II Nau Rêh Jêng 16 - Nau Brah Ndu Ngơi 2023

Y-Asa ƀư nau tâm rnglăp đah hađăch Aram tâm rdâng đah Y-Baêsa

¹ Tâm năm rơh pe jât prao rnôk Y-Asa chiă uănh, hađăch Israel jêng Y-Baêsa hăn hao tâm lơh đah phung Yuđa jêh ri ndâk pôih ta Rama gay king mâu ăn bu dơi luh lăp tâm n'gor Y-Asa, hađăch Yuđa.

² Dôl nây, Y-Asa sŏk prăk jêh ri mah tă tâm jay ngih Brah Yêhôva jêh ri tâm jay ngih hađăch njuăl tât ma Y-Ben-Hadat, hađăch Aram gŭ ta ƀon Damas, jêh ri lah pô aơ:

³ “He ƀư hom du nau tâm rnglăp ndrăng he nâm bu mbơ̆ gâp jêh ri mbơ̆ may hŏ ƀư jêh. Aơ, gâp njuăl tât ma may prăk jêh ri mah, dăn may chalơi hom nau may tâm rnglăp đah Y-Baêsa, hađăch Israel, gay ma păng du bơh gâp.”

⁴ Y-Ben-Hadat iăt tĭng nau hađăch Asa, đă phung kôranh chiă uănh phung tahan djôt leo phung tahan hăn lơh lĕ phung ƀon Israel, pit sŏk ƀon Ijôn, Dan, Abel-Maim ndrel ma lĕ rngôch ƀon geh jay prăp drăp ndơ khlay tâm n'gor Naptali.

⁵ Lah Y-Baêsa gĭt nau nây, rlu ro ndâk pôih Rama jêh ri chalơi nau ndâk njêng.

⁶ Hađăch Asa djôt leo lĕ rngôch phung tahan Yuđa hăn sŏk lŭ jêh ri tơm si Y-Baêsa hŏ dŏng ndâk pôih ta Rama, jêh nây Y-Asa dŏng ndơ nây ndâk njêng ƀon Gêba jêh ri Mispa.

⁷ Nôk nây lĕ, nơm geh nau tâm saơ Y-Hanani hăn tâm mâp đah Y-Asa, hađăch Yuđa, jêh ri lah: “Yorlah may rnơm nsing ma hađăch Aram ƀiălah mâu rnơm nsing ôh ma Yêhôva Brah Ndu may, rĭ dĭng phung tahan Aram lĕ klaih jêh bơh may.

⁸ Mâu di bơh phung Kus jêh ri phung Libi jêng du phung tahan ktang? Mâu di bơh ndeh seh jêh ri phung tahan ncho seh khân păng dŭt âk râk ngăn? Nđâp lah pônây, yorlah may rnơm ma Brah Yêhôva, Păng jao jêh khân păng tâm ti may.

⁹ Yorlah măt Brah Yêhôva uănh treng tâm lam neh ntu gay kơl nau ktang ma phung geh nuih n'hâm ueh đah Păng. Tâm nau aơ, may hŏ gŭ ngao ma nau rluk; yorlah ntơm aƀaơ rlet ô klak, may mra geh nau tâm lơh ƀaƀơ.”

¹⁰ Y-Asa ji nuih ma nơm geh nau tâm saơ jêh ri nhŭp krŭng păng yor ma nau nây, hađăch ji nuih ngăn ma păng. Dôl nôk nây, Y-Asa tŭn jot đŏng bunuyh êng ƀaƀă tâm phung ƀon lan.

Y-Asa geh nau ji jêh ri khĭt

¹¹ Lĕ kan Y-Asa ƀư bơh ntơm tât lôch bu nchih jêh tâm ndrom samƀŭt phung hađăch Yuđa jêh ri Israel.

¹² Năm rơh pe jât ma sĭn rnôk Y-Asa chiă uănh, Y-Asa geh nau ji jâng hâu glăm ngăn. Tâm dôl păng ji, păng mâu joi ôh Brah Yêhôva, ƀiălah joi phung kôranh dak si.

¹³ Y-Asa khĭt hăn gŭ ndrel ma phung chô yau păng. Păng chiă uănh tâm puăn jât ma nguay năm jêh ri khǐt.

¹⁴ Bu tâp păng tâm môch ntŭk păng nơm kuyh jêh ma păng nơm tâm ƀon Đavit. Bu dơm săk jăn khĭt păng ta klơ sưng bêng dak si ƀâu kah hŏ tâm pot tĭng di nau bu n'hĭ ƀư ndơ ƀâu kah; khân păng ăt su ŭnh toyh gay nhĭm nhhiăng ma păng.