II Nau Rêh Jêng 12 - Nau Brah Ndu Ngơi 2023

Y-Rôbôam chalơi nau vay Brah Ndu. – Y-Sisăk lăp lơh phung Yuđa

¹ Tơlah bri dak Y-Rôbôam chiă uănh jêng nâp jêh ri ktang jêh, păng nđâp ma phung Israel chalơi lĕ nau vay Brah Yêhôva.

² Yorlah khân păng ƀư tih đah Brah Yêhôva, tâm năm rơh prăm rnôk rô̆ hađăch Rôbôam, Y-Sisăk, hađăch n'gor Êjipt, leo phung tahan hăn lơh Yêrusalem.

³ Bơh Êjipt, hađăch jă du rbăn bar rhiăng ndeh seh, prao rmưn tahan ncho seh jêh ri âk râk tahan hăn jâng phung Libi, phung Sukim, jêh ri phung Kus.

⁴ Y-Sisăk lăp lơh pit sŏk lĕ ƀon nâp tâm bri Yuđa, jêh ri tât ma Yêrusalem.

⁵ Nơm mbơh lor Y-Sêmaya hăn tâm mâp đah Y-Rôbôam jêh ri đah phung kôranh chiă uănh Yuđa dôl gŭ tâm rƀŭn ta Yêrusalem gay du ndĕ bơh Y-Sisăk. Păng lah ma khân păng: “Brah Yêhôva lah: ‘Khân may lĕ chalơi jêh Gâp, pôri Gâp jao khân may tâm ti Y-Sisăk.’”

⁶ Nôk nây, phung kôranh chiă uănh Israel jêh ri hađăch ntrŭnh săk khân păng nơm, jêh ri lah pô aơ: “Brah Yêhôva jêng sŏng srăng.”

⁷ Lah Brah Yêhôva saơ khân păng ntrŭnh săk, geh nau Brah Yêhôva ngơi ma Y-Sêmaya pô aơ: “Khân păng lĕ ntrŭnh săk jêh; pôri Gâp mâu mra ƀư rai khân păng ôh, ƀiălah mra tâm rklaih ma khân păng du mpôl djê̆; jêh ri Gâp mâu mra dŏng ôh ti Y-Sisăk nkhŭt nau ji nuih Gâp ta Yêrusalem.

⁸ Ƀiălah, khân păng mra pah kan ma Y-Sisăk gay ma khân păng gĭt mâm nau pah kan ma Gâp jêh ri mâm nau pah kan ma lĕ bri dak êng.”

⁹ Y-Sisăk, hađăch Êjipt, jă lơh Yêrusalem, pit rvan lĕ rngôch ndô ndơ khlay tâm ngih Brah Yêhôva jêh ri tâm ngih hađăch. Hađăch nây sŏk pit lĕ rngôch ndô ndơ khlay, nđâp ma lĕ khêl mah Y-Salômôn hŏ ƀư.

¹⁰ Hađăch Rôbôam ƀư lĕ khêl kông ntrok lĕ khêl mah nây, jêh ri jao lĕ ndơ nây ma phung kôranh gai tahan gay gak njrăng mpông pêr ngih hađăch.

¹¹ Ăp tơ̆ hađăch lăp tâm ngih Brah Yêhôva, tahan gak djôt leo lĕ khêl nây tât, jêh ri djôt leo păng mplơ̆ sĭt prăp tâm jay phung tahan gak.

¹² Yorlah Y-Rôbôam ntrŭnh săk, pôri nau ji nuih bơh Brah Yêhôva du ngai đah păng jêh ri păng mâu geh roh rai lĕ rngôch ôh; jêh ri n'gor Yuđa ăt hôm dơn lĕ nau ueh.

Y-Rôbôam khĭt

¹³ Hađăch Rôbôam dơi ƀư nâp sưng păng jêh ri chiă uănh ta Yêrusalem. Nôk păng jêng hađăch, Y-Rôbôam hŏ geh puăn jât ma nguay năm jêh; păng chiă uănh jât ma pơh năm tâm ƀon Yêrusalem, nâm bu ntĭt ƀon Brah Yêhôva hŏ săch jêh tâm phung ndŭl mpôl Israel, gay dơm amoh Păng ta nây. Mê̆ păng amoh jêng H'Naama, bunuyh Ammôn.

¹⁴ Y-Rôbôam ƀư nau mhĭk yorlah păng mâu joi Brah Yêhôva ma lĕ nuih n'hâm.

¹⁵ Lĕ rngôch kan Y-Rôbôam hŏ ƀư bơh ntơm tât lôch, hŏ nchih da dê jêh tâm ndrom samƀŭt nơm mbơh lor Y-Sêmaya jêh ri nơm geh nau tâm saơ Y-Idô, tĭng nau nchih noi deh. Y-Rôbôam đah Y-Jêrôbôam geh nau tâm lơh ƀaƀơ.

¹⁶ Y-Rôbôam khĭt gŭ ndrel ma chô yau păng jêh ri bu tâp păng tâm ƀon Đavit. Kon păng jêng Y-Abija chiă uănh ntrok păng.