II Nau Rêh Jêng 13 - Nau Brah Ndu Ngơi 2023

Y-Abija, hađăch Yuđa, dơi lơh Y-Jêrôbôam, hađăch Israel

¹ Năm rơh jât ma pham rnôk rô̆ Y-Jêrôbôam chiă uănh, Y-Abija ntơm chiă uănh n'gor Yuđa.

² Păng chiă uănh pe năm ta Yêrusalem. Mê̆ păng amoh jêng H'Mikaya, kon bu ur Y-Uriêl bơh bri Gibêa. Rnôk nây, geh nau tâm lơh Y-Abija đah Y-Jêrôbôam.

³ Y-Abija dâk hăn tâm lơh ndrel puăn rsen bunuyh tahan ngăch prăl, jêng phung tahan janh ktang; bi Y-Jêrôbôam djôt leo pham rsen bunuyh tahan ngăch prăl, ăt jêng phung tahan janh ktang, hăn tâm lơh.

⁴ Y-Abija dâk ta klơ yôk Sêmaraim tâm nkual yôk Êphraim jêh ri lah: “Hơi Y-Jêrôbôam jêh ri lĕ rngôch phung Israel, iăt hom!

⁵ Khân may mâu gĭt hĕ, yorlah tă bơh nau tâm rnglăp đah boh, Yêhôva Brah Ndu Israel hŏ ăn jêh nau dơi chiă uănh bri dak Israel ma Y-Đavit jêh ri ăn ma phung kon bu klâu păng kŏ tât ƀaƀơ n'ho ro ƀơh?

⁶ Ƀiălah, Y-Jêrôbôam, kon bu klâu Y-Nêbat jêng oh mon Y-Salômôn, kon Y-Đavit, hŏ dâk tâm rdâng đah kôranh păng nơm.

⁷ Phung mhĭk, phung janh ƀai tâm rƀŭn ndrel tĭng păng. Khân păng ktang tâm rdâng đah Y-Rôbôam, kon bu klâu Y-Salômôn, bi ma Y-Rôbôam dôl hôm ndăm, vĭ vĕ ê hŏ janh tâm lơh ôh đah khân păng.

⁸ Pôri aƀaơ, khân may mĭn phung tahan âk râk, geh ndrôk kon mah Y-Jêrôbôam hŏ tŏ jêh jêng brah ma khân may, khân may klăp lah dơi tâm rdâng đah ƀon bri hađăch Brah Yêhôva hŏ ăn jêh ma phung kon sau Y-Đavit lĕ?

⁹ Mâu di hĕ khân may hŏ mprơh jêh phung kôranh ƀư brah Brah Yêhôva, jêng phung kon sau Y-Arôn, jêh ri phung Lêvi hĕ? Khân may hŏ tĭng nau vay phung bu năch gay njêng phung kôranh ƀư brah ma khân may; ăp bunuyh mbu nơm djôt leo du mlâm ndrôk nkuăng rah tât jêh ri pơh mlâm biăp nkuăng gay nhhơr ndơ ƀư brah, dơi jêng du huê kôranh ƀư brah ma brah mâu di jêng brah.

¹⁰ Ƀiălah ma phung hên, Yêhôva ăt jêng Brah Ndu hên, hên mâu chalơi Păng ôh. Phung kôranh ƀư brah, jêng phung kon sau Y-Arôn, pah kan ma Brah Yêhôva da dê, jêh ri phung Lêvi djôt nau kan khân păng.

¹¹ Ăp ôi ơm jêh ri mhaơ, khân păng nhhơr ndơ ƀư brah gŭch jêh ri gŭch ndơ ƀâu kah ma Brah Yêhôva. Khân păng dăp đŏng piăng let nhhơr ta klơ nơng mah kloh, mpoh lĕ ŭnh kađen ta klơ jâng kađen mah ang mro tâm ăp măng. Yorlah hên djôt prăp nau Yêhôva Brah Ndu hên ntăm jêh, bi khân may lĕ chalơi jêh.

¹² Aơ, Brah Ndu gŭ ndrel ma hên jêh ri chiă uănh ma hên. Phung kôranh ƀư brah Păng djôt nŭng ntrŭt tahan uh huy tâm rdâng đah khân may. Ơ phung Israel! Lơi ta tâm rdâng ôh đah Yêhôva Brah Ndu phung chô yau khân may, yorlah khân may mâu mra dơi ôh!”

¹³ Tâm nôk nây, Y-Jêrôbôam đă phung tahan kâp dâp hăn ndăch dăr pakơi phung tahan Yuđa. Pônây, phung tahan Israel gŭ panăp, bi phung tahan kâp dâp gŭ pakơi phung tahan Yuđa.

¹⁴ Tơlah phung Yuđa n'gĭl uănh, ri, phung rlăng hŏ êp panăp jêh ri pakơi khân păng. Khân păng nter vơh vơl ma Brah Yêhôva ro, bi phung kôranh ƀư brah uh nŭng.

¹⁵ Nôk nây, phung Yuđa nter troh rduh tâm lơh. Nôk phung Yuđa nter troh, Brah Ndu lơh Y-Jêrôbôam jêh ri lĕ rngôch phung Israel tra năp măt Y-Abija jêh ri phung Yuđa.

¹⁶ Phung Israel nchuăt du đah phung Yuđa, jêh ri Brah Ndu jao khân păng tâm ti phung Yuđa.

¹⁷ Y-Abija jêh ri phung tahan păng lơh rai jêh ri ƀư ma phung tahan Israel khĭt âk ngăn bunuyh; geh prăm rsen bunuyh tahan janh ktang tâm phung Israel khĭt.

¹⁸ Pôri, tâm nau tâm lơh nây phung tahan Israel geh nau bêk prêng yor nau tâm lơh, bi phung tahan Yuđa dăng lơn, yorlah khân păng rnơm ma Yêhôva Brah Ndu phung chô yau khân păng.

¹⁹ Y-Abija tĭng rgot Y-Jêrôbôam jêh ri pit in âk rplay ƀon: Bêthel jêh ri lĕ ƀon jê̆, Jêsana jêh ri lĕ ƀon jê̆, Ephrôn jêh ri lĕ ƀon jê̆ văr jŭm.

²⁰ Tâm lĕ rnôk Y-Abija chiă uănh, Y-Jêrôbôam mâu hôm dơi geh ktang ôh. Nglĕ dŭt, Brah Yêhôva lơh Y-Jêrôbôam jêh ri păng khĭt.

²¹ Bi Y-Abija jêng dăng lơn. Păng sŏk jât ma puăn nuyh ur, geh bar jât ma bar mlâm kon bu klâu, jêh ri jât ma prao nuyh kon bu ur.

²² Lĕ kan ƀaƀă Y-Abija ƀư, lĕ trong hăn jêh ri nau păng ƀư bu nchih da dê jêh tâm ndrom samƀŭt nơm mbơh lor Y-Idô nkoch bri.