II Kôrintô 6 - Nau Brah Ndu Ngơi 2023

¹ Yorlah hên pah kan ndrel ma Brah Ndu, hên vơh vơl ma khân may lơi dĭng sŏk dơn nau Brah Ndu yô̆ dơm dam ôh.

² Yorlah Păng lah pô aơ: “Gâp dơn jêh nau may ngơi tâm nar găl, Gâp kâp kơl may jêh ta nar tâm rklaih.” Ri, aƀaơ aơ jêng nar găl; ri, aƀaơ aơ jêng nar tâm rklaih!

Nuih n'hâm Y-Pôl răp jăp tâm nau rlong uănh

³ Hên mâu ƀư chêh prah ôh ma bu, gay bu mâu dơi nduyh ôh ma nau hên pah kan.

⁴ Ƀiălah tâm lĕ rngôch nau, hên tâm mpơl hên nơm jêng oh mon Brah Ndu: ma nau srôih âk ngăn tâm nau rêh ni, tâm nau hŏt rgănh, tâm nau jâk jêr,

⁵ bu dong, bu krŭng, uh ah, pah kan hŏt rgănh, mâu geh bê̆ch, ver sông sa;

⁶ tâm nau kloh rsang, nau gĭt rbăng, nau srôih, nau ueh, tâm Brah Huêng Ueh, tâm nau rŏng răp jăp,

⁷ tâm nau ngơi nanê̆ ngăn, jêh ri tâm nau brah Brah Ndu; kuăn ndơ tâm lơh bơh nau sŏng srăng tâm lĕ ti pa ma jêh ri ti pa chiau;

⁸ nđâp tơlah bu rnê mâu lah bêk prêng, nđâp tơlah geh nau lư mhĭk mâu lah ueh. Bu ƀư ma hên nâm bu phung ngơi mƀruh, ƀiălah hên jêng bunuyh nanê̆ ngăn;

⁹ bu uănh nâm bu phung mâu gĭt năl, ƀiălah lĕ rngôch bunuyh gĭt năl jêh; bu uănh tâm ban bơi ma khĭt, ƀiălah nanê̆ ngăn hên ăt gŭ rêh; uănh nâm bu hŏ rmal jêh, ƀiălah mâu geh khĭt ôh;

¹⁰ uănh nâm bu rngot, ƀiălah răm maak mro; uănh nâm bu nau ndĭt trơi, ƀiălah hên ƀư đŏng ma âk bunuyh ndrŏng; uănh nâm bu mâu geh ndơ ôh, ƀiălah geh đŏng lĕ rngôch.

¹¹ Hơi phung ta ƀon Kôrintô, hên lah lĕ nuih n'hâm ma khân may nuih n'hâm hên pơk huy.

¹² Hên mâu geh nau keh koh ma khân may, ƀiălah nuih n'hâm khân may yơh geh nau keh koh ma hên.

¹³ Gŭ ngao hom ma hên tâm ban hên gŭ ngao ma khân may — gâp lah ma khân may nâm bu lah ma phung kon se hên nơm — khân may pơk huy hom nuih n'hâm khân may nơm!

Brah Krist jêh ri Bêlial

¹⁴ Lơi ta anh mâng mbăk ndrel đah phung mâu chroh ôh. Yorlah nau sŏng srăng đah nau djơh mhĭk geh nau tâm rnglăp lĕ? Nau ang jêh ri nau ngo geh tâm rnglăp lĕ?

¹⁵ Brah Krist jêh ri Bêlial geh tâm rnglăp lĕ? Mâu lah moh phung chroh dơi geh ndrel ma phung mâu chroh?

¹⁶ Mâm dơi geh nau tâm rnglăp ngih brah Brah Ndu đah lĕ rup brah? Yorlah he jêng ngih brah Brah Ndu gŭ rêh mro mrăng, nâm bu Brah Ndu lah jêh: “Gâp mra rêh gŭ tâm khân păng jêh ri hăn nsong tâm khân păng; Gâp mra jêng Brah Ndu khân păng, Jêh ri khân păng mra jêng phung ƀon lan Gâp.”

¹⁷ “Yor nây, Kôranh Brah lah: Luh du hom tă bơh khân păng, Tâm nkhah hom tă bơh khân păng, Lơi pah tât ndơ ƀơ̆ ƀơch, Gâp mra rom dơn khân may.

¹⁸ Gâp mra jêng Mbơ̆ khân may, Khân may mra jêng phung kon bu klâu jêh ri kon bu ur Gâp, Kôranh Brah Geh Lĕ Nau Brah lah pônây.”