II Kôrintô 4 - Nau Brah Ndu Ngơi 2023

Nau Mhe Mhan Ueh ăn ma lĕ rngôch bunuyh

¹ Pôri, tă bơh nau yô̆ nđach Brah Ndu, hên dơn nau pah kan aơ, pôri hên nuih n'hâm mâu dĭl ôh.

² Hên dun jêh lĕ nau kan ndâp pôn jêh ri khư geh nau bêk prêng; hên mâu sŏk nau ndơm mâu lah nau nchơt nklă nau Brah Ndu ngơi ôh. Ƀiălah, hên rblang rah vah ma nau ngăn, hên ăn ma nuih n'hâm sŏng lĕ rngôch bunuyh tâm nal ma hên tanăp Brah Ndu.

³ Tơlah Nau Mhe Mhan Ueh hên geh nau nkŭm ndâp, pôri nau nkŭm ndâp knŏng đah phung bunuyh roh rai.

⁴ Brah tâm rnôk aơ ƀư chieh măt nau mĭn ma phung bunuyh mâu chroh, gay khân păng mâu saơ nau ang Nau Mhe Mhan Ueh chrêk rmah tâm Brah Krist, jêng rup Brah Ndu.

⁵ Yorlah hên mâu mbơh nkoch ma hên nơm ôh, ƀiălah mbơh nkoch Brah Krist jêng Kôranh Brah; jêh ri săk jăn hên jêng oh mon khân may yor Brah Yêsu.

⁶ Yorlah Brah Ndu jêng Nơm lah pô aơ: “Ăn nau ang sol bơh nau ngo,” hŏ sol ang jêh tâm nuih n'hâm hên, ăn nau ang gay ma gĭt rbăng nau chrêk rmah Brah Ndu ta muh măt Brah Yêsu Krist.

Nau ktang bơh nau chroh tâm nau rlong uănh

⁷ Ƀiălah hên prăp drăp ndơ khlay aơ tâm lĕ yăng neh, gay ma tâm mpơl nau brah dŭt prêh nây văch tă bơh Brah Ndu, mâu di tă bơh hên ôh.

⁸ Hên geh nau mpet tâm lĕ rngôch trong, ƀiălah mâu geh nau rchiăt hăch ôh; geh nau răng rŭng, ƀiălah mâu rdja nuih ôh;

⁹ bu ƀư mhĭk ma hên; ƀiălah hên mâu gŭ êng ôh; bu lơh hên prah, ƀiălah mâu roh ôh.

¹⁰ Hên djôt mro tâm săk jăn hên nau khĭt Brah Yêsu, gay ma nau rêh Brah Yêsu mra tâm mpơl lĕ tâm săk jăn hên.

¹¹ Yorlah tâm nôk gŭ rêh, bu jao mro hên ma nau khĭt yor Brah Yêsu, gay ma nau rêh Brah Yêsu mra tâm mpơl lĕ tâm săk jăn hên blau khĭt.

¹² Pôri, nau khĭt pah kan tâm hên, ƀiălah nau rêh pah kan tâm khân may.

¹³ Yor hên geh du nuih n'hâm chroh nâm bu nau hŏ nchih: “Gâp chroh jêh, pônây gâp ngơi,” tâm ban lĕ, hên chroh, pônây yơh hên ngơi.

¹⁴ Yorlah hên gĭt ma Nơm hŏ ƀư ăn Kôranh Brah jêng Brah Yêsu dâk rêh tay, mra ƀư ăn hên dâk rêh tay ndrel ma Brah Yêsu lĕ, jêh ri djôt leo hên ndrel ma khân may lăp tâm nau tâm mpơl Păng.

¹⁵ Lĕ rngôch nau nây tât yor khân may, gay ma nau yô̆ lơ hô văch ta âk bunuyh jêh ri lơ hô geh âk bunuyh nhhơr nau tâm rnê lah ueh, gay djôt leo nau chrêk rmah ma Brah Ndu.

¹⁶ Yor ri, nuih n'hâm hên mâu dĭl ôh, nđâp tơlah săk jăn ntơm rai grĕ grĕ, ƀiălah tâm dâng hên lơ nar lơ rgâl mhe lơn.

¹⁷ Yorlah nau rêh ni hên n'gơch jêh ri ƀât lât mra djôt ma hên nau chrêk rmah toyh lơn jêh ri n'ho ro,

¹⁸ yorlah hên mâu gơih mĭn ma lĕ nau dơi saơ, ƀiălah gơih mĭn ma lĕ nau mâu dơi saơ. Yorlah lĕ nau dơi saơ knŏng jêng ƀât lât, ƀiălah lĕ nau mâu dơi saơ ôh jêng n'ho ro.