II Nau Rêh Jêng 18 - Nau Brah Ndu Ngơi 2023

Y-Jôsaphat jêh ri Y-Ahap ƀư nau tâm rnglăp gay rduh lơh phung Aram

¹ Rnôk nây, Y-Jôsaphat geh nau ndrŏng toyh jêh ri nau chrêk rmah; păng njêng rnăk sa đah Y-Ahap.

² Bar pe năm pakơi, păng hăn jô̆ khâl Y-Ahap ta Samari. Y-Ahap sreh âk biăp jêh ri ndrôk ma păng jêh ri ma phung hăn ndrel ma păng, jêh nây nsŭk nsôr Y-Jôsaphat hăn hao tâm lơh đah ƀon Ramôt-Gilêat.

³ Y-Ahap, hađăch Israel lah ma Y-Jôsaphat, hađăch Yuđa, pô aơ: “May ŭch ndrel ma gâp hăn lơh ƀon Ramôt-Gilêat lĕ?” Y-Jôsaphat plơ̆ lah: “Gâp jêng nâm bu may, phung ƀon lan gâp jêng nâm bu ƀon lan may lĕ; hên mra hăn ndrel ma may tâm nau tâm lơh.”

⁴ Y-Jôsaphat lah ma hađăch Israel: “Ƀiălah lor lơn, ăn he ôp hom ma nau Brah Yêhôva ngơi.”

⁵ Hađăch Israel tâm rƀŭn phung nơm mbơh lor, geh klăp lah puăn rhiăng nuyh, jêh ri ôp khân păng: “He dơi hăn tâm lơh đah ƀon Ramôt-Gilêat mâu lah mâu?” Khân păng lah “Hăn hao hom! Brah Ndu mra jao ƀon nây tâm ti hađăch.”

⁶ Ƀiălah Y-Jôsaphat lah tay: “Ta aơ hôm geh nơm mbơh lor êng đŏng ma Brah Yêhôva, gay ma he ôp đŏng?”

⁷ Hađăch Israel plơ̆ lah ma Y-Jôsaphat: “Hôm geh du huê amoh Y-Mika, kon Y-Imla, bơh nơm nây he dơi ôp Brah Yêhôva. Ƀiălah gâp tâm rmot ngăn ma păng, yorlah păng mâu mbơh lor nau ueh ma gâp ôh, ƀiălah knŏng nau mhĭk.” Y-Jôsaphat lah: “Lơi dĭng hađăch ngơi kơt nây!”

⁸ Hađăch Israel kuăl du huê kôranh chiă uănh văch jêh ri lah: “Kuăl hom Y-Mika, kon Y-Imla, văch ta aơ gơnh!”

⁹ Hađăch Israel jêh ri Y-Jôsaphat, hađăch Yuđa, ăp nơm nsoh ao jâr hađăch da dê, gŭ ta sưng hađăch tâm ntŭk mprah ba êp mpông ƀon Samari, bi lĕ rngôch phung nơm mbơh lor ngơi nau mbơh lor panăp bar hê hađăch.

¹⁰ Y-Sêdêkia, kon Y-Kênana, ƀư lĕ nke ma loih, jêh ri lah: “Brah Yêhôva lah: ‘Ma lĕ nke aơ, may mra rduh phung Aram kŏ tât ƀư rai lĕ khân păng.’”

¹¹ Lĕ rngôch nơm mbơh lor lah kơt nĕ da dê: “Hăn tâm lơh hom đah Ramôt-Gilêat, hađăch mra dơi, yorlah Brah Yêhôva mra jao ƀon nây tâm ti hađăch.”

¹² Tâm nôk nây, nơm mbơh hăn kuăl Y-Mika jêh ri lah ma păng pô aơ: “Aơ, lĕ phung nơm mbơh lor ngơi du ai mbơh nau ueh ma hađăch, pôri gâp dăn ma may ngơi hom nau ngơi ueh nâm bu nau khân păng ngơi gay mbơh ma hađăch.”

¹³ Ƀiălah Y-Mika plơ̆ lah: “Tĭng nâm Brah Yêhôva gŭ rêh mro mrăng! moh nau Brah Ndu gâp lah, gâp mra ngơi nau nây.”

¹⁴ Tơlah Y-Mika lĕ tât jêh, Y-Ahap ôp ma păng: “Ơ Y-Mika, he mra hăn lơh ƀon Ramôt-Gilêat mâu lah mâu dơi hăn ôh?” Păng plơ̆ lah: “Hăn hom, hađăch mra dơi yơh jêh ri bu mra jao khân păng tâm ti bar hê hađăch.”

¹⁵ Hađăch lah ma păng: “Ndah nâm hŏ tơ̆ gâp nchâp ma may ton jêng may ngơi knŏng nau ngơi ngăn tâm amoh Brah Yêhôva!”

¹⁶ Y-Mika plơ̆ lah: “Gâp saơ lĕ rngôch phung Israel chah rai pru pra ta klơ lĕ yôk nâm bu phung biăp mâu geh bunuyh rmăk biăp ôh, jêh ri Brah Yêhôva lah: ‘Phung aơ mâu geh ôh kôranh, ăp nơm plơ̆ sĭt hom ma ngih khân păng tâm nau đăp mpăn.’”

¹⁷ Hađăch Israel lah ma Y-Jôsaphat: “Mâu di hĕ gâp lah jêh ma may pônây bunuyh aơ mâu mra mbơh lor ôh nau ueh ma gâp, knŏng jêng nau mhĭk dơm?”

¹⁸ Y-Mika lah tay: “Pôri, iăt hom nau Brah Yêhôva ngơi. Gâp saơ Brah Yêhôva gŭ ta klơ sưng hađăch Păng, bi lĕ rngôch phung tahan tâm trôk gŭ dâk mpeh pa ma jêh ri pa chiau.

¹⁹ Brah Yêhôva lah: ‘Mbu mra ndơm Y-Ahap, hađăch Israel, hăn hao tâm lơh Ramôt-Gilêat gay cha lôt khĭt ta nây?’ Jêh nây nơm plơ̆ lah pô aơ, geh nơm êng plơ̆ lah nau êng.

²⁰ Nôk nây, geh du huê brah tât dâk panăp Brah Yêhôva, jêh ri lah pô aơ: ‘Gâp mra ndơm păng.’ Brah Yêhôva ôp: ‘Mâm nau may ndơm păng?’

²¹ Păng plơ̆ lah: ‘Gâp mra hăn ƀư du huê brah ngơi mƀruh tâm trôm mbung lĕ rngôch nơm mbơh lor păng.’ Brah Yêhôva lah: ‘Di ngăn, may mra ndơm păng. Hăn hom jêh ri ƀư kơt nĕ.’

²² Pônây, aƀaơ uănh ri Brah Yêhôva hŏ dơm jêh du huê brah ngơi mƀruh tâm trôm mbung lĕ rngôch phung nơm mbơh lor may, jêh ri Brah Yêhôva hŏ tâm nal ƀư nau mhĭk ma may.”

²³ Y-Sêdêkia, kon Y-Kênana, hăn văch dăch tap ta bom Y-Mika jêh ri lah: “Ntŭk trong Huêng Brah Yêhôva luh du bơh gâp dĭng hŏ hăn ngơi đah may?”

²⁴ Y-Mika lah: “Aơ, tâm nar may nchuăt tă bơh jrô aơ tât ma jrô ri gay du krap may mra gĭt nau nây.”

²⁵ Hađăch Israel ntrŭnh nau ntăm: “Nhŭp hom Y-Mika njŭn leo păng rlet ma kôranh chiă uănh ƀon jêng Y-Amôn jêh ri ma Y-Jôas kon bu klâu hađăch.

²⁶ Lah hom: ‘Hađăch lah krŭng nơm aơ, sŏk piăng let jêh ri dak nau rêh ni gay siăm păng kŏ tât nôk gâp plơ̆ sĭt đăp mpăn.’”

²⁷ Y-Mika lah: “Tơlah hađăch plơ̆ sĭt đăp mpăn pôri Brah Yêhôva mâu lah ma bâr mbung gâp ôh.” Jêh nây păng lah: “Ơ lĕ rngôch phung ƀon lan, iăt hom nau nây!”

Nau mâu dơi tâm lơh jêh ri nau Y-Ahap khĭt

²⁸ Pôri hađăch Israel jêh ri Y-Jôsaphat, hađăch Yuđa, hăn lơh ma ƀon Ramôt-Gilêat.

²⁹ Hađăch Israel lah đah Y-Jôsaphat pô aơ: “Gâp mra rgâl săk nkrơ̆ ƀư bu êng jêh ri hăn tâm lơh, bi may ăt nsoh ao hađăch.” Pôri, hađăch Israel rgâl săk nkrơ̆ ƀư bu êng, jêh nây bar hê khân păng hăn tâm lơh.

³⁰ Ta lor ri, hađăch Aram hŏ ntĭnh jêh ma phung kôranh chiă uănh tahan ƀĭt ndeh seh pô aơ: “Lơi tâm lơh ôh đah bu, phung jê̆ mâu lah phung toyh, ƀiălah knŏng hăn lơh du huê hađăch Israel dơm.”

³¹ Lah phung kôranh tahan ƀĭt ndeh seh saơ Y-Jôsaphat, khân păng lah: “Aơ jêng hađăch Israel!” Khân păng plơ̆ ro hăn lơh hađăch. Y-Jôsaphat kuăl rklaih jêh ri Brah Yêhôva rklaih păng. Brah Ndu ƀư ăn phung rlăng du tă bơh păng,

³² Yorlah tơlah phung kôranh tahan ƀĭt ndeh seh saơ mâu di hađăch Israel ôh, khân păng nsrŭng, mâu hôm tĭng păng ôh.

³³ Dôl nây, geh du huê bunuyh nkhêp van na pănh di ta hađăch Israel, di tâm ntŭk vah vang nđa nsiap ao loih ndơ nkŭm ntang ntơh. Y-Ahap lah đah nơm ƀĭt ndeh seh păng pô aơ: “Plăch ndeh hom, jêh ri rdeng gâp luh du bơh nau tâm lơh yorlah gâp lĕ rmanh jru jêh.”

³⁴ Nau tâm lơh nar nây jêng ktang ngăn ngên, ƀiălah hađăch Israel ăt dâk mƀin tâm ndeh seh păng, tâm thâng măt đah phung Aram kŏ tât kêng măng. Ta nar nhâp păng khĭt.