II Kôrintô 8 - Nau Brah Ndu Ngơi 2023

II. Nau kuăl riu prăk ăn ma Phung Ngih Brah Ndu ta Yêrusalem ( 8:1 – 9:15 ) Nuih n'hâm lŏng ngăn tă bơh phung Masêđôn

¹ Hơi phung oh nâu, gâp ŭch ăn khân may gĭt nau yô̆ Brah Ndu ăn ma Phung Ngih Brah Ndu tâm n'gor Masêđôn.

² Khân păng hŏ găn âk nau rêh ni, ƀiălah bêng nau răm maak. Tâm nau pưt kƀah o ach pôri nuih n'hâm khân păng lŏng ngăn lơ hô âk rmeh.

³ Yorlah gâp mbơh nkoch ma khân păng hŏ nđơr êng riu prăk tĭng nâm nau khân păng geh, jêh ri ƀư rlau ma nau geh đŏng,

⁴ jêh ri khân păng dăn ma hên ăn khân păng dơi geh du kô̆ tâm nau kơl phung kloh ueh.

⁵ Khân păng hŏ ƀư rlau nau hên kâp gân; yorlah lor lơn khân păng hŏ nhhơr khân păng nơm ma Kôranh Brah jêh ri ma hên, tĭng nâm nau mĭn Brah Ndu ŭch.

⁶ Yor ri, hên ntrôl jêh Y-Tit ƀư lôch hom nau kan ăn ndơ yô̆ aơ ta nklang khân may nâm bu păng ntơm ƀư jêh.

⁷ Yorlah, nâm bu khân may jêng ueh ngăn tâm lĕ rngôch nau: Nau chroh, nau ngơi, nau gĭt rbăng, nau duh nđơr jêh ri nau rŏng ma hên, pôri ăn khân may jêng ueh lơn tâm nau ăn ndơ tâm kơl.

⁸ Gâp lah nau aơ mâu di ŭch ntrŭnh ma khân may ôh, ƀiălah gâp knŏng ŭch saơ nuih n'hâm duh nđơr phung êng gay uănh nuih n'hâm khân may geh nau rŏng nanê̆ mâu lah mâu.

⁹ Yorlah khân may gĭt jêh nau yô̆ Kôranh Brah he jêng Brah Yêsu Krist, Păng ndrŏng ngăn, ƀiălah plơ̆ jêng o ach yor khân may, gay yor nau o ach Păng, khân may plơ̆ jêng ndrŏng.

¹⁰ Gâp kơl mĭn nau nây, nây jêng du nau mĭn geh khlay ma khân may: yorlah bơh năm lor, khân may mâu knŏng jêng phung bunuyh lor lơn ƀư nau nây ƀiălah hôm ŭch ƀư đŏng.

¹¹ Lah ndrĭ, aƀaơ aơ ƀư lôch hom nau aơ gay nau khân may ŭch dơi geh lah ƀư rĭng nau nây tĭng nâm nau khân may dơi.

¹² Tơlah du huê nuyh geh nuih n'hâm ŭch nhhơr pôri ndơ păng nhhơr bu mra dơn, tĭng nâm ndơ khân păng geh, mâu di tĭng nâm ndơ khân păng mâu geh ôh.

¹³ Gâp mâu ŭch ôh phung êng geh nau n'gơch, ƀư jâk âk ma khân may, ƀiălah gâp ŭch geh tâm ban da dê.

¹⁴ Rnôk aơ khân may dôl geh âk rmeh, kơl hom phung bunuyh pưt; gay nôk khân păng âk rmeh, ri mơ khân păng mra kơl khân may tâm dôl ndĭt trơi. Pônây jêng geh nau tâm ban.

¹⁵ Nâm bu geh nau nchih pơ aơ: “Mbu nơm bun âk jêh mâu đŏng rmeh, Mbu nơm bun djê̆ mâu đŏng pưt.”

Nau ngơi nhhơ ma Y-Tit jêh ri phung mĭt jiăng hăn n'hanh

¹⁶ Lah ueh ma Brah Ndu, Păng dơm jêh tâm nuih n'hâm Y-Tit nau duh nđơr tâm ban gâp geh ma khân may;

¹⁷ yorlah mâu di knŏng păng dơn jêh nau hên dăn, ƀiălah păng yơh geh nuih n'hâm duh nđơr êng hăn chop khâl ma khân may.

¹⁸ Hên njuăl đŏng du huê oh nâu hăn ndrel ma Y-Tit, aơ jêng bunuyh dơi geh lĕ rngôch Phung Ngih Brah Ndu rnê ma nau kan mbơh nkoch Nau Mhe Mhan Ueh.

¹⁹ Mâu di knŏng dŭm nĕ, bunuyh nây dơi geh Phung Ngih Brah Ndu đă hăn ndrel ma hên tâm nau pah kan ăn ndơ tâm kơl aơ, jêng nau kan hên dôl ƀư, yorlah nau chrêk rmah ma Kôranh Brah jêh ri gay tâm mpơl hên geh nuih n'hâm duh nđơr.

²⁰ Hên blau njrăng gay der lơi nau ngơi mâu ueh tâm nau dŏng rnoh prăk nhhơr toyh aơ.

²¹ Yorlah hên srôih ƀư nau ueh, mâu di knŏng tanăp Kôranh Brah ôh, ƀiălah nđâp tanăp bunuyh lĕ.

²² Hên săch đŏng du huê oh nâu hên hăn ndrel ma khân păng; aơ jêng nơm hên rlong uănh jêh âk tơ̆ jêh ri saơ păng geh nuih n'hâm duh nđơr tâm ăp ntil ndơ; ƀiălah aƀaơ aơ păng lơ hô duh nđơr lơn đŏng, yorlah păng rnơm ma khân may âk ngăn.

²³ Bi Y-Tit, păng jêng mĭt jiăng gâp jêh ri jêng nơm tâm rnglăp đah gâp gay sâm kơl ma khân may; bi bar hê nâu ri jêng phung mbơh tâm lĕ Phung Ngih Brah Ndu, jêh ri nau chrêk rmah ma Brah Krist.

²⁴ Yor ri, tanăp Phung Ngih Brah Ndu, khân may mpơl hom nau khân may rŏng tâm ban đŏng nau hên rnê êng ma khân may.