II Nau Rêh Jêng 11 - Nau Brah Ndu Ngơi 2023

Brah Ndu buay Y-Rôbôam tâm lơh đah phung Israel

¹ Tơlah Y-Rôbôam plơ̆ sĭt ma ƀon Yêrusalem, păng tâm rgum ngih Yuđa jêh ri Benjamin, geh du rsen pham rmưn bunuyh tahan dăng ktang, gay tâm lơh đah phung Israel, gay ndâk đŏng ƀon bri hađăch ma păng.

² Ƀiălah geh nau Brah Yêhôva ngơi ma Y-Sêmaya, bunuyh Brah Ndu, pô aơ:

³ “Lah hom ma hađăch Yuđa jêng Y-Rôbôam, kon Y-Salômôn, jêh ri ma lĕ rngôch phung Israel tâm n'gor Yuđa jêh ri n'gor Benjamin pơ aơ:

⁴ Brah Yêhôva lah: ‘Khân may mâu dơi tâm lơh đah oh nâu khân may nơm. Ăp nơm plơ̆ sĭt hom ma ngih păng nơm, yorlah nau tât aơ luh tă bơh Gâp nơm.’” Khân păng iăt tĭng ma nau Brah Yêhôva ngơi, jêh ri plơ̆ sĭt, mâu hăn tâm lơh ôh đah Y-Jêrôbôam.

Nau Y-Rôbôam chiă uănh

⁵ Y-Rôbôam gŭ ta Yêrusalem jêh ri păng ndâk âk ƀon nâp ktang tâm neh Yuđa.

⁶ Hađăch ndâk njêng Ƀêtlêhem, Êtam, Têkôa,

⁷ Bet-Sur, Sôkô, Adulam,

⁸ Gat, Marêsa, Sip,

⁹ Adôraim, Lakis, Asêka,

¹⁰ Sôra, Aijalon jêh ri Hêbron, jêng lĕ ƀon nâp ktang tâm neh Yuđa jêh ri Benjamin.

¹¹ Hađăch ƀư pôih nây nâp ngăn, n'gân kôranh tahan gŭ ta nây, prăp nkrem ndơ sông sa, dak ngi ôlive jêh ri ndrănh.

¹² Tâm ăp ƀon, hađăch ăn khêl jêh ri tak, ƀư ma lĕ ƀon nây dơi jêng nâp ktang. Pôri, neh Yuđa jêh ri neh Benjamin jêng hađăch da dê chiă uănh.

Phung kôranh ƀư brah jêh ri phung Lêvi kâp kơl Y-Rôbôam

¹³ Phung kôranh ƀư brah jêh ri phung Lêvi tâm lam n'gor Israel, bơh lĕ rngôch ntŭk khân păng gŭ plơ̆ sĭt ma Y-Rôbôam da dê.

¹⁴ Phung Lêvi chalơi neh ƀon jêh ri drăp ndơn khăn păng hăn văch ran tât neh phung Yuđa jêh ri ƀon Yêrusalem; yor Y-Jêrôbôam jêh ri phung kon bu klâu păng mprơh khân păng du, mâu ăn ƀư kan jêng kôranh ƀư brah ma Brah Yêhôva đŏng ôh.

¹⁵ Y-Jêrôbôam njêng phung kôranh ƀư brah gay pah kan ma ntŭk prêh, ma lĕ rup be nkuăng jêh ri ndrôk kon păng hŏ ƀư jêh.

¹⁶ Tâm ndŭl mpôl Israel, mbu nơm lĕ nuih n'hâm tĭng joi Yêhôva Brah Ndu tâm phung Israel tĭng ndô̆ phung kôranh ƀư brah da dê, jêh ri phung Lêvi hăn tât ta ƀon Yêrusalem gay nhhơr ndơ ƀư brah ma Yêhôva Brah Ndu chô yau khân păng nơm.

¹⁷ Tâm pe năm, khân păng ƀư ăn ƀon bri hađăch Yuđa dơi nâp ktang jêh ri kơl Y-Rôbôam, kon Y-Salômôn, dơi geh jêng; yorlah tâm pe năm nây, khân păng tĭng ndô̆ trong Y-Đavit jêh ri Y-Salômôn.

Nau Y-Rôbôam sŏk ur

¹⁸ Y-Rôbôam sŏk H'Mahalat, kon bu ur Y-Jêrimôt, sau Y-Đavit, ƀư ur; mê̆ H'Mahalat jêng H'Abihai kon bu ur Y-Êliap jêng sau Y-Yêsê.

¹⁹ Păng deh ăn ma hađăch phung kon bu klâu amoh Y-Jêush, Y-Sêmaria jêh ri Y-Saham.

²⁰ Jêh nây, hađăch sŏk đŏng H'Maka kon druh Y-Apsalôm; păng deh ăn ma hađăch: Y-Abija, Y-Atai, Y-Sisa jêh ri Y-Sêlômit.

²¹ Hađăch Rôbôam rŏng ma H'Maka kon bu ur Y-Apsalôm hâu lơn đah lĕ rngôch phung ur êng jêh ri ma lĕ ur yông êng păng; yorlah hađăch geh jât ma pham nuyh ur tơm jêh ri prao jât nuyh ur yông, geh bar jât ma pham nuyh kon bu klâu jêh ri prao jât nuyh kon bu ur.

²² Y-Rôbôam dơm Y-Abija kon bu klâu đah H'Maka, jêng kôranh ma phung oh nâu păng yorlah hađăch tâm nal njêng păng chiă uănh ntrok.

²³ Y-Rôbôam geh nau blau mĭn jêh ri tâm pă phung kon bu klâu păng hăn gŭ lam lĕ ƀon toyh nâp ktang tâm lĕ n'gor Yuđa jêh ri Benjamin, ƀơk ăn khân păng ăp ntil ndơ sông sa rmeh ler jêh ri văng nđăp âk ur ma khân păng.