II Kôrintô 9 - Nau Brah Ndu Ngơi 2023

Sâm kơl ma phung chroh pưt kƀah

¹ Ma nau kơl ma phung kloh ueh, gâp mâu hôm ŭch nchih tay ma khân may đŏng.

² Yorlah gâp gĭt jêh ma nuih n'hâm lŏng khân may, jêh ri gâp tâm mpơl ma khân may đah phung Masêđôn ma phung Akai rơm ndrăp jêh bơh năm e, nuih n'hâm duh nđơr tâm n'hao nuih khân may hŏ ntrôl âk bunuyh.

³ Ƀiălah gâp njuăl jêh phung oh nâu hăn, gay nau hên tâm rnê ma khân may mâu jêng dơm dam ôh, jêh ri gay ma khân may rơm ndrăp, nâm nau gâp lah jêh;

⁴ klach lah tơlah phung Masêđôn hăn ndrel văch ta gâp, saơ khân may mâu rơm ndrăp pôri hên — mâu ŭch lah ma khân may ôh — mra geh nau đit prêng yorlah lĕ rnơm jêh kơt nĕ.

⁵ Yor ri, gâp mĭn mra nsŭk nsôr ƀaƀă bunuyh hăn tât ntŭk khân may lor jêh ri ndrăp nkra jêh kô̆ riu prăk khân may ton jêh, gay nau riu prăk aơ geh nau rơm ndrăp tâm ban du ndơ nđơr ăn êng, mâu di tă bơh nau nchâp.

⁶ Kah gĭt hom pô aơ: Mbu nơm srih djê̆ mra rek djê̆, mbu nơm srih âk mra rek âk.

⁷ Pôri ăn ăp nơm nhhơr tĭng nâm nau păng hŏ mĭn jêh tâm nuih n'hâm, mâu geh lah ăn ma nau rngot, mâu lah ma nau nchâp ôh, yorlah Brah Ndu rŏng ma mbu nơm nhhơr ma nau maak.

⁸ Brah Ndu geh nau dơi ăn ma khân may nau yô̆ âk rmeh gay ƀư tŏng lĕ rngôch nau khân may ŭch, lŏ geh âk rmeh gay ƀư ăp ntil kan ueh,

⁹ nâm bu geh nau nchih pô aơ: “Păng tâm pă lŏng ngăn, sâm kơl ma phung o ach; Nau sŏng srăng păng gŭ ƀaƀơ n'ho ro.”

¹⁰ Nơm ăn găr ntil ma nơm srih jêh ri piăng let jêng ndơ sông sa mra ăn găr ntil ma khân may jêh ri ƀư bĭk rơ̆ dŭt âk, lŏ ntop đŏng kao play ma nau sŏng srăng khân may.

¹¹ Khân may mra dơi ndrŏng tâm ăp ntil ndơ gay ƀư lĕ ndơ tâm kơl; gay bơh he, bu mra lah ueh ma Brah Ndu.

¹² Yorlah nau kơl aơ mâu di knŏng ƀư tŏng nau ŭch ma phung kloh ueh ôh, ƀiălah hôm ƀư ăn âk bunuyh lah ueh ma Brah Ndu đŏng.

¹³ Nau kơl aơ jêng nau mbơh gay khân may tâm rnê Brah Ndu, yor nau tông bâr ma Nau Mhe Mhan Ueh Brah Krist khân may mpơl jêh, jêh ri yorlah nau lŏng khân may huy ngăn ma khân păng jêh ri ma lĕ rngôch bunuyh.

¹⁴ Bi khân păng mra mbơh sơm ma khân may jêh ri rŏng khân may, yorlah nau yô̆ khlay ngăn Brah Ndu ăn jêh ma khân may.

¹⁵ Lah ueh ma Brah Ndu, yor nau Păng ăn ma he mâu blau kơp!