II Nau Rêh Jêng 14 - Nau Brah Ndu Ngơi 2023

Nau đăp mpăn tâm rnôk hađăch Asa

¹ Y-Abija khĭt hăn gŭ ndrel phung chô yau păng jêh ri bu tâp păng tâm ƀon Đavit. Kon bu klâu păng jêng Y-Asa chiă uănh thoi păng. Tâm rnôk rô̆ păng chiă uănh, n'gor bri nây geh nau đăp mpăn tâm jât năm.

² Y-Asa ƀư nau ueh jêh ri nau di tanăp măt Yêhôva Brah Ndu păng.

³ Păng ƀư rai lơi nơng ƀư brah phung brah bu năch jêh ri lĕ ntŭk prêh klơ, mbang nchah lơi lĕ n'gâng mbah jêh ri ƀư rai lĕ rup trah brah Asêrah.

⁴ Păng ntĭnh ma phung Yuđa tǐng joi Yêhôva Brah Ndu phung chô yau khân păng, ƀư tĭng nau vay jêh ri nau vay Păng ntăm.

⁵ Păng chalơi đŏng lĕ rngôch ntŭk prêh klơ jêh ri nơng ƀư brah nhhơr ndơ ƀâu kah luh tă bơh lĕ ƀon phung Yuđa. Bri dak nây geh nau đăp mpăn dôl păng chiă uănh.

⁶ Păng ndâk njêng âk ƀon mpêr nâp ngăn tâm bri Yuđa, yorlah n'gor bri nây geh nau đăp mpăn. Tâm rnôk nây mâu geh ôh nau tâm lơh, yorlah Brah Yêhôva hŏ ăn jêh ma khân păng rlu đăp mpăn.

⁷ Păng lah ma phung Yuđa pô aơ: “He ndâk njêng hom lĕ ƀon aơ, bât mpêr nâp văr jŭm ƀon, ƀư tŭm, ƀư mpông pêr geh rnăng nđăng. Bri dak ăt hôm jêng ndơ he, yorlah he hŏ tǐng joi jêh Yêhôva Brah Ndu he; he hŏ tǐng joi Păng, rĭ dĭng Păng ăn ma he nau đăp mpăn văr jŭm he.” Pôri khân păng ndâk njêng jêh ri hŏ dơi jêng.

⁸ Y-Asa geh du phung tahan pe rsen nuyh phung Yuđa, hŏ ndrăp rǐng khêl jêh ri tak, bar rsen pham rmưn phung Benjamin, hŏ ndrăp khêl jêh ri na; lĕ rngôch jêng phung tahan janh ktang.

Y-Asa dơi đah phung tahan Kus

⁹ Y-Sêra, bunuyh Kus, jă du rkeh phung tahan văch tâm lơh đah khân păng ndrel ma pe rhiăng ndeh seh hăn lơh phung Yuđa, jêh ri khân păng hăn văch tât ta Marêsa.

¹⁰ Y-Asa jă hăn tâm lơh jêh ri nkrĭp dăp tahan tâm rlŭng Sêphatha dăch ta Marêsa.

¹¹ Y-Asa nter vơl ma Yêhôva Brah Ndu păng: “Ơ Brah Yêhôva! Padih Kôranh Brah, mâu geh bunuyh kơl phung ra ai dơi lơh phung dăng. Ơ Yêhôva Brah Ndu hên ơi, dăn kơl hên, yorlah hên rnơm nsing ma May. Ma amoh Kôranh Brah, hên tâm rđâng đah phung tahan âk râk aơ. Ơ Brah Yêhôva ơi! May jêng Brah Ndu hên. Lơi ta ăn kon bunuyh dơi đah Kôranh Brah!”

¹² Brah Yêhôva lơh rai phung tahan Kus tanăp măt phung Yuđa jêh ri hađăch Asa; phung tahan Kus nchuăt du.

¹³ Y-Asa jêh ri phung tahan păng tĭng rgot khân păng tât ta Gêrar. Phung tahan Kus cha lôt khĭt âk jêh ri pih kloh mâu hôm geh du huê bunuyh rêh; khân păng roh rai jêh tanăp măt Brah Yêhôva jêh ri phung tahan Păng. Phung Yuđa dơi sŏk pit âk ngăn ndô ndơ.

¹⁴ Khân păng hăn lơh đŏng lĕ ƀon văr jŭm Gêrar, yorlah Brah Yêhôva ƀư nau krit toyh ma lĕ ƀon nây. Phung tahan Y-Asa sŏk pit âk ngăn drăp ndơ tâm lĕ ƀon nây.

¹⁵ Khân păng lơh đŏng pit sŏk lĕ mpô mpa rong mât tâm ndrung, nhŭp veng dŭt âk phung biăp jêh ri seh samô, jêh nây sĭt rlet ma Yêrusalem.