II Nau Rêh Jêng 17 - Nau Brah Ndu Ngơi 2023

Ƀon bri hađăch Yuđa ndrŏng ktang tâm rnôk rô̆ hađăch Jôsaphat

¹ Y-Jôsaphat, kon bu klâu Y-Asa, chiă uănh thoi ntrok păng; păng ƀư ma ƀon bri hađăch janh ktang dơi tâm rdâng đah phung Israel.

² Păng dơm phung tahan tâm lĕ rngôch ƀon nâp tâm n'gor Yuđa, ƀư pôih tahan tâm n'gor Yuđa jêh ri tâm lĕ ƀon ta Êphraim jêng lĕ ƀon Y-Asa, mbơ̆ păng hŏ pit in jêh.

³ Brah Yêhôva gŭ ndrel ma Y-Jôsaphat, yorlah păng tĭng ndô̆ trong Y-Đavit hŏ hăn ntơm saơm, chô yau păng, hŏ hăn jêh, mâu joi brah Baal ôh,

⁴ ƀiălah joi Brah Ndu phung chô yau păng, djôt prăp lĕ nau vay Păng ntăm, jêh ri mâu ƀư ôh kơt phung Israel.

⁵ Yor ri, Brah Ndu ƀư ăn ƀon bri hađăch nâp ktang tâm ti păng, lĕ rngôch phung Yuđa nhhơr ndơ ma Y-Jôsaphat, pôri păng dơi geh âk drăp ndơ jêh ri lư n'găr hâu ngăn.

⁶ Păng nâp nuih n'hâm tĭng ndô̆ lĕ trong Brah Yêhôva, mƀăr tay đŏng ntŭk prêh jêh ri lĕ rup brah Asêrim bơh bri Yuđa.

⁷ Tâm năm rơh pe rnôk rô̆ Y-Jôsaphat chiă uănh, păng đă phung kôranh chiă uănh jêng Y-Ben-Hêl, Y-Ôbadia, Y-Sakari, Y-Nêthanel jêh ri Y-Mikaya hăn nti tâm lĕ ƀon n'gor Yuđa.

⁸ Geh đŏng bunuyh Lêvi hăn ndrel ma khân păng jêng Y-Sêmaya, Y-Nêthania, Y-Sêbadia, Y-Asahel, Y-Sêmiramôt, Y-Jônathan, Y-Adônija, Y-Tôbija jêh ri Y-Tôp-Adônija, geh đŏng bar hê kôranh ƀư brah jêng Y-Êlisama jêh ri Y-Jôram hăn ndrel lĕ.

⁹ Khân păng djôt leo ndrom samƀŭt nau vay Brah Yêhôva, hăn lam lĕ ƀon tâm n'gor Yuđa gay nti ma phung ƀon lan.

¹⁰ Brah Yêhôva ƀư ăn ma lĕ bri dak văr jŭm n'gor Yuđa geh nau klach, khân păng mâu janh tâm lơh ôh đah Y-Jôsaphat.

¹¹ Phung Philistin djôt leo ndơ jêh ri prăk nhhơr ma Y-Jôsaphat; phung Arabi leo đŏng ma păng lĕ mpôl mpô mpa rong geh pơh rbăn pơh rhiăng mlâm biăp nkuăng jêh ri pơh rbăn pơh rhiăng mlâm be nkuăng.

¹² Y-Jôsaphat ƀrư̆ nar ƀrư̆ janh ktang. Păng ndâk lĕ pôih nâp jêh ri lĕ ƀon geh jay prăp drăp ndơ khlay tâm n'gor Yuđa.

¹³ Păng geh âk ndô ndơ prăp nkrem tâm ƀon n'gor Yuđa. Tâm ƀon Yêrusalem, păng geh phung tahan janh ktang.

¹⁴ Amoh săk phung bunuyh nây tĭng nâm ndŭl mpôl khân păng kơt aơ: Tâm ndŭl mpôl Yuđa, geh phung kôranh chiă uănh ma du rbăn nuyh tahan jêng Y-Atna, kôranh chiă uănh ma pe rsen nuyh tahan janh ktang;

¹⁵ jêh nĕ geh Y-Jêhôhanan jêng kôranh chiă uănh ma bar rsen pham rmưn nuyh janh ktang;

¹⁶ jêh nây tât Y-Amasia, kon bu klâu Y-Sikri, jêng bunuyh nđơr êng pah kan ma Brah Yêhôva, păng chiă uănh bar rsen bunuyh tahan janh ktang.

¹⁷ Tâm ndŭl mpôl Benjamin geh Y-Êliada jêng du huê tahan janh ktang, chiă uănh ma bar rsen bunuyh tahan djôt na jêh ri khêl;

¹⁸ jêh nây geh Y-Jêhôsaƀat, chiă uănh du rsen pham rmưn bunuyh tahan ndrăp jêh hăn tâm lơh.

¹⁹ Nĕ jêng phung bunuyh pah kan ma hađăch, mâu kơp phung bunuyh hađăch hŏ dơm jêh tâm lĕ ƀon nâp lam n'gor Yuđa.