Mât ton ma Yêhôva Brah Ndu Israel jêng Nơm njêng trôk jêh ri neh ntu, yorlah Păng hŏ ăn jêh ma hađăch Đavit du huê kon geh nau blau mĭn, nau njrăng, jêh ri gĭt rbăng gay ndâk ngih brah ma Păng, jêh ri du mlâm ngih hađăch ma păng nơm.

¹³ Aƀaơ ri, gâp njuăl ma may du huê njêh blau geh nau blau mĭn jêh ri gĭt rbăng amoh Y-Huram-Abi,

¹⁴ kon bu klâu du huê bu ur tâm ndŭl mpôl Dan, mbơ̆ păng jêng bunuyh Tyre. Păng blau ngăn tâm kan tŏ njêng mah, prăk, kông, loih, lŭ jêh ri tơm si, blau tanh brai chăng rhưch, brai rnô̆, jêh ri brai sut jêh ri brai mhay nglang rhên. Păng gĭt vât ăp ntil trah mon, jêh ri dơi ƀư ăp ndô ndơ ueh tĭng nâm bu đă. Păng mra pah kan ndrel ma phung blau njêh may jêh ri phung blau njêh mbơ̆ may jêng Y-Đavit, kôranh gâp.

¹⁵ Pôri aƀaơ, dăn ăn ba ƀlê, ba ôrgơ, dak ngi ôlive jêh ri ndrănh ma phung oh mon may tâm ban may hŏ lah jêh.

¹⁶ Bi hên mra kăl tơm si ta klơ yôk Liban tĭng nâm may ŭch, kât nsum jêng nâm bu rkĭt njŭn tât ta Jôpa tĭng trong dak mƀŭt; jêh nây may mra rdeng păng tât ta Yêrusalem.”

¹⁷ Y-Salômôn kơp lĕ rngôch phung bu năch gŭ tâm bri dak Israel, tĭng nâm nau kơp Y-Đavit, mbơ̆ păng, lĕ rngôch geh du rsen prăm rmưn pe rbăn prao rhiăng nuyh.

¹⁸ Tâm phung nây, păng jao kan geh pơh rmưn nuyh tung ndơ jâk, pham rmưn nuyh châm trah lŭ klơ yôk, jêh ri pe rbăn prao rhiăng nuyh jêng kôranh uănh kan gay ntĭm phung ƀon lan pah kan.