II Kôrintô 7 - Nau Brah Ndu Ngơi 2023

¹ Hơi phung oh nâu gâp rŏng, yorlah geh lĕ nau ton aơ, he ƀư kloh hom he nơm bơh lĕ rngôch nau ƀơ̆ ƀơch tâm nglay săk jêh ri huêng, ƀư rah vah hom nau kloh ueh he tâm nau klach yơk ma Brah Ndu.

Nau bonh leng ma Y-Pôl tă bơh phung Kôrintô

² Prăp hom ma hên du ntŭk tâm nuih n'hâm khân may. Hên mâu mâp ƀư mhĭk ma bu ôh, mâu ƀư rai bu ôh, mâu mâp sa ndô ndơ bu ôh.

³ Gâp mâu lah nau aơ gay ma tâm rmal khân may ôh, yorlah lor panăp aơ gâp lah jêh ma khân may gŭ tâm nuih n'hâm gâp ƀaƀơ, rêh ndrel jêh ri khĭt ndrel.

⁴ Gâp rnơm ngăn ma khân may jêh ri rnê êng ma khân may nơm âk ngăn. Gâp bêng ler ma nau bonh leng jêh ri bêng nau răm maak ta nklang lĕ rngôch nau rêh ni.

⁵ Yorlah nôk tât ta n'gor Masêđôn, nglay săk hên mâu mâp geh rlu ôh, nau rêh ni gŭ jŭm hên — nau tâm lơh padih, nau klach tâm trôm.

⁶ Ƀiălah Brah Ndu, Nơm bonh leng mbu nơm rdja nuih n'hâm, bonh leng jêh gâp yor nôk njuăl Y-Tit tât jêh;

⁷ mâu knŏng yor nau Y-Tit tât dơm, ƀiălah yor ma nau bonh leng păng nơm hŏ dơn jêh bơh khân may đŏng. Păng lah đah hên jêh ma nau kâp gân, nau rngot rvê, jêh ri nuih n'hâm khân may duh nđơr ma gâp, ƀư ăn gâp geh nau răm maak âk lơn.

Nau rngot rvê tĭng nau mĭn Brah Ndu

⁸ Tơlah blah samƀŭt gâp njuăl ƀư rngot rvê ma khân may, gâp mâu đŏng nduyh tôr — yorlah gâp saơ blah samƀŭt nây ƀư ma khân may rngot rvê, nđâp tơlah knŏng ƀât lât —

⁹ ri mơ aƀaơ aơ gâp răm maak. Gâp maak mâu di yor khân may geh nau rngot rvê ôh, ƀiălah yor nau rngot rvê khân may njŭn leo jêh ma nau rmal nau tih. Nanê̆ ngăn, khân may rngot rvê jêh tĭng nâm nau Brah Ndu ŭch; pônây, hên mâu ƀư nau roh ma khân may.

¹⁰ Yorlah nau rngot rvê tĭng nâm nau Brah Ndu ŭch njêng nau rmal nau tih, njŭn ma nau tâm rklaih; nau nây mâu geh nau gay nduyh tôr; ƀiălah nau rngot rvê tĭng nâm neh ntu njŭn leo tât nau khĭt.

¹¹ Pôri, khân may uănh hom, nau rngot rvê tĭng nâm nau Brah Ndu ŭch njêng jêh tâm khân may geh nuih n'hâm duh nđơr! Mâu knŏng kơt nây dơm, ƀiălah lĕ nau srôih ƀư kloh khân may nơm, nau ji nuih, klach kir, kâp gân nau duh nđơr, nau nduyh nkra đŏng! Khân may tâm mpơl jêh tâm lĕ rngôch bunuyh ma khân may mâu geh tih tâm kan nây.

¹² N'hêl nanê̆ ngăn, tơlah gâp nchih samƀŭt jêh ma khân may, nau nây mâu di yor nơm ƀư tih ôh, mâu đŏng di yor nơm sŏk dơn nau gŭ ngao tih, ƀiălah gay ma nuih n'hâm duh nđơr khân may đah hên tâm mpơl ma khân may tanăp Brah Ndu.

¹³ Nây jêng nau bonh leng hên. Rlau ma nau bonh leng nây, hên geh nau răm maak âk lơn yor ma Y-Tit, yor lĕ rngôch khân may hŏ ƀư jêh nau mĭn păng geh nau mpăn ngăn.

¹⁴ Tơlah gâp geh djê̆ nau rnê khân may đah Y-Tit mâu đŏng geh nau đit prêng, yor lĕ nau hên hŏ ngơi jêh ma khân may jêng nanê̆ ngăn, nau hên tâm rnê êng tanăp Y-Tit mpơl đŏng jêng nau nanê̆.

¹⁵ Jêh ri nau rŏng Y-Tit ma khân may lơ hô âk lơn, tơlah păng kah gĭt ma nau lĕ rngôch khân may tông bâr ndrel ma nau klach kir, râm nsâr nôk khân may rom păng.

¹⁶ Gâp răm maak yorlah gâp dơi rnơm nsing ma khân may tâm lĕ rngôch nau.