II Nau Rêh Jêng 1 - Nau Brah Ndu Ngơi 2023

Nau rêh jêng Y-Salômôn ( 1:1 – 9:31 ) Y-Salômôn nhhơr ndơ ƀư brah ta Gibêôn

¹ Y-Salômôn, kon bu klâu Y-Đavit, djôt nâp nau chiă uănh tâm ƀon bri hađăch păng, yorlah Yêhôva Brah Ndu păng gŭ ndrel ma păng jêh ri ăn păng dơi jêng toyh ngăn ngên.

² Y-Salômôn kuăl rgum ma lĕ rngôch phung Israel, ma phung kôranh chiă uănh toyh du rbăn nuyh tahan jêh ri du rhiăng nuyh tahan, ma phung kôranh phat dôih jêh ri lĕ rngôch kôranh ndŭl mpôl jêng phung kôranh chiă uănh phung Israel.

³ Jêh nây Y-Salômôn jêh ri lĕ rngôch phung tâm rƀŭn hăn rlet ntŭk prêh ta Gibêôn, yorlah ta nây geh Ngih Bok Nau Tâm Rƀŭn Brah Ndu, oh mon Brah Yêhôva jêng Y-Môis hŏ ƀư jêh tâm bri rdah.

⁴ (Ƀiălah Y-Đavit hŏ tung leo jêh Hip Nau Tâm Rnglăp Brah Ndu tă bơh Kiriat-Jêarim tât ma ntŭk Y-Đavit hŏ ndrăp nkra jêh ăn ma hip, yorlah păng hŏ ndâk jêh du mlâm ngih bok ma Hip Nau Tâm Rnglăp ta ƀon Yêrusalem).

⁵ Panăp Ngih Bok Brah Yêhôva geh nơng ƀư brah ma kông Y-Bêsalel, kon bu klâu Y-Uri, sau Y-Hur, hŏ ƀư jêh. Y-Salômôn jêh ri phung tâm rƀŭn hăn tât ta ntŭk nây da dê gay mbơh sơm ôp ma Kôranh Brah.

⁶ Y-Salômôn hao tât ta klơ nơng ƀư brah ma kông, n'gân panăp Brah Yêhôva tâm Ngih Bok Nau Tâm Rƀŭn, jêh ri păng nhhơr du rbăn ndơ ƀư brah gŭch ta klơ nơng ƀư brah nây.

⁷ Măng nây ro, Brah Ndu tâm mpơl ma Y-Salômôn jêh ri lah ma păng: “Dăn hom, moh ndơ may ŭch Gâp ăn ma may.”

⁸ Y-Salômôn lah ma Brah Ndu: “May hŏ mpơl jêh nau rŏng toyh nanê̆ ngăn ma Y-Đavit, mbơ̆ gâp, jêh ri njêng jêh gâp gŭ ta sưng hađăch chiă uănh thoi ntrok păng.

⁹ Ơ Yêhôva Brah Ndu, dăn nau May ton jêh ma Y-Đavit, mbơ̆ gâp, tât di ngăn; yorlah Kôranh Brah hŏ njêng jêh gâp hao ƀư hađăch chiă uănh du phung ƀon lan âk nâm bu ndruyh neh.

¹⁰ Pônây, dăn Kôranh Brah ăn ma gâp nau blau mĭn jêh ri nau gĭt rbăng, gay gâp dơi luh lăp tanăp phung ƀon lan aơ. Yorlah mbu nơm geh tŏng nau dơi chiă uănh phung ƀon lan Kôranh Brah, du phung ƀon lan toyh dŭt âk râk ngăn?”

¹¹ Brah Ndu lah ma Y-Salômôn: “Gâp njêng jêh may ƀư hađăch ma phung ƀon lan Gâp. Yorlah may geh nau ton kơt nĕ, may mâu ŭch dăn ôh nau ndrŏng kuăng, drăp ndơ, nau chrêk rmah, mâu lah nau rêh phung rlăng may, jêh ri mâu mâp lĕ geh dăn nau jong rêh, ƀiălah may dăn nau gĭt mĭn jêh ri nau gĭt rbăng ma may nơm gay chiă uănh ma phung ƀon lan Gâp,

¹² pôri Gâp hŏ ăn jêh nau gĭt mĭn jêh ri nau gĭt rbăng ma may. Gâp mra ăn ma may nau ndrŏng kuăng, drăp ndơ, jêh ri nau chrêk rmah kŏ tât mâu dơi geh ôh lĕ phung hađăch lor panăp may jêh ri pakơi may dơi ban.”

¹³ Luh bơh Ngih Bok Nau Tâm Rƀŭn ta ntŭk prêh klơ tâm Gibêôn, Y-Salômôn plơ̆ sĭt ma Yêrusalem jêh ri păng chiă uănh phung Israel.

Phung tahan jêh ri nau tăch rgâl Y-Salômôn

¹⁴ Y-Salômôn bun rgum âk ndeh seh jêh ri seh tâm lơh, păng geh du rbăn puăn rhiăng ndeh seh jêh ri du rmưn bar rbăn seh tâm lơh. Păng ăn ndeh seh gŭ tâm lĕ ƀon bu bun ndeh seh jêh ri dăch kêng hađăch ta ƀon Yêrusalem.

¹⁵ Hađăch ƀư ma prăk jêh ri mah tâm Yêrusalem rlơ̆ jêng mâu nă khlay ôh nâm bu lŭ chreh, jêh ri tơm si sêdar âk ngăn nâm bu tơm si sikamôr tâm n'gor Sêphêla.

¹⁶ Y-Salômôn rvăt âk seh bơh n'gor Êjipt jêh ri n'gor Silisi; phung tăch rgâl ăn ma hađăch sŏk dơn drăp nây bơh bri Silisi tâm di rnoh.

¹⁷ Khân păng rvăt du bôk ndeh seh bơh n'gor Êjipt, rnoh prao rhiăng glo prăk, du mlâm seh rnoh du rhiăng prăm jât glo prăk. Hađăch phung Hitit jêh ri phung Aram đă phung tăch rgâl ăn ma hađăch Salômôn rvăt tĭng nâm rnoh nây.