II Nau Rêh Jêng 15 - Nau Brah Ndu Ngơi 2023

Y-Asa mƀăr lơi nau mbah rup brah

¹ Brah Huêng Brah Ndu gŭ ndrel ma Y-Asaria, kon bu klâu Y-Ôdet.

² Păng hăn tâm mâp đah Y-Asa jêh ri lah: “Ơ hađăch Asa nđâp ma lĕ rngôch phung Yuđa jêh ri Benjamin, iăt hom nau gâp lah! Khân may tĭng Brah Yêhôva ndah jŏ, Brah Yêhôva gŭ ndrel ma khân may dah nĕ lĕ. Tơlah khân may joi Păng, nanê̆ mra dơi tâm mâp đah Păng; tơlah khân may chalơi Păng, pôri Păng mra chalơi khân may.

³ Hŏ jŏ năm jêh, phung Israel mâu chroh ngăn ôh ma Brah Ndu, mâu geh du huê kôranh ƀư brah ntĭm nti ma khân păng, ăt mâu geh lĕ nau vay.

⁴ Ƀiălah tâm dôl geh nau rêh ni, ri mơ khân păng plơ̆ sĭt ma Yêhôva Brah Ndu Israel, tǐng joi Păng dơi mâp tay Păng.

⁵ Tâm rnôk nây, mâu geh du huê nuyh luh mâu lah lăp dơi geh nau đăp mpăn ôh, yorlah lĕ rngôch ƀon lan bơh lĕ bri dak geh nau rŭng răng da dê.

⁶ Bri dak aơ tŭn jot bri dak ri, ƀon aơ tŭn jot ƀon êng, yorlah Brah Ndu ƀư rŭng răng khân păng tâm ăp ntil nau rêh ni.

⁷ Ƀiălah khân may gŭ janh hom, ti khân may lơi mƀơk, yorlah kan khân may ƀư mra geh nau nkhôm.”

⁸ Tơlah Y-Asa hŏ tăng jêh nau ngơi nây jêng nau ngơi mbơh lor bơh nơm mbơh lor Y-Ôdet, ri mơ hađăch ntop nau janh ktang. Păng mƀăr lơi rup brah ƀơ̆ ƀơch luh bơh lam n'gor Yuđa jêh ri Benjamin, jêh ri luh bơh lĕ ƀon păng lĕ pit in jêh ta klơ nkual yôk Êphraim. Păng nkra tay nơng ƀư brah Brah Yêhôva mpeh panăp ndring ngih Brah Yêhôva.

⁹ Păng rgum lĕ rngôch phung Yuđa, phung Benjamin jêh ri phung bu năch bơh lĕ ndŭl mpôl Êphraim, Manasê jêh ri Simêôn gŭ ndrel ma khân păng; yorlah geh âk bunuyh chalơi phung Israel hăn tĭng hađăch Asa dôl saơ Yêhôva Brah Ndu gŭ ndrel păng.

¹⁰ Tâm khay pe, năm rơh jât ma prăm rô̆ Y-Asa chiă uănh, khân păng tâm rƀŭn tâm ƀon Yêrusalem.

¹¹ Nôk nây, khân păng hŏ sŏk pơh rhiăng mlâm ndrôk nkuăng jêh ri pơh rbăn mlâm biăp tâm ndơ sŏk pit jêh djôt nsĭt ƀư ndơ ƀư brah nhhơr ma Brah Yêhôva.

¹² Khân păng ƀư nau tâm rnglăp gay joi Yêhôva Brah Ndu phung chô yau khân păng ma lĕ nuih n'hâm jêh ri ma lĕ nau mĭn.

¹³ Lĕ rngôch bunuyh mbu moh mâu tǐng joi Yêhôva Brah Ndu phung Israel, bu mra nkhĭt lơi, nđâp lah mom mâu lah ranh, bu klâu mâu lah bu ur.

¹⁴ Khân păng ton săk ma Brah Yêhôva ma bâr huy, ma nau troh jêh ri uh nŭng.

¹⁵ Lĕ rngôch phung Yuđa hâk răm yor nau ton săk nây, yorlah khân păng ton săk jêh ma lĕ nuih n'hâm, tǐng joi Brah Yêhôva ma lĕ nau ktang jêh ri dơi mâp Păng. Brah Yêhôva ăn ma khân păng nau đăp mpăn tâm puăn mpeh.

¹⁶ Yor H'Maka, me hađăch Asa, hŏ ƀư jêh du mlâm rup brah ƀơ̆ ƀơch ma brah Asêra, ri dĭng hađăch Asa n'glưh nsot păng jêng mê̆ hađăch ôh, păng kăl lơi rup brah nây jêh ri nchah hăch jêh nây su tâm ŭnh ta rlŭng Kidrôn.

¹⁷ Nđâp tơlah ê hŏ mƀăr lơi ôh ntŭk prêh bơh n'gor Israel, ƀiălah Y-Asa ăt lĕ nuih n'hâm ma Kôranh Brah tâm du bông nau rêh păng.

¹⁸ Păng djôt leo ma ngih Brah Yêhôva lĕ ndơ mbơ̆ păng jêh ri păng nơm hŏ prăp êng ăn kloh, geh mah, prăk jêh ri lĕ ndơ dŏng.

¹⁹ Nôk nây, mâu hôm geh nau tâm lơh ôh tât năm rơh pe jât ma prăm rnôk Y-Asa chiă uănh.