II Kôrintô 5 - Nau Brah Ndu Ngơi 2023

Ntŭk gŭ ta klơ trôk

¹ Yorlah he gĭt tơlah ngih njưh he ta neh ntu geh nau rai, he mra geh ngih tâm trôk n'ho ro gŭ ta klơ trôk, tă bơh Brah Ndu ndâk njêng, mâu di tă bơh ti kon bunuyh ôh.

² N'hêl nanê̆ ngăn, he nđêng tâm ngih njưh aơ, jêh ri ŭch ngăn nsoh ngih he gŭ ta klơ trôk.

³ Yorlah he nsoh ngih nây, he mâu mra gŭ săk kuh ôh.

⁴ N'hêl nanê̆ ngăn, dôl he gŭ tâm ngih njưh aơ, he nđêng tâm lĕ nau anh jâk, mâu di he ŭch doh lơi ôh, ƀiălah he ŭch nsoh ntop tay, gay ma nau rêh mra rvăn ndơ blau khĭt.

⁵ Brah Ndu jêng Nơm nkra jêh he ma nau nây, jêh ri Păng ăn jêh Brah Huêng Ueh jêng ndơ mbơh ma he.

⁶ Yor ri, ăn he nanh janh mro jêh ri gĭt dôl hôm gŭ tâm săk jăn aơ, he gŭ ngai đah Kôranh Brah,

⁷ yorlah he chuat hăn ma nau chroh, mâu di ma măt saơ ôh.

⁸ Pô ri, he nănh janh mro jêh ri ŭch luh tă bơh săk jăn aơ gay gŭ ndrel ma Kôranh Brah ueh lơn.

⁹ Yor nây, nđâp tơlah gŭ tâm săk jăn aơ, nđâp tơlah luh, he ƀư lĕ nau ktang gay ƀư maak nuih n'hâm Kôranh Brah.

¹⁰ Yorlah lĕ rngôch he mra tâm mpơl tanăp ntŭk ngih phat dôih Brah Krist, gay ăp nơm sŏk dơn tĭng nâm nau ueh mâu lah nau mhĭk păng nơm ƀư jêh dôl hôm gŭ tâm săk jăn.

Nau pah kan tâm nsĭr

¹¹ Yor ri, yor nuih n'hâm klach ma Kôranh Brah, hên srôih nchâp phung êng. Brah Ndu gĭt rah vah hên, jêh ri gâp kâp gân ma nuih n'hâm sŏng khân may gĭt rah vah hên lĕ.

¹² Hên mâu n'hao êng ma hên nơm đah khân may du tơ̆ đŏng ôh, ƀiălah ŭch prăp ma khân may du mông găl rnê êng ma hên, gay ma khân may dơi plơ̆ sĭt lah ma phung knŏng tâm rnê êng ma nau padih, mâu di tâm nuih n'hâm khân păng ôh.

¹³ Yorlah tơlah hên nsrôih ngăn, nây jêng yor Brah Ndu; tơlah hên geh nau mĭn ueh, nây jêng yor khân may.

¹⁴ Yorlah nau rŏng Brah Krist ntrôl hên, jêh ri hên mĭn, tơlah du huê khĭt jêh ma lĕ rngôch bunuyh, lĕ rngôch bunuyh khĭt da dê jêh.

¹⁵ Jêh ri yorlah Păng khĭt ntrok an ma lĕ rngôch, gay ma phung bunuyh gŭ rêh mâu gŭ rêh yor khân păng nơm ôh, ƀiălah gŭ rêh ma Nơm hŏ khĭt jêh ri dâk rêh tay ma khân păng nơm.

¹⁶ Yor nây, ntơm aƀaơ hên mâu hôm sek uănh du huê bunuyh tĭng nâm nglay săk ôh, nđâp tơlah hên hŏ tă sek uănh jêh Brah Krist tĭng nâm nglay săk, ƀiălah aƀaơ aơ he mâu hôm sek uănh Păng tĭng nâm nau nây ôh.

¹⁷ Pô ri, tơlah mbu nơm gŭ tâm Brah Krist, păng jêng bunuyh rhăk njêng mhe jêh, lĕ ndơ ơm rlau lôch jêh, aơ, lĕ rngôch ndơ jêng mhe da dê jêh.

¹⁸ Lĕ rngôch nau nây luh bơh Brah Ndu, Nơm ăn ma he geh nau tâm nsĭr đah Păng tâm Brah Krist, jêh ri jao ma hên pah kan nau tâm nsĭr.

¹⁹ Nây jêng, tâm Brah Krist, Brah Ndu ăn ma neh ntu geh nau tâm nsĭr đah Păng, mâu hôm kơp nau tih ma kon bunuyh ôh, jêh ri Păng jao ma hên nau mbơh ma nau tâm nsĭr.

²⁰ Pôri, hên jêng nơm mbơh ma Brah Krist, Brah Ndu dŏng hên gay ntĭm nti. Hên vơl dăn ma khân may tâm amoh Brah Krist, ăn tâm nsĭr hom khân may đah Brah Ndu.

²¹ Brah Ndu hŏ ƀư jêh Nơm mâu mâp gĭt năl ôh nau tih plơ̆ jêng nau tih yor he, gay tâm Nơm nây he plơ̆ jêng nau sŏng srăng tanăp Brah Ndu.