II Nau Rêh Jêng 19 - Nau Brah Ndu Ngơi 2023

Y-Jêhu nơm geh nau tâm saơ nduyh Y-Jôsaphat

¹ Y-Jôsaphat, hađăch Yuđa, plơ̆ sĭt tât ma ngih hađăch ta Yêrusalem tâm nau đăp mpăn.

² Nơm geh nau tâm saơ Y-Jêhu, kon Y-Hanani, hăn tâm mâp đah Y-Jôsaphat jêh ri lah: “Di lĕ may hŏ kơl nơm djơh mhĭk jêh ri rŏng ma phung tâm rmot Brah Yêhôva? Yor nau nây, nau Brah Yêhôva ji nuih tât ma may.

³ Ƀiălah tâm may hôm geh nau ueh, yorlah may pih kloh jêh lĕ rup brah Asêrah ngluh lơi bơh n'gor bri, jêh ri lĕ nuih n'hâm tǐng joi Brah Ndu.”

Nau tâm rgâl mhe bơh Y-Jôsaphat

⁴ Y-Jôsaphat gŭ ta Yêrusalem. Pakơi nây, păng hăn khâl tay tâm phung ƀon lan, ntơm bơh Bêr-Sêba kŏ tât ta bri klơ dor yôk Êphraim, gay njŭn leo khân păng plơ̆ sĭt ma Yêhôva Brah Ndu phung chô yau khân păng.

⁵ Păng dơm phung kôranh phat dôih tâm lam bri, tâm ăp ƀon nâp tâm bri Yuđa, ntơm bơh ƀon aơ tât ta ƀon ri.

⁶ Păng lah ma phung kôranh phat dôih pô aơ: “Njrăng hom moh kan khân may ƀư, yorlah khân may phat dôih mâu di ma bunuyh ôh, ƀiălah yor ma Brah Yêhôva; Păng mra gŭ ndrel ma khân may tâm nau phat dôih.

⁷ Pôri aƀaơ ăn khân may geh nau yơk klach ma Brah Yêhôva, njrăng hom moh nau khân may ƀư, yorlah Yêhôva Brah Ndu he, mâu dơn nau mâu di, gŭ mpeh du ding, mâu lah dơn ndơ bu blŏl.”

⁸ Y-Jôsaphat săch đŏng tâm phung Lêvi, kôranh ƀư brah jêh ri phung kôranh ndŭl mpôl Israel, dơm khân păng ta Yêrusalem, gay phat dôih yor ma Brah Yêhôva jêh ri dăp nkra lĕ nau dôih. Khân păng plơ̆ sĭt ta Yêrusalem da dê.

⁹ Păng ntăm ma khân păng: “Aơ jêng nau khân may mra ƀư: Ăn khân may klach yơk ma Brah Yêhôva, ma nau răp jăp jêh ri ma lĕ nuih n'hâm khân may.

¹⁰ Tơlah phung oh nâu khân may tă bơh lĕ ƀon, djôt leo tât ma khân may, moh nau tâm kuh tâm phong dôih, mâu lah yor nau pling mham, mâu lah ƀư tih nau vay, nau vay ntăm, nau vay ntrŭnh jêh ri nau vay ƀư, ăn khân may ntĭm nti khân păng lơi ƀư tih ôh đah Brah Yêhôva. Lah mâu, nau Păng ji nuih mra nkhŭt ta klơ khân may jêh ri phung oh nâu khân may. Ƀư kơt nây mơ, khân may mâu mra khan nau tih ôh.

¹¹ Aơ, kôranh ƀư brah toyh Y-Amaria mra mât uănh lĕ nau kan prăp ma Brah Yêhôva; bi Y-Sêbadia, kon Y-Ismaêl, kôranh chiă uănh ndŭl mpôl phung Yuđa, mra mât uănh lĕ kan prăp ma hađăch. Geh đŏng phung kôranh phung Lêvi mra pah kan kơl khân may. Nâp nuih n'hâm hom jêh ri pah kan hom! Brah Yêhôva gŭ ndrel ma phung sŏng.”